Muslim Ralhrang [ ISIS ] Nih Ci Hmih An Timhmi Yazidis Miphun *************************************************************************** Yazidis miphun hi vawleicung ah 700000 an um i, Iraq ram ah 650,000 hrawng an um i a dang cu, Turkey, Syria, Georgia, Russia, Germany Armenia le Iran ah a tthekmi miphun an si. Laimi zat hrawng an si I, Iraq ram ah a ummi miphun hmete an si. Iraq milu i 1% hmanh an tling lo. Muslim biaknak nih a chilhmi pawl karlak ah thinphang thlalau in zungzal khua a sa mi an si. Vawlei pi nih theihpi loin a chanchan in nehsawh thlanglamh a tuarmi miphun an si. Iraq raal lio 2007 zongah muslim ralhraang pawl nih huatnak ruang le remlonak ruangah bomb an puah hnawh lengmang hna i 700 hrawng an thi ti a si. An remlobik mi cu an biaknak hi a si. Muslim pawl nih khuachia bia pawl tiah thlanglamh le nehsawn in an ti tawn mi hna an si. Yazidis pawl biaknak cu Krihfa a tam bik an si, Judaism le Zoroastrianism zumhnak cawhpawlh in a thomi biaknak a si. Iraq ram chaklei hraap ah kum thong reng lo a um cangmi Yazidis miphun pawl cu kan hnu zarh ah Muslim ralhraang ISIS nih ci-hmih dingin an nam hna i ningcang loin tampi an thah hna. Vuleicung pumpi thinlung mitthli a tlaak lio caan a si. Islamic State in Iraq and Syria tiah aa timi ISIS ralhraang nih an i tinhmi cu zumhnak dang le miphun dang he aa cawhpawlh lomi Islam State dirh kha a si. Cucaah, ram an laaknak hmunhma chungah a ummi biaknak dang a bia mi miphun paoh cu an ci hmih an timh hna. An Anmah bantuk in Muslim a si lomi paoh cu mithur, mithiang lo an an ruah hna i, a huat bak in an huat hna. Hi hna ISIS nih cun Yazidis miphun pawl cu kan hnu zarh hnih lio ah khan ruaphak loin hruhru hranghrang in an nam hna I, nu, pa, tar, hngakchia hual loin an thah hna. Muslim ah maw naa thlen lai, thih dah naa ham lai tiah an hrocer hna,. An thah ning hna hi thah sawhsawh hmanh siloin an hngawng an tan hna, an pum a dang, an lu a dang in an holh hna. An lu cu fungzum in an sawh hna i kenkip lo ah an taar hna, a cheu an kut in an i put hna. A cheu an sa an can mi kha khengpi chungah an chiah hna i zapi hmuhnak an pho hna. Fapawi nu cheukhat cu an paw laifang in nam in an zei hna I an thah hna. Cu bantuk in sualnak an tuah mi cu teinak ah an ruah i, an i lunghmuihtuk caah heh tiah an lawmh. God is Great tiah an au. Muslim caah cun an Pathian duhnak tuah a si tiah an ruah. Cucaah, Yazidis miphun pawl cu a nunnak a luat khawh nak ding caah Sinjar tlangpar ramlak ah an zaam. A zaam kho lomi paoh cu thah colh an si ko. Sinjar tlangpar hrawng i aa thuphnawk mi cu a tlawmbik thong sawmli cu an si lai tiah an zumh. Fiang in cazin an la kho rih lo. A cheu cu Syria le Turkey ramri lei ah an zaam i buuk an tom. Hngakchia tampi cu ti haal, rawlţam in an thi. An temhtuarning a fah tuk caah US cozah a um kho ti lo I, ISIS ralhrang pawl cu vanlawng in bom a thlak hna I, fiang le tlangpang le ramlaak ah a thupmi cu US cozah nih vanlawng in rawl le si-ai a thlak hna Nizan ah Australia cozah nih ISIS ralhrang pawl tuk ding le Yazidis miphun pawl chanhchuah dingah US he rian kan ttuanti lai tiah thawng an thanh. 21 Century ah mah bantuk in miphun le biaknak thleidannak ruangah cihmih a tuarmi Yazidis miphun caah thlacamnak in bawm cio hna usih.
Posted on: Wed, 13 Aug 2014 23:33:50 +0000
Trending Topics
Recently Viewed Topics
© 2015