P.M News/Updates. Party Reports. Isabella wen get bar for Oleh rd by Awolowo Junction elder sister nai marry one Pastor for him Church today. D church dey Anigboro Street. Dem do d reception for d church too, dem try sha as na maltina all round dem share & d jollof rice make sense small but e strong small too like fried rice. D meat be like Ikewun as d pastor just dey yanyanko like who gada offering money take sew suite. SAPELE TAFIA WISH UNU HAPPY MARRIED LIFE. D Wedding for Winners Chapel and d Reception wen dem do for Navy Base today try small but dem nor quick share food so tay na d MC come dey shout for microphone say make d refreshment dey go round b4 dem come manage respond small. Mc Orange wen short and do head like Apostle Moses Granduer own, just dey speak Chinese English wen nor dey inside lexicon (DICTIONARY) Na old mama and old papa wen don born belly tire nai marry for Eku rd today. Na 'Abanaya' clothe dem two tie as dem almost draw money wen dem dey spray dem. Na 'lowi-lowi' meat nai dey d jollof rice wen salt and ground-nut oil too catch. Na so so Schenapp nai dem range full table. Even d high table dey scanty wit drinks. Old Mama Erabor wen die for Itsekiri Road Burial na today be d grand finale,na so food brekete and drinks dey go school,but i nor understand Sammy Erabor and he crew. See as Solonzo wey dey Court Road dey jump wit one leg for deir Music,u go laff. Solo u don old,enter House make you lock door sleep. D oldest Bachelor 4 Igbo wey dey sell building Materials 4 Palm Avenue by kingstreets Rd 4 dat upstair wey e see G.B.O. marry 4 Azuigbo 4 Anambra State 2day.Ify and Oge nai be deir name. Na so dem pack Beer put for Hot sun and dem nor fit put blocks for d Drinks self. Food plenty but the Couples too short. The Wedding reception wen dem do for Catholic for yoruba Road swag low well well,as the meat be like Imekpe and the Rice dey cent kanfor,but all d same na jollof dem go still call am shaa. The marriage wen i attend with dis my 2 leg for off Uko Road na d best as dem nor spray money and d people wen attend nor plenty. See as food full ground and drinks plenty but the area children nor let man eat well,na so dem tanda dey wait plate wen wan land,make dem rush am take. One Okpe girl introduction for Amukpe big pass wedding,as d people just open fire like say dem be yankee people and nor be marriage oh. I pray make dem nor do Introduction forget Marriage. Semekolo for Cementary Road,new owners don cum pack semekolo loads for outside,as dem wan commence work fully for dere now. Any info about d missing Car wen we announce as Breaking News in the Afternoon,make unu call d owner thru 08062908441. I nor fit waka go many party today as Tafia Okpubuluku still dey sick small. Unu Gudnite,make i go peemos go relax for Victor Groove. I hear say Drinks plenty. SAPELE/DELTA STATE MUST BETTER.
Posted on: Sat, 29 Jun 2013 19:26:34 +0000
Trending Topics
Recently Viewed Topics
© 2015