NEW EXPLORATION LICENSING POLICY an tih fo hi ilo hre tawh ngai em ? Lehkhathiam leh hruaitute zingah pawh hian he thil hian enge a tum hrelo kan la tam ania.He thil zet hi chu kan Mizoram hmakhua sawinghing dawt thei khawp thil a ni tlat a;enganga thui pawh ziak ila i chhiar zo vek mai turah ka ngai hmiah.A pawimawhzia hi ilo hriatloh ka duh lo ve.A tunlai tawng takin a chhiartu duhtak ka hmangaih che .Chhiar chhuak dap ang che aw. Khawvel ram tam zawkte hi tuialhthei (oil) a innghat an ni a.Ram hrang hrang ten oil laichhuak tur leh oil -a intodelh tumin an intlansiak nasa hle a ni.Oil khur inchuh avanga indona te,oil awmna ram inchuh avanga innghirnghonate a thleng fo thin.Oil hi ram hausakna hnãr ber a lo ni ta,a ngah ram apiang ram hausa an ni mai. Heti tak hian oil hi hlu mah se,laihchhuah,semchhuah leh hralh chhuahna tura hmalakna te chuan kawng tam takin CHHIATNA a thlen thin.Mi tam takin an in leh lo ram an chàn phah a,ramsa leh savate an thih phah a;nungcha chi hrang hrang bakah sangha te thlengin,keini mihringte ngei tan pawh chhiatna rapthlak thlen theitu a ni thung. Oil & Natural gas sawngbawlna leh thlitfimna (refinery) khawl chuan mihring leh thilnung dangte tana tûr hlauhawm tak toxic waste namenlo a sawrchhuak a,chu chuan a ram vela tuite a tibawlhhlawh a,in atana tlaklo an lo ni thin.Lui tui chauh pawh nilo lei chunglang pawh,oil-in a chiah leh a luanna chin chu thlai chinnaa tlaklo contaminated soil ah alo chang thin. Tuialhthei (oil) leh Natural Gas avanga harsatna lo thlen thin dante,tuialhthei leh gas laichhuak ram thenkhat - Ecuador,Nigeria,Colombia,Azerbaijan, Kazakhstan leh Kuwait atangte hian ilo thlirkual thuak thuak teng . ECUADOR : An ram budget pumpui 5O% chu tuialhthei atanga an hmuh niin oil hi an ram hausakna innghahna a ni.Mahse oil a hausakna nasa taka an um avangin ramngaw venhim lamah an mit an chhing a;chu chuan a ram mi,Red Indian Amazon phaikuama awmho leh an ram khawchhak lama awmte tan chhiatna a thlen a,chu chu duh lovin Red Indian te chu Ecuador sorkar lakah kum tam tak an hel tawh a ni.An tui tlante chu US Envirinmental Protection Agency -in mihring tana him tawk an siam piah lam daih a ni a.Hei vang hian cancer,lu na,nauchhiat ,kawthalo,luak bakah vun natna chi hrang hrang an tuar a;chuvangin a hmaa a sãng tel ni thin kha tunah chuan tlemtë an ni ta.Oil a baw niai nuai a,oil vangin sorkarin sum tam tak hmu mah se oil khur hnaia chengho Red Indian mite tan chuan chhiatna zakhua thlentu a ni. NIGERIA : Oil bikah an hausa hle.An ram pumpui zauzawng atanga 12% zet chu oil & gas laihchhuahna leh zawnna atan an hmang.Nitin hian oil 12 million barrels an thawnchhuak a,oil atanga Revenue lut zat chu kum 1 chhung lek pawhin 1O billion Naira aiin a tam daih a ni.(1 Naira = O.37 Rupee).Oil a hausakna chauh an ngaihtuah avangin anni pawh hian ramngaw venhim lamah an mit an chhinglo theilo.Khawvelah gas flaring ti nasa ber an ni awm e.Gas flaring chu i hre chak chiang mai,a awmzia chu oil laihchhuahna leh a khur te,chemical factory ahte gas chhe tawh leh hluihlawn tawhte chu pipe lianah siak chhovin boruakah khian an hal ta thin.Oil khura gas duhloh leh hluihlawn tur thehchhuah thãwlna mawlmang leh tlawm ber anih chu.Hei hian thil pawi tak a khawih a,boruak a tichhia a,rangva inchungte pawh ruahsurin a tidum nguk thei.Chu mai nilo thlai ,tui,leh ram te a tichhe bawk.Nigeria hian fimkhurna a tlachham hle a,Environmentalist te chuan an vei hle. COLOMBIA : Colombia rama Andes tlangram hi oil ah a hausa hle.A hmaa kan saei ram 2 te nen Colombia pawh hian seismic survey atana lung hãlna(Dynamite) an hman nasat avangte,pipe-line keh avanga oil tam tak baw thinte,a changa oil-pipe puak keh thinte,an verhna bulhnaia oil tam tham tak baw zeih zuihte,an thlitfimna hmuna oil bua leh ekchhia luang ngiai nguaite leh oil khur panna kawng ram zau pui pui,ram palailenga thlùr sung mai te chuan sawi mai piah lamah ramngaw leh environment a tichhe nasa hle. Oil laihchhuah duhloh avangin hel pawl Marxist Guerillas alo piang hial a,bomb tihpuah leh inrukbo te a hluar chho ta hle.Kum 9 chhung lek pawhin The Guerrillas hoten vawi 346 zet oil-pipe lines an bomb chhia a,pipe keh atangin 1.2 million barrel crude oil a luang ral hman.Chu chuan pawi ala khawih lehzel,mel 375 zeta zau ram chu thlai chinna tlak lovah a siam.