PA REFRESCA MEMORIA! Ayera tabata parce cu mundo a caba na Radio Riool! Publication: Tuesday, 23 March 2010. Categoria: Editorial jossy_mansur_pic Ayera merdia tabata tin un desesperacion total pariba, dilanti di e microfonnan di Radio Riool. Delaster un disparate cu nan por a pensa, nan a bin cune, comosifuera cu e perdida di gobierno (y di e rooi di placa cu tabata yena e saconan di e miembronan di e pandiyanan conoci como friends and family) por a continua indefinidamente. No, shonnan, Pueblo a core cu boso malamente dia 25 di September y a bisa boso bon cla: bagamunderia a caba! Enrikecimento riba custia di Pueblo a yega su fin! Boso bay traha pa boso placa! Nan a grita den microfon (despues di tanto aña!) cu awor nan sa ken a mata Betico! Mi nomber, claro, a sigui di biaha, comosifuera mi ta e formula magico pa splica tur e desasternan di MEP! Un solo cos mi tin di bisa nan: ami no tabata tin nada di gaña cu e morto di kende tabata mi amigo y cu kende mi tabata tin un lealtad inkebrantable di traha pa logra nos Status Aparte. Awor, e pregunta grandi ta: ken tabata tin tur cos di perde despues cu Betico a anuncia den su seno cu e negoshinan di Ocando Paz via Aruba mester yega nan fin y a exigi Gobierno pa pone man na obra? Benny Nisbett a provoca e postura ey di Betico ora cu el a conteste anteriormente “ami no ta amigo di Ocando Paz!”. Ta ken anto tabata e gran amigo, abogado y consehero legal die narcotraficante mas grandi cu Venezuela a yega di conoce? Ta ken tabata hibe Suite 721 di Concorde hotel pa conta e placa di droga cu tabata bin di e cayanan di Fort Lauderdale? Ken tabata pasa su maletanan preto via e VIP room di aeropuerto pa subi caya sin e revision di e duana di Aruba? Si acaso Betico a ser mata, busca su asesino den e grupo cu tabata tin tur cos di perde cu cualke accion contra Ocando Paz! Cu tur hende sa con e Mansur nan a gaña nan placa? Te unda cu mi sa, nan a gane cu e sudor di nan frentenan, y no cu heavy equipment kibra y para por nada mientras declaratienan barbaro tabata ser entrega pa supuesto trabaonan cu e e equipo kibra y para ey tabata haci pa Gobierno! Nan no a gaña nan placa tampoco cu contratonan hugoso na dump, o huurnan exagera mientras Gobierno mes tabata tin edificio apropia, ni cu checknan di loto, ni aceptando e placa di soborno di Namdar y otronan! Sigur ta cu nan no a gane cu e placa di herencia di Abuncance, of e benta di e terenonan di Pueblo na financiadornan di campaña! Awor Booshi ta para banda di kende el a yama pa ‘pedofil’? Cosnan strano sa sosode na Aruba. Y no ta Nel mes a yama Rudy Lampe pa ‘e porco sushi mas grandi di Aruba’? Y ta ken a mande bay baha su frustracion na e campo alegre di Corsow? Mi kier meen, ta asina poco respet nan tin pa e inteligencia di Pueblo? Ta con hipocrita bo por ta y asina mes trata di sconde cu un actitud di “yo no fui”? No ta mi custumbra di contesta’ esnan cu ta sufri di complehonan di inferioridad, y mucho menos cu e mediocridad abundante na Aruba. Si mi ta hacie den e caso aki ta pasobra tin memorianan cu mester ser refresca pa e maldadnan cometi contra e Pueblo di Aruba no keda impune. Di mi parti nan por wel di sigui publica nan basuranan den Solo di Corupcion, y grita manera alma malo na Radio Riool, y sigui presenta nan noticianan ‘a la MEP’ e pantalla di nan canal “22 mentiras”.
Posted on: Thu, 08 Aug 2013 09:00:22 +0000
Trending Topics
Recently Viewed Topics
© 2015