MORNING REPORT : 25th JULY 2013 NINGANI (Zonet Zing Daifim, 7:30 a.m.) Police Report : Tukin hian Police Station biak tlang theih loh kan nei nual a. Kan hriat theih chinah chuan nizan lamah thil thleng duhawm lo sawi tham a awm lo. Nizan chu Vaivakawn Police Station ah tang an ngah ber a, mipa 8 leh hmeichhia 1 kawlin mipate hi khawm case te, ruk ruk leh mi bum vanga mante an ni hlawm a, hmeichhe awmchhun pawh hi rukrua rinhlelh vanga man a ni. Aizawl Police Station ah tang mipa 4 leh hmeichhia 2 kawlin mipate hi khawm leh rinhlelh mante an ni a, hmeichhiate hi narcotic case nei an ni thung. Bawngkawn PS ah mipa 3 kawlin rinhlelh man an ni hlawm a. Saiha PS ah mipa 4 kawlin an zinga 2 chu ruih nana hman thin Parvon mansak an ni a, 2 dang chu buaina siam vanga man an ni. Traffic Report : Nimina Aizawl a Traffic Rules bawhchhia man zat : Two Wheeler 10, LMV 10, Taxi 8, HMV 4, Bus 1, fine tlingkhawm Rs. 6,400/-. Taxi Driver pakhat chu motor khalh chunga mei zuk vangin COTPA dan hmanga man a ni bawk. Hospital Report : Nimin tlai dar 5 atanga tukin dar 7 thleng khan Aizawl Civil Hospital Casualty ah emergency case 100 vel an nei a, mitthi an nei lova. Nizana Civil Hospital Casualty pantu zingah hian pumna an tam leh ber a. Accident vanga hliam tenau nei an awm nual bawk. OD an awm lova, Zurui medical 3 vel an awm. Khum ruak a awm lova. Labour Room ah nau piang 16 an awm a, mipa 7 leh hmeichhia 9 an ni a, an zinga mipa 1 chu zai chhuah a ni a, vawiina nei tur 3 an awm bawk. Synod Hospital Durtlang ah nizan khan emergency case 19 neiin heng zinga 11 chu admit an ni a, mitthi an nei lo. Nizana Synod Hospital pantu zingah hian khawsik leh pumna an tam a, khum ruak an nei lo. Lawmna Ward ah nau piang 4 awmin mipa 2 leh hmeichhia 2 an ni a, vawiina nei tur 11 an awm bawk. Aizawl Hospital ah mitthi 1 neiin Cabin an full a. Hun engemaw chen enkawl tawh MJA President hlui Pu H. Zosangliana chu a dinhmun a tha deuh niin thu kan dawng. Kulikawn Hospital ah nau piang 1 neiin vei mek 1 a awm bawk a, BN Hospital ah nau piang 1 an nei a. New Life Hospital ah nau vei mek 1 awmin khum an full a. Care Hospital ah khum an full bawk. Nazareth Hospital Ramhlun North ah te, Grace Nursing Home ah te, Adventist Hospital ah te, Alpha Hospital ah te Cabin an full a. Grace Nursing Home ah hian zaithiam Saizikpuii Sailo chu cancer vangin enkawl mek a ni a, a dinhmun a tha lutuk lo niin thu kan dawng. Lunglei Civil Hospital ah nizan khan emergency case 8 neiin mitthi an nei lova, nau piang 1 awmin khum a full a ni. Power dinhmun : SLDC atanga thu kan dawn danin, phailam atanga power kan hmuh kan hman tam lai ber nizan dar 8 khan 65.54 MW kan hmang a, Serlui B Hydel Project atanga 7.6 MW siamchhuah nen kan hman zawng zawng chu 73.14MW a ni. Nizan dar 7:02 a Bukpui 132 KV Sub Station atanga pek chhuahna line chhia chu dar 7:25 ah siamthat leh a ni a, West Phaileng to Mamit line chhia, a chhiatna lai an hmuh theih lawk loh chu Mamit Sub-Station bul lawkah thingin a line a vaw chhia a lo ni a, nizan dar 7:41 khan siamthain eng pek theih a ni. Line chhia report dang a awm lova, load shedding ngai lovin power kan hnianghnar a ni
Posted on: Thu, 25 Jul 2013 02:08:01 +0000
Trending Topics
Recently Viewed Topics
© 2015