MORNING REPORT : 31.01.2014 ZIRTAWPNI (Zonet Zing Daifim, 7:30 a.m.) ## Nizan dar 11 hma hret khan Treasury Square Bazar, Assembly Complex leh I & PR Building inkarah tak bomb a puak a, I & PR Building hi tukverh darthlalang a keh nasa hle a, Assembly lama Assam Type Building Tile bang a keh nual bakah Chawhmeh zuarte inphona pawh a chhe nual. He bomb puak hi Aizawl Police Station chuan dar 11 ah report dawngin, a hmunah an kal nghal a, he bomb hi Gelatine niin an ring a. A tipuaktu emaw, rinhlelh emaw man an la nei lo. Police Report : Tukin hian Zonuam Out Post tih loh Police Station leh Out Post kan biak thin dangte chu kan be kim thei a. Kan hriat theih chinah nizan lamah thil thleng duhawmlo dang sawi tham a awm lova. Lock Up ruak 5 a awm a, tang zinga hmeichhia an tel loh zan a ni leh bawk. Aizawl Police Station ah tang 9 neiin rui chunga mortor khalh vanga man leh khawm case a man te an ni hlawm a, an zingah hian family case a tang 1 a tel. Bawngkawn PS ah tang 6 kawlin rukru leh zurui te an ni hlawm a. Kulikawn PS a tang 5 an neih zinga 4 chu rukruk vanga man niin pakhat dang chu family case a ni. Vaivakawn PS ah rukruk vanga man 2 kawlin Champhai PS ah rukrua rinhlelh man 2 an kawl a. Lunglei PS ah thu zawhfiah leh atana Jail atanga lakchhuah 2 an kawl a, Vairengte PS ah leiba pek duh loh vanga man Vai man 1 an kawl bawk. Tukin hian Traffic Police Station kan be thei lo. Hospital Report : Nimin tlai dar 5 atanga tukin dar 7 thleng khan Aizawl Civil Hospital Casualty ah emergency case 72 an nei a; mitthi 2, naupang ward ami leh ICU ami an awm a. Nizana Civil Hospital Casualty pantu zingah hian naupang kawthalo luak khawsik leh puitlingah pumna an tam ber a. Zurui medical 1 a awm a, Khum ruak a awm lo. Emergency & Labour Room ah nau piang 8 awmin, mipa 2 leh hmeichhia 6 an ni a, an zinga mipa 1 leh hmeichhia 2 chu zai chhuah an ni a, vawiina nei tur 8 an awm bawk. Synod Hospital Durtlang ah nizan khan emergency case 12 neiin heng zinga 7 chu admit an ni a; mitthi an nei lo. Nizana Synod Hospital pantu zingah hian naupangah kawthalo khawsik, puitlingah pumna an tam ber a; ICU ah na zual enkawl mek 5 awmin khum ruak 1 a awm a. Ward hrang hrangah khum ruak tlem tlem an nei a, Cabin ruak 2 a awm bawk. Lawmna Ward ah nau piang 17 awmin mipa 10 leh hmeichhia 7 an ni. Greenwood Hospital ah mitthi 1 neiin khum an full a. Bethesda Hospital ah nau piang 1 neiin Cabin ruak an nei a. Kulikawn Hospital ah nau piang 1 a awm bawk. Nazareth Hospital Ramhlun North ah te, New Life Hospital ah te, Care Hospital ah te, Alpha Hospital ah te khum an full a. Grace Nursing Home ah te, Adventist Hospital ah te, Aizawl Hospital ah te, BN Hospital ah te Cabin an full a ni. Power : SLDC atanga thu kan dawn danin, nimin chhun dar 12 a phai lam atanga power kan hmuh tlem lai berin 46.26 MW kan hmu a, kan hmuh tam lai ber nizan dar 8 khan 67.10 MW kan hmu a. Tualchhunga siam chhuah 8.4 MW nen kan hman zawng zawng 75.5 MW a ni. Frequency hniam vang leh over draw vangin load shedding siam a ni a, Line chhia report erawh a awm lo. Tualchhunga Power siamchhuah bik hi, Serlui B atangin 7.9 MW a ni a, Kau Tlabung Project atangin .5 MW, a kilo watt zawngin Kilo Watt 500 a ni.
Posted on: Fri, 31 Jan 2014 02:13:43 +0000
Trending Topics
Recently Viewed Topics
© 2015