PIANPATNAK Akhaanpi 47 1. Josef cu Faro lakah hawh in, Ka pa le ka unau te cu Kanaan ngam pen tuu le khui le a neih haw mi hempoh tuah Goshen ah heng khawng zo haw hi, tin hilh hi. 2. Josef in a unau panga te cu pui in Faro maiah hawhpih hi. 3. Faro in a unau tei lakah, I na kaw na deh uh? tin dong hi. Amuhten, Bawipa, ka pu uh le ka pa te bangin kohte vang tuukhaal in um ung hi. 4. Hi ngam ah um tuk in hung zo ung hi. Itahum titale Kanaan ngam ah paampi a nase leita hangin ka ngannung uh tei eih tuk hamhing hei um leh ma toh hi. Mahhangin bawipa, na hehpihnak tuah Goshen ngam ah um tik zal in hi, tin kun haw hi. 5. Mahten Faro in Josef lakah,Atun na pa le na unau te na lakah heng khawng zo haw hi. 6. Egypt ngam cu nangma khutsung ah um hi. Na pa le na uanu te cu Egypt ngam pen mun a pha belnak Goshen ah um tik poh in hi. Amu sung pen ngannung cingkep dan a thei dildel mi a um haw tale ka tuu le khui khaaltu tei hotu hi tuk in koih in hi, tin thu pia hi. 7. Mahcengten Josef in a pa Jacob cu Faro maiah hawhpih hi. Jacob in Faro cu thupha pia hi. 8. Faro in, Na kum izong kaw? tin dong hi. 9. Jacob in, Leihum ah vakvai pepel in kum za le sawmthum kim zo ing hi. Ka pu le ka pa te vang mun khat nung mun khat ah thawn pepel bok haw naven amuh tei kum zah cu ban mang hi. Ka kum hi demno naven ka nunsung ah haksatnak tawk pepel ing hi, tin ti hi. 10. Jacob in Faro thupha a piak celh ten hawhsan leh ta hi. 11. Josef in a pa le a unau te cu Faro ii thu piaknak bangkek in Egypt ngam sung pen ngam phabel Rameses khawpi bul a ngam tuanpi cu luah in um tik hi. 12. Mahten a pa hihen, a unau te hihen, a pai inn a ummi hempoh te cu mipum tam le dem zui in a eih haw tuk an na pia hi. Josef Ii Ngam Ukdan 13. Paampi cu nase dedeuh in leihum muntihkim ah an um ma hi.Mahhangin Egypt le Kanaan ngam um mihing te cu ngilkