Matutina 7 di novèmber 2013: Iglesia mester avansá e obra di Dios Ma abo, sea sobrio den tur kos, soportá aflikshon, hasi e trabou di un evangelista, kumpli ku bo ministerio. 2 Timoteo 4:5 Esnan ku ta disipel di Kristu lo tuma e trabou ku E a hasi i nan lo sigui ku ne den Su nòmber. Nan lo no imitá e palabranan, e spiritu, ni e práktikanan di niun hende sino di Hesus. Nan bista ta riba e Kapitan di nan salbashon. E boluntat di Kristu ta Su lei. Segun nan ta avansá, nan ta kapta lusnan kada bes mas kla di Su kara, Su karakter i Su gloria. Nan no ta keda pegá na e ami, sino na e Palabra di Dios, ku ta spiritu i bida. “Si boso keda den Mi Palabra, boso ta bèrdaderamente disipelnan di Mi, i boso lo konosé e bèrdat, i e bèrdat lo hasi boso liber. (Juan 8:31,32). Nan ta apliká e e konosementu di Su boluntat na práktika. Nan ta skucha i ta hasi e kosnan ku Hesus a siña. Tin trabou den iglesia pa tur ku ta stima Dios i ta warda Su mandamentu nan. Loke e hendenan ta papia no ta evidensia sigur di ku nan ta kristian. E palabranan ku nan ta papia no ta duna siguransa di ku nan ta kombertí. Skucha e palabranan di Kristu: “Dikon boso ta yamá Mi Señor Señor i boso no ta hasi loke Mi manda boso? (Lukas 6:46). A ménos ku e bida diario konfirmá e boluntat i e obranan di Kristu, niun hende por pretendé di ta un yu di Dios i heredero di shelu. Tin un religion legal, ku e fariseonan tabatin, pero un religion asina no ta duna mundu un ehèmpel manera esun di Kristu; Nan no ta representá e karakter di Kristu. Esnan den ken nan kurasonnan Kristu ta biba, lo realisá e obranan di Kristu. Esnan ei tin derecho na tur e promesanan di Su palabra. Dor di bira un ku Kristu, nan ta hasi e boluntat di Dios i ta mustra e tesoronan di grasia. “E ora ei lo bo yama, i Señor lo kontestá; Lo bo sklama, i E lo bisa: AtAmi aki. (Isaias 58:9). Ki bunita promesa! “I si bo pone bo mes disponibel pa yuda esnan ku tin hamber, i satisfasé e deseo di esnan afligí, e ora ei bo lus lo sali den skuridat, i bo tiniebla lo bira manera mèrdia. I Señor lo guiabo kontinuamente, i lo satisfasé bo deseo den lugánan kimá dor di solo, i duna forsa na bo wesunan; Lo bo ta manera un hòfi bon muhá, i manera un fuente di awa ku su awanan no ta kaba” (vèrs 10,11). Den un kontraste ku murmurashonnan i keha nan di e malbado nan, e sirbidó nan di Dios lo kanta: “Lo mi alabá Bo, o, Yehová, ku henter mi kurason (Salmo 9:1). Pasobra ounke Señor ta halsá, tòg E ta atendé e hende humilde; Ma e hende orguyoso E ta konosé djaleu. (Salmo 138:6). No pèrmití pa bo haña nada ku parse orguyo òf banidat, pasombra lo e saka Kristu for di bo kurason, i e bashí lo keda yená ku atributonan di satanas.– Revieuw and Herald, 1 di mei 1913 Amèn
Posted on: Thu, 07 Nov 2013 15:54:16 +0000
Trending Topics
Recently Viewed Topics
© 2015