(The Guerrillas tih film hi awmin ka hre ta tlat mai,ka la en chiah lo na a.TV lamah lo cháng la,Korean Gu Jun Pyo intih emaw ni te ai kha chuan i hlawk zawk ka ring e.) AZERBAIJAN : He ram hi Soviet Union kehdarh,Armenia nena inri a ni a,oil ah an hausa zek mai.Anni pawh hian ramngaw an sawisa nasa ngang mai. KAZAKHSTAN : Hei pawh,Soviet Union kehdarh,Mongolia hnaih ami an ni.Petroleum Scientist te chhutdan chuan Natural gas ah Siberia leh Gulf Region ramte an hausa ber a,a dawtah Caspian Sea Region a ni.Mahse Caspian Sea Region hi khawvel ramdangte tan chuan land-locked country(tlawhpawh harsa tak ram) a ni hlauh va,chuvangin oil hralhchhuahna turah harsatna an tawk. Oil hian environment a tichhe nasa lehzual emaw tihtur a ni.Kazakhstan mite sawi dam chuan ,Caspian Sea chu Oil bua a nasat avangin mitlawnga hmuh mai pawhin a tle nuar mai, an ti! KUWAIT : Ram tereuhte ni si hi oil ah zet chuan a aia hausa hi an tam lem lo.Milar tak mai Saddam Hussein-a meuh pawhin kum 1990 khan Kuwait ram hi oil a a hausak êm avanga awtin a va rûn hmiah tawh anih kha.Ila hre reng em?Khatia ava rûn tak ngawt avang khan USA chuan Kuwait chhan turin thapui a rawn thawh nghal anih kha.1991 ah America chuan Kuwait chu Iraq lak atangin UNO member dang,a thurualpuite nen an la let a,mahse Iraq sipaite chuan oil khur 789 zet an hal hman a ni.Oil khur kang chu thelh mih a har em em a,he oil khur kang hi a rapthlak asin.Nitin 6 Milion barrels vel chu a kangrala chhut a ni.Chu chuaneikhu leh ting(Soot) nasa lutuk a siam nghal a,Kuwait ram mai nilo Gulf ram pumah a nghawng nasa em em a ni.Kum khar hnu deuhthawah an thlelh mit thei ta chauh a nih chu!Gulf tupuia oil bua avang hian Whale,dolphin keh sangha chi hrang hrang an thi nasa hle?sangha mana eizawnna thlenga lo tuarin an tlakhniam phah zui a,tun thleng hian kha indo hmaa an dinhmun ngai kha an la phak leh lo. SPRATTY ISLANDS : Tunhnaiah hei hi a lar hle.Ila hriatloh takin kan belh ange..South China Sea a awm,thliarkar te tak te,tam tak a ni.Helai hmun leh tuifinriat hnuaiah hian oil inchhekkhawm tam tham tak,a zat chiah la chhut chhuah theih rihloh a awm a.Ram 6 heng- China,Vietnam,Taiwan,Phillippines,Brunei leh Malaysia ten an inchuh a ni ber.(An inchuh dan chanchin pawh hi ngaihnawm tak a ni ringawt.A sei dawn em avangin in request te anih ngawtloh chuan ziah chi pawh a ni rih lo....) RUSSIA : He ram hi engkimah hian a të tak tak thei love.Oil ah a hausa hle a,khawvelah oil thawnchhuah ah a BER a ni.Nikhata a lak chhuah theih ringawt pawh hi pui tak a ni-1O.9 million barrels a tling a,7O% hi ramdangah a thawnchhuak a ni.Natural gas lakchhuah tamah pawh khawvelah pa 2 na ala ni tho.Oil ngah hrim hrim anga chhut erawh chuan khawvelah pa 8 na a ni.A laihchhuahna khawl a nei tha a,natural gas bikah reserve hi nei tam bera ni tihna anih chu,oil ah pa 8 na. INDIA : Oil reserve 125 million metric tonne a nei a,natural gas reserve 1,437 billion cubic metres a nei bawk.Hmuhbelh zel ala ni.Asia-Pacific regiin ah hian India aia oil reserve ngah chu China a ni mai.A ram a zau va,mihring an tam avangin nitina mamawhna a sang a,a mamawh 3O% vel chiah a nei thei a a dang 60% chu ramdang atangin a lakluh a ngai.Chuvangin India hian Iran ,Iraq leh Kuwait te hi bechhe chi a nilo hrim hrim a ni.India Foreign Policy chu oil ah hian a innghat thui hle a ni.Oil Diplomacy thiam taka kalpui a ngai thin. India rama oil & gas an laihchhuahna berte chu - Assam(Digboi hi a lar ber) ,Andhra Pradesh (Krishna-Godavari basin:Reliance Industries neitupa Mukesh Ambani hausakna thuruk hmunpui leh Gas Authority of India Limited GAIL ho hlauhrawn Ambani lalna ram ti mai teh ang),Bombay high Gujarat,Rajasthan leh Tamil Nadu te hi an ni.India hi a tang hle a,gas ah phei chuan a intodelh thuai an ring hle. Tichuan,kan thupui ber Oil & Gas Exploration Licensing Policy thar kha a duangchhuak ta a ni.India beiseina sanna dang leh chu,Assam- Arakan basin hi a ni.Helai hi 1,16,OOO sq.km a zau a ni.India chuan Category 1 ah ngat a dah ta hial. Ka sawi tam lutuk dawn ka hah tawh..Hun dangah oil & gas chungchanga ram langsarte dinhmun hi chu ka la rawn sawi chho leh zauh zauh zawk dawn nia..Tuna tan chuan duhtawk phawt teh ang... NEXT : Oil & Gas MIZORAM dinhmun mek. Digboi Oil Well zirchianna. Etc.
Posted on: Sun, 10 Aug 2014 05:42:23 +0000
Trending Topics
Recently Viewed Topics
© 2015