PATHIAN A AWM NGEI TIH HRIAT THEIHNA TE(he thu hi post nawn a ngai tlat mai...): Pathian awm thu hi sakhaw hrang hrangte hian an zirtir vek a. Khawvel hnam hrang hrang zingah Pathian awm loh ringtute hi sawi tur an tam lo hle. Pathian ngaihsak lo nia kan ngaihte leh ‘Pathian a awm lo’ tia sawi thinte pawh hian eng emawti kawng talin Pathian a awm nia hriatna an nei a. Pathian hi ‘awm lo’ nia ngaitute an lo awm tak tak anih pawhin, an tlem hlein a rinawm. Bible leh Kristian thurinin a zirtirna bakah Pathian a awm tih hriat theihna hi kawng hrang hrangin sawi a ni a. A mal malin lo thlir zui nghal ila. • Thil bul chhuina-Lei leh van awm dan atangin (Cosmological Argument): Lei leh van leh a chhunga thil awm tinreng han en hian siamtu a awm tih hi hai rual a ni lo. Siamtu leh awmtirtu awm lovin mihring emaw thilsiam dangte emaw hi anmahni ngawtin an awm thei lo. Awmtirtu leh siamtu a awm avanga thil engkim hi lo awm a ni. Lei leh vana thilsiam chi hrang hrang han en hian heng zawng zawng siamtu leh enkawltu Pathian hi a awm ngei ang tih a hriat theih a ni. • Riruat thiamna-Thil siamte awm dan hmang atangin (Teleological Argument): Thil siam chi hrang hrangte han thlir hian a awm satliah mai nilovin, awmze nei tak leh kalhmang fel tak neia awm an ni tih a hriat theih a. Thing hnah pakhat pawh hi en i la an mamawh dap thei tura fel taka induang a ni. Chutiang zelin thil te ber thleng hian fel taka duan an ni vek tih kan hria. Chhun leh zan inthlak dan te, sik leh sa inthlak dan te, thing leh mau leh hnimte chenin, hunbi neia an awm dan te han thlir hian siamtu ropui leh fing tak, tum fel tak neia siamtu leh awmtirtu a awm tih a hriat theih a ni. • Thatna dan atangin (Moral Argument): Hnam tinin mi tha leh rinawmte ngaih hlut nachang kan hre theuh a. Mahni mihringpuite chunga thatna lantirtute chu kan ngainain kan ngaisang a. Mihring puite harsatna thlentu, mi sual leh tha lote chu huat nachang kan hre theuh mai. Chhungkuaa kan khawsak honaah te nu leh pa hotu chan changin, an thu leh hla ngaihchan ani a. Nu leh pate pawhin an fate thatna tur an ngaihtuah a. Khawtlang nun honaah te tha taka kna nun ho theihna turin dante pawh kan nei a. Heng thatna dan kan neihte hi mihring rilru leh ngaihtuahna piah lamah min siamtu emaw kan awm dan tur min relsaktu a awm tih min ngaihtuahtir thei ani. Chutianga mihring siamtu leh kan chunga fel tak leh tha taka roreltu awm nia ngaihna hian Pathian a awm tih min hriattir a ni. Khawvelah hian mi dik leh tha te dingchang loa, a dik lo leh fellote an dinchan chang kan hmu bawk thin. He khawvel piahah thatna thiamchantir a, fellohna hremtu a awm tawh lo anih phei chuan khawvela mihring nun hi a nep leh zual ngawt ang. • Sakhaw hrang awm avangin : Khawvela hnamtin leh chitin mai hian sakhaw vawn neiin, Pathian chungchang inzirtirna mumal tak leh tha tak an nei vek a. Hnam mawl ber nia kan ngaihte pawhin sakhua neiin, Pathian siamtu leh enkawltu awm hi an ring deuh vek a. Pathian an ngaihdan te, a chungchang thu an sawi dan leh inzirtir dan te thuhmun lo mahse, siamtu leh thilsiamte enkawltu hi chu awma hriatna an nei vek a. Hei hian Pathian a awm ngei a ni tih min hriattir a ni. • Philosophy hrang hrang zirtirna atangin : Khawvel finna (philosophy) hrang hrangte hian thil engkim mai hi thutak engemaw innghahna bulpui nei vekin an ring a. Chu thutak (truth/reality) chu Pathian, engkim awmtirtu leh siamtu leh enkawltu nena thil thuhmuna sawi theih a ni a. Grik finna (philosophy) tichhuaktu Socrates-a te, Plato-a te leh Aristotle-a te pawh engkim siamtu leh awmtirtu thutak (truth/reality) zirtirtute an ni. Tin, philosophy chi khat Ontology chuan mihringin thil a hriat loh leh a experience loh hi a sawi ngawt thei lo va, thil a sawi leh awm nia a ngaih tawh phawt chu a awm ngei a ni tiin a zirtir a. Hnam mawl ber pawhin Pathian a awm an ring a. Pathian hi awm lo ni se, a hming tumahin an phuahin, an lam ri ngai dawn si lo va. Chuvangin, Pathian hi a awm ngei a ni tih a hriat theih a ni. • Mihring rilruah chuan chatuan a dah bawk a (Thuh. 3:11)...."mi zz hian kan rilru chhungril berah chuan thil engemaw, mi tu emaw, mihring aia ropui zawk leh thil tithei zawk engemaw, awm ngei nia hriatna kan nei vek,chu mai bakah thihna hi tawpna a nih lohzia pawh kan hria,thlan piah lama thil dang engemaw la awm ngei tura rinna kan nei vek bawk, eng leh sakhua pawhin ring lo an awm hek lo..." (BILLY GRAHAM)."Hriat loh Pathian tan" tia ziak ka hmu a (Tirh. 17:23). • Thil siamah chuan a lang a ni; chuvang chuan, chhuanlam tur an nei lo (Rom.1:20) • Bible-a thu hmangin kan hnenah a in hriattir thin a, a in puang thin. A thu leh hla leh tawngtaina atangin a nihna te, a thiltihtheihna te kan hre chiang thin. A zirtirte thilmak tih leh Zawlnei hmangin thu a sawi a, a inpuang chhuak thin, a nihna ropuizia kan hriat theih nan. A fapa Isua hmang ngeiin kan hnenah thu a sawi, thiltih mak tamtakte nen (A bika Pathian inpuanna/special revelation). Nimahsela, khawvel mi chuan Pathian thlarau lam thilte chu a lawm thin lo… Thlarau hriat fiah anih avangin a hrethei lo reng reng bawk a ni (I Korinth. 2:14). A dan chu thlarau lam thil a ni. (Rom 7:14). Etc. etc. etc..
Posted on: Fri, 26 Jul 2013 05:56:31 +0000
Trending Topics
Recently Viewed Topics
© 2015