Naktuk Nov. Ni 15 MIZO AW Editorial TRIPURA BRU-TE VOTE THLAKTIR HI Mizo Students Union (MSU) chuan kum 1997 kum tawp lama Mizoram chhuahsana Tripura pan a, refugee camp 6-a cheng Bru-te chu sawrkar laipui chuan duhsak nalohin a duhsak niin an hria a. Nov. ni 25-a Mizoram Assembly thlannaa Tripura Refugee Camp atanga vote an thlak thei tur chu awm lo an ti a, dodal an tum a ni. MSU-ten an thlir leh ngaihdan hi Mizoram mi tamtak ngaihdan pawh niin a lang. MSU ngaihdan hi han hawh ta ila, engatinge heti em ema sawrkar laipui hian Bru-te hi a ngaihsak a, a duat a, a khawngaih a, pawimawhna a pek tih zawhna chhanna chu anmahni Bru-ten an huatthu ni lo se, an la mawl leh retheih em vang niber maiin a lang. Bru te hi khawi atanga lokal nge, khawilam mi nge an nih, khawiah nge an awm tih chu thu dang ni se, mihring an ni a, an dinhmun chu raltlan pawh ni lo mah se mihring changkan leh hmasawnna atanga thlirin, khawngaih, ngaihsak, duat, chawikan leh hmasawntir ngai an ni tih chu a chiang hlein a lang. Chuvangin khua leh tui leh mihring hmasawnna atana ding sawrkar/ram (welfare state) mit atang chuan Bru te dinhmun hi lungchhiatthlak tak a ni. Inthlanna chungchangah hian Bru an ni emaw, tute pawh India khua leh tui tawh phawtte chu India dan chuan dan anga kum tling an nih chuan electoral roll-a an awm vek chu a tum a ni a. Electoral roll-a awmte chuan vote an thlak vek ngei chu a duh a, chutiang tura inzirtir mek a ni. Chutianga ram rorel tur tlannaah chuan India khua leh tui ram chhunga awmte mai bakah India mi ram pawna awm (NRI) te pawhin vote an neih theih dan kawng hial zawn a lo ni ta a. India mi an nih chuan vote neih lohtir lam aiin kum tlingte chu vote an neih ngei dan tur (electoral roll-a an chuan dan tur) leh vote an thlak theih ngeina tur chu dan chuan kawng a zawnpui a ni. Chutiang thinlung atang chuan Section 60 (c) of Representatives of Peoples’ Act of 1951 hmangin kum 16 chhung Tripura-a Mizoram Bru-te awmte chu ‘Notified class of Citizens’ ah Election Commission of India chuan puangin Nov. ni 25-a Mizoram Assembly thlannaah chuan vote an thlak theih dan kawng a zawnsak ta a ni. A hmaa inthlanna lo awm tawhahte pawh dan dang hmanga vote thlaktir an lo ni tawh a. Hetianga state chhung inthlannaa state pawn atanga vote thlak hi Bru-te chauh ni lovin India ramah Kashmiri Pandit te pawh phalsak an lo ni tawh tih Chief Election Commissioner V.S.Sampath chuan tun hnaia Mizoram a tlawha, chanchinbumiten an zawhna a chhannaah a sawi a. Chuvangin Bru chungchanga MSU leh mi tamtak thlirna anga Bru hote zuk duhsak ngawr ngawrna lam aiin, miin khua leh tui a nihna democratic right a hman theihna kawng zawnsakna a ni tih hi hriat (pawm) atan a duhawm hle. Bru-ten Tripura Refugee Camp atanga vote an thlak tur hi dan chhunga thil tih a nih avangin, khua leh tui tha, dan rorelna duhtute chuan a tihpuitlin theihna tura tanpui zawk tur niawm tak a ni ta a ni. Chuvangin, MSU te hian rilru zau tak pua thil hrethiamin, a buai zawng leh khawlhkham zawnga thil ti lovin, an ngaihdan ang, Bru-te duhsak bik anga lang theia hetia enkawl hi mi tamtak ngaihdan a ni lo tih hriain, an ngaihdan an sawichhuah chin hi duhtawk thei se. Tute mah harsatna insiamsak loa zalen leh dik taka mahni remchanna bera mi tinin vote an thlak hi a pawimawh a ni ti thei se, a duhawm khawp mai. An vote hi bial pakhat tana chhiar tur a ni lo a, huphurh leh er tham pawh an niin a lang lo a ni. Khawngaihna leh duhsakna nena en mai chi an ni.
Posted on: Fri, 15 Nov 2013 00:22:00 +0000
Trending Topics
Recently Viewed Topics
© 2015