NEKOLIKO STOLJEĆA PUNTA U KRATKIM CRTAMA (napisao Rado Žic - Mikulin) PUNAT JIMA MORI MOST, HVALU GROMAČ I ŠIŠAJDU MERIKAH ! Uzrečica ka se je jako puno puti čula po Puntu. Puntari su judi ki su tvrdoglavi, nenavidni, tvrdi, kurajni i nepopustjivi, jako delavni, strajni, ostočni i ča započnu to i fine. Punat je staro naseje. Jime su mu dali još stari Grci ( HO PONTOS) ča pomeni lipo more. Kada su ga zavzeli Rimljani su misleć da je jime nastalo zaradi obrambenoga mosta na pili ( vrata od drage), nazvali VILE PONTIS. Hrvati su jime pohrvatili i dali mu jime Punat. Ono ča govore da je Punat mlado misto je samo delno točno. Punat se je za razliku od drugih nasej puno brže širil i zbog toga su puti, kale i place na Punti puno šire leh va drugih mistih i kaštelih po otoku. Puntari su staro rušili i novo gradili. Od staroga Punta su ustale deli Galije, kolo Stare place i va Kolušini. Vela draga je već novijega vrimena. Kako ča je rekal i napisal pop Alojzijo Ragužin je Punat va staro vrime jimil čuda manjih naseji. Va to vrime je bil to težaški i pastirski Punat ki je svoju robu prodaval po kaštelih, Veji, Vrbniku, i Rabu. Zi gradnju Štanaja ( Tvrdjave) na današnjoj Galiji ( Kala Štanaji, potlik štanjari) su se kolo štanaja, ki je jimil stalnu posadu, pričeli nasejivat artižani, postolari, stolari, kovači, zidari, kalafati, barbijeri šilci, peki i mesari. To su bili judi ki nisu jimili zemje i ki su morali kupovat spizu od domaćih težaci. Tako su težaci i pastiri dobili kupci za svoju robu i nisu više morali hodit po drugih kaštelih. To je oslobodilo del delavnih ruk i pričelo se je više delat, više se je pridelalo i naravno više dobivalo. Prekopala se je najprije zemja kolo Punta. Kada više ni bilo ča kopat su pričeli kopat komunadu na kraseh. Kungutali (krčili) su drmuni, kavali (prekopivali) dolci i delali škatulice, škatule i particele. Kako je bilo po svuda puno kamenja su od kamenja delali gromače, duplice, vrbakani, gomile i ćokulini. Te su čuvale zemju od naliva dažja i bure. Više trsja, više šenice, prosa, rži, sirka, žita i potlik framentuna je davalo više robe za prodat. Kako se sve ni moglo prodat domaćin meštron se je pričelo mislit na prodaju va većih mistih kolo otoka. Pojavili su se prvi batelanti, brodari, ki su robu kupovali doma i prodavali tamo kadi su jimili kupci. Spričela su to bili Senj. Rika, Crikvenica, Poreč, Rovinj, Trst i Zadar a potlik se je to proširilo na talijanske, grške, francuske, španjolske i jingleške gradi. Puntari su pričeli gradit veće brodi. škune, logeri, trabakuli ke su mogle na Sredozemno more pa i na Atlantik. Ča su daje jidrili to su jin se obzorja širila. Va stiku zi drugimi judi i narodi su čuda toga naučili i vidili. Kada san bil ja mali se je uvik govorilo" kradi zi oči" ča je značilo, dobro pogjedaj ča jimaju drugi, vidi kako dela i provaj to udelat sam ,ako ti se čini korisno. Prenosili su znanje na mlaji rod. Diventali su od težaci i pastiri dobri mornari, ojbani ( timunjeri) velbani ( jidričari) pušbani (zapovidnici na kalunih), korbani ( kapitani). Vojsku su služili na ratnih brodih na moru i po rikah i jezerih. Diventali su efuri na Danubu ( Dunavu) Balatušu ( Balatonu, Blatnon jezeru)po Savi i drugih rikah ke su se va to vrime duperale za prevoz robe. Vožnja po rikah je bila drugčija leh vožnja po moru i zaradi toga su se čuda naučili. Brodi su bile široke a plitke. Moralo se je mislit na prud ( jarinu) ki se je premikal i više puti bil tamo kadi ga prije ni bilo. Kada se ni moglo zi vesli i jidri se je brod moralo potezat zi kraja. Potezali su ga judi , konji i voli. Timun i vesla su vavik morali bit ašenjo. Ruge( vesla) su šempre morale služit i za se odrinut od tla. Naučili su kako se melo, salbun,jarina, znimje zi rike i jezer. Prišli su doma i pričeli znimat melo zi