Orashon i Reavivamentu den Echonan E kreyentenan den Echonan tabata yená ku poder for di ariba. Spiritu Santu a ser deramá di un forma remarkabel. Kurasonnan a ser toká, bidanan kambiá. E evangelio a penetrá e lugánan di mas difísil, i míles a ser kombertí. Den Echonan 2, tres mil a ser añadí na iglesia (Echonan 2:41). Echonan 4:4 ta registrá ku e kantidat di hende hòmber so ku a kere “tabata masoménos sinku mil”. Asta hopi di e lidernan religioso, ku tabata oponé Hesus durante Su bida, a bira “obedesidu na e fe” (Echonan 6:7). E storia di e kresementu fenomenal aki ta sigui den Echonan 9, ku ta bisa ku e iglesianan dor di “henter Hudea, Galilea, i Samaria” a ser “multipliká” (Echonan 9:31). Pa ora yega na Echonan 10 pa 12, e evangelio a ekstendé krusa fronteranan kultural i geográfiko. E senturion Romano i e tesorero di Reina di Etiopia a ser batisá. Echonan 1 ta bisa ku masoménos shentibinti kreyente a topa den e aposento alto (Echonan 1:13, 15). E mihó kálkulonan ta ku pa fin di e promé siglo tabatin por lo ménos un mion Kristian den e Imperio Romano. Esaki ta un kresementu asombroso pa kualke stándart. Kiko tabata e sekretu? Buska e siguiente tèkstnan. Kiko tabata un rason prinsipal pa e kresementu di e iglesia di Tèstamènt Nobo? Echonan 1:4, 8, 14; 2:42; 4:31, 33; 6:3, 4. Pastor R.A. Torrey tabata un predikador poderoso di reavivamentu den último parti di siglo 19 i komienso di siglo 20. E a dirigí reunionnan di reavivamentu na Gran Bretaña for di aña 1903-1905 i dor di henter Nort Amérika na 1906 i 1907. Lamentando kon drùk Kristiannan ta, e a deklará, “Nos ta muchu okupá pa hasi orashon, i asina nos ta muchu okupá pa tin poder. Nos tin gran kantidat di aktividat, pero nos ta logra poko; hopi servisio, pero poko kombershon, hopi makinaria, pero poko resultado”. Bo ta muchu okupá pa hasi orashon? Ken no por relashoná ku esei? Kon bo por baha spit sufisiente pa tuma e tempu ku bo tin mester pa hasi orashon? Pensa riba tur e èksküsnan ku bo tin pa lag’é warda, e rasonnan ku bo ta duna pa hasi otro kosnan. Na final, kiko ta e kos ku bo ta pèrdiendo dor di no pasa tempu den orashon?
Posted on: Mon, 08 Jul 2013 03:32:39 +0000
Trending Topics
Recently Viewed Topics
© 2015