NPR LEH UID June 18,2014: New Delhi: Union Home Minister Rajnath Singh chuan hemi ni hian National population Register chung chang thlirletna a nei a, NPR hi khawvel huap pawha e-Governance lama hmasawnna ropui tak leh invenhimna tha ber pawl a nih tur thu a sawi a. He hunah hian Dr. C. Chandramouli, Registrar General of Citizen Registration, India pawhin he project kal phung leh hmalakna turte a sawi fiah bawk. Home Minister he project atana kal phung tur chu awmze nei tak leh felfai taka a nih tur thu a sawiin, sorkar chhinchhiahna lama lo record tawh leh National Identity cards a pek chhuah atanga nau piang leh mitthi chhinchhiahna thar lam ber berte mila kalpui tur a nih thu leh fel fai taka zawh a nih tur thu a sawi a ni. Home Ministry hnuaia khua leh tuite ziah luhna leh chhinchhiahna ‘National Population Register (NPR) hi project hi India mi dik takte chuan an ti ngei ngei (mandatory) tur a ni a, mi thenkhat, Aadhaar card lo nei tawh sa an awm chuan an card te hi NPR officials ten an pawmsak nghal dawn a ni. Tichuan, heng project pahnihte hmanga mipuite an chhinchhiah hnuah, card pakhat, National Identity Card an tih, digit 12 nei number chu mimal chhinchhiahna (national Identification number) a tan an pe dawn a ni. NPR hian Biometric Enrollment lo ti tawhte zawng zawngte pawh kha a rawn huam (cover) tel leh vek dawn a, a hrang ve ve a kal lovin, heng project pahnihte hi kal kawp (complementary) leh inzawm (merge) tura ruahmanna hi kalpui mek a ni. BJP leader Yashwant Sinha hova parliamentary standing committee chuan UPA sorkar hnuaia Aadhaar chungchang kha NPR nena khaikhinna neiin, Biometric enrollment an kalpui dan te, hman tan a nih dante leh a him loh theih dante uluk taka an zir chian (criticized) hnuah Aadhaar aia tha leh him zawk, fel fai zawk nia ngaiin he project hi an rawn kalpui dawn ta a ni. Home Ministry atanga thu laknain a tarlan danin, NPR charge latu, Registrar General of India (RGI) chuan Home Minister nen tang kawpin National population Register leh Aadhaar ruahmanna lo neih tawh (scheme) te fel fai taka zawm khawm emaw, pumkhata siam (marriage) dan tur an duang ang a. Hetah hian duhthlan tur pahnih awmin, Registrar General of India (RGI) hnuaiah project pakhat anga kalpui emaw, RGI hnuaiah tho hian NPR leh Aadhaar te hi hna hrang anga thuang hniha kal pui tur emaw a ni ang a, NPR lamin enrollment a kalpui mek laiin UIDAI hnuaia Aadhaar project hian lo la chhawngin chhinchhiahna number (unique number) an lo buaipui thei thung dawn a ni. UID/Aadhaar project hian thlawptu dan a la neih loh avangin a hmasa zawk ang khian an kalpui rin a ni a, RGI hnuaiah hnuaiah inchhun finin, NPR hian enrollment leh biometrics data lak khawm tawhte bakah la lakkhawm zel turte a ken tlang nghal vek rin a ni bawk. Eng pawh ni sela, NPR hi chu a kal tlang dawn tho tho tak avang hian NPR thuneitute chu ram chhung In zawng zawngah lutin he chhungkaw tinte finfiahna (door-to-door verification) leh ziah luhna (enrollment) hi an rawn kal pui dawn tih erawh a chiang a ni. Times of India (TOI) in a zir chiannaah chuan, NPR thuneitute chuan ram pum huapa khua leh tui dik takte finfiahna tur chu zir chiang zel ang a, chu mi ang chuan khua leh tui mimal tinte database a siam dawn a ni. Heng atan hian document 19, birth certificate, death certificate, land records, school records- te huam tel vekin khua leh tuite finfiahna leh tichiangtu atan an hmang dawn a ni. He NPR project tihna tur hi chhawng thum angin kalpui a ni dawn a, a chhawng khatna, stage-I an tih, mihring leh a chenna chhinchhiah felna tur electronic database chu peih fel a ni tawh a, a chhawng hnihna (stage-II)- mipuite biometrics lak khawm chu hma chhawpah an dah mek bawk. A chhawng thumna (stage-III) tur atan , khua leh tuite nihna ‘finfiahna’ chu a dik ngei tih pawm fel a ni dawn a ni. Heng stage pathumte zawh a nih hnuah National Registration of Indian Citizen (India khua leh tuite chhinchhiah felna) chu peih fel a ni ang a, mimal tinte hnenah National Identity card te chu pek chhuah a ni dawn a ni. Ram dang mi, India khua leh tui ni lote chu resident identity card an tih chu an siamsak ve vek ang a, Khua leh tui dik takte hnena National Identity Card an pek chhuah nen chuan a rawng (colour) a in ang dawn lo a ni. He NPR hnuaia khua leh tuite chhinchhiahna tur leh ziah luhna tur leh National Identity Card pek chhuah dan tur chung changa ruahhmanna hi Union Cabinet-ah July, 2014 hian pharh hman beisei a ni bawk. Hriat ve mai mai atan, tunah hian National Registration of Indian Citizen (NRC) project hi Assam state ah neih mek a ni a, Bangladesh atanga dan lova lo lutte hriat theih nan leh hnawh chhuahna tur atana tih a ni. He NPR hnuaia biometric data lak khawm dan tur pawh hi Aadhaar ai khan a scientific zawk ang a, a chipchiar zawkin a him zawk tura ngaih a ni. Aadhaar project atan khan cheng vaibelchhia 3500 zet sen ral a nih tawh avang khan hluihlawn emaw, a thlawn maia chantir chi rual a ni lova, chuvangin NPR nena kaih kawptir dan tur an duang ang a, amaherawh chu RGI in ngun takin a enfiah thung ang a, thil fel lo a lo awm palh a nih emaw, eng emaw tul bikna a awm chuan biometric data te hi a tul dan a zira lak khawm that leh tur a ni ang. Eng pawh nise, UIDAI hnuaiah khan biometric data eng emaw zat lak khawm a nih tawh avang leh a enkawltu joint secretary 14 te kha sorkar laipui hian a rin tawk tho avangin hmun thenkhatah chuan an data lak khawm tawh sate kha chhawm zui zel dan tur a ngaihtuah rin a nih bakah national identification number siam nan a chhawm zui nghal rin a ni bawk. DODALNA: Home ministerin hetianga thil kalpui a tum mek a nih thu a puan chhuah lai hian activists thenkhatte chuan an duh lohna an lantir nghal a. PM Modi-a ngei pawhin PM hlui Manmohan Singh-a hnena Oct.6, 2011 ah lehkha a thawnah hetiang thil hi citizen-te zalenna nek chepna a nih theih thu a lo sawi tawh a, mahse a sawi ang chiah kha tunah hian Modi vek hian a rawn thar thawh leh a, hetianga khua leh tuite chhinchhiahna (Identity card) hian mimal dikna humhalhna (constitutional right) a pawngsual thu leh ram thenkhatah pawh an dodal avanga an thulh leh tak thu an sawi chhuak ve nghal bawk a ni. (Hei hi doc a la dah tura ka tih a ni a, NPR tobul, UID nen a danglamna etc.te nen ka la rawn khawr pum dawn nia.)
Posted on: Fri, 27 Jun 2014 15:52:34 +0000
Trending Topics
Recently Viewed Topics
© 2015