mora. Kako bi se razsolilo bi ga bili pustili na dažju i po cilo lito. Namor, sve to je opeta pripejalo do gradnje brodi za dvizat melo. Zrasle su škverići i škveri ke su ondat zoposlile više manovali i kalafati. Pomalo se je prodavalo ono ča se je udelalo a ne samo drvo za vesla, korbe, dren za piluni i jarbuli. Judi su jimili više soldi i pričeli gradit kuće, skladišća, štaje za živo i za sve to je rabilo zidari i graditeji. Namor ,oni su rabili tesari i poznova se je odpiralo novo delo i novi dobitak. Pričelo se je mislit i na prikomorske zemje za ke se je čujevalo, ma se ni znalo ča one jimaju i ča nose. Va Španji i Franci su naši mornari, ki su svi govorili vejotu ali mediteranu ( zajik ki su govorili svi mornari na Sredozenon moru) prišli va dotik zi Španjolci i Francuzi ki su navigali va Merike i čuli za vele dobitki kada se prodava robu od Europe va Meriku i od Merike va Europu. Već va 17 viku jimamo prvoga Puntara ki je delal školu za Kapitana od Corso longo ( duge plovidbe) va Vnecih.. Brzo za njin kada se je odprla škola va Lošinju uče za kapitana još dva Puntara. Zi Merike ni prišlo samo sve dobro. Prišla je i filonošpera ( peronospora) ka je va kratko vrime unišćila sve naše staro trsje.To je bil veli tofac za Punat. Vino ko se je prodavalo po cilon primorju i zaškinju ( zaledju) je škorlalo( smanjilo). Brodi nisu jimile ča pejat. Provalo se je zi ovin i onin ma ni bilo vele koristi. Grof Feštetić va dogovoru zi biškupiju jima va Kanajtu školu i kaže zi svojimi strukovnjaki kako se mora sadit ameriški divji trs i ondat nanjega cipat domaće trsje. Uči cipat dvajset divojak zi ciloga škoja, mej kimi je dvanajs divojak zi Punta. Sadi se reparija, mantikul i aramo ma to gre sve pomalo. Od cipa do roda pasa pet let. Judi gredu za zasluškon. Delaju po ciloj Austriji. Kleše se kamik va Budinpešti, gradi va Beču, Pragu Požunu i drugih mistih.. Ma ni tamo ni dosti posla. Prične se hodit va Merike. Judi delaju va Merikah po dva, tri lita i hode doma kopat i sadit trsi. Obitej se preživja zi ujen i ono malo intrade ka urodi. Merika sve više odpira vrata. Sve više naših judi gre tamo. Kako bi se zašćitili od rizika bolesti ustanavjaju Šišajdu, društvo za pomoć. Svaki dava va skupnu blagajnu peču ( dolar) na šetimanu i jima pravo na pomoć ako nima posla i ako oslabi. To je bila vela pomoć svin ki su bili va Merikah. Tada su samo ritki ustajali za vavik va Merikah. Oni ki su se tornjivali ( vraćali) su doma kupovali drmuni, mesta, živo, gradili kuće, štaje i ta kapital je poznova zaživil delo i kupnju. Sve do Napuliona doklek nisu prišli na brač ( otok) Francezi se ni dililo imutak na svih dicu. Otac i mat bi bili odlučili ki će ustat doma i ki će njih tendit do smrti a drugi dica bi bili: jedan sin bi bil šal za popa ali fratra, a drugi bi bili šli se učit za artižani ( zanat) Ženska dica kada bi se bile oženile su dobile dotu i tako bi bila težačija ustala nedijena. Francezi su prominili užancu i zemja se je morala dilit na svih dicu aš je Franceska revolucija prnesla " Lažbu (slobodu), jednakost i bratstvo". To je udelalo čudo škode puntarskon gospodarstvu. Zemja se je razdijivala na manje i manje komadi ke više nisu mogle hranit nikoga. Prišal je Prvi svitski rat. Austrija je raspala. Mi smo se pripojili Jugoslaviji. Jugoslavija je bila sama siromašna i ni mogla pričet obnavjat gospodarstvo. Politika čin manje ne Srbi va Jugoslaviji je još više rujinivala gospodarstvo. Naši judi su pričeli hodit va Meriku. Ni bilo obiteji ka ni jimila jenoga, dva ali tri sini ća, va Franci, Belgiji ali Meriki.Naši judi su bili po svuda vridni, požtrvovni,bistri, delavni i po svuda su jih zimali na delo. Fanj naših mladići, aš su bili bistri i znali pisat i čitat je kada su šli va šervicij ( vojnu obvezu) bilo poslano va vojne škole. Diventali su podoficiri zrakoplovstva,podmorničari,strojari, radiotelegrafisti, makiništi, bolničari i vodje manjih brodi. Niki su ustali va mornarici i vojski a drugi su se kada su finili obvezu sukli i to jin je bil va civilstvu dobar pričetak. Niki popi su svojih netjaci i netjakinje školali. To su pričeli delat i artižani. Punat je dobil prvih učitelji i učiteljice, abukati, profesori, likari i inžinjeri. Pričelo se je na školu gjedat, kako na niš dobro. Učitejica Pavlika je popolne jimila opetovnicu za divojčice ke su finile pušku školu. Va toj školi je bilo dvajsetak divojak ke su se učile živjenske stvari: kako napisat pismo, kako napisat zamolbu, kako vodit domaćinstvo, kako gojit dicu i učile su se higijeni i čistoći. Ta škola je bila ista kako i gradjanska škola va gradih. Drugi svitski rat je poznova unišćil sve. Jugoslavija je propala . Naše kraji su bile kako i va prvon ratu okupirane od Talijani. Talijani su pričeli zapirat naših judi. Fanj su jih poslali va logori va Taliju. Svih dicu su zapisali va talijanjsku školu. Svi smo morali govorit talijanski. Ondat je Talija propala. Dva lita smo bili pod Njimci. Nato su prišli partizani. Svi ki su niš jimili su to zgubili. Težakon su dali zemju ku su štentali. Svi dica su bili zapišeni va školu. Zi rata je prišlo više od 50 časnici i podčasnici. A po ratu je visoke vojne škole i akademije finila destak Puntari. Po finjenoj pučkoj školi smo skoro svi šli va Veju va gimnaziju. Škola je bila bezplaćna. Po maloj maturi su šli niki va obrtne škole, drugi va tehniške škole a trći va gimnazije. Po finjenih školah su postali artižani, tehničari, učiteji, činovnici i strojari, nautičari, fratri i sestrice. Čuda od njih je potlik upisalo fakulteti i diventali su profešuri, inžinjeri, likari, ekonomisti, kapitani, popi i veterinari. Punat mestašce od kolo dvi tisuće duš je dal do danas više od tristo dobrih artižani raznih struk, kalafati, maranguni,tišlari, zidari, postolari, tokari, strugari, mesari, peki, trgovci, i drugih. Dal je više od sto vridnih tehničari raznih struk, ekonomisti, strojari, brodari, i drugi, jima više od 60 učiteji, 20 profešuri, četrdesetak inžinjeri, kolo 60 likari, tri veterinari, pet apotekari ,trih akademskih slikari, dvajsetak magistri znanosti i više od deset dohtori znanosti, jenu naivnu slikaricu ka je poznata po cilon svitu. Jako čudo judi se bavi zi slikanjen, fotografiju i fanj jih piše, pisme, štorije i novele i dvanajst dohtori znanosti. Puntaron ni nikada dosti znanja i učenja. Vridni su, strpjivi, nepopustjivi i bistri i ono ča je vavik resilo puntarskoga šlovika, ča započne i namisli to i fini. Puntarska "raje krepat leho cedit" nas svih kunpanja (prati) va živjenju i nan svin dava moć, kuraj i ustrajnost va naših hotenjih i zamislih. Od naše hvale gromač, tvrdoga dela zi pikunon, zubićen, pralicu i matiku do našega ustrojivanja ( organiziranja ) i samopomoći va tujen svitu, Šišajde va Merikah i do našega mosta mori ki je doduše potonul i ne povezuje više Prnibe i Batova ma nan je raširil pašaj po cilon svitu i svuda smo dobri, najboji ča moremo bit, nepušćamo se nikomu i vavik plavamo nad svimi ča god delamo, delamo zi srcen i dušu i niš nan ni teško. Orudje zi kin delamo ni važno važno je dobro delat i ne cedit pa makar krepat, tu ustrajnost, voju i kuraj smo podidovali, bašćinili od prednamci i zato jin hvala. Bog jih pomiluj i neka jin bude lahka naša hrvaska črjenica ku su rovali, kopali, kungutali i kavali najviše zi hjibcen palente, malo tvrdoga kruha, pit spod dropin, česnon i šupjin lukon. Svoje poslanstvo su ispunili i svin nan pustili svoje pomalo divje, ma jako korisne geni, ke ćeju kumpanjat svih naših zanamci. I jin kako i nan davat moći kuraja i voje za bit najboji va svojen delu.
Posted on: Tue, 06 Aug 2013 16:56:34 +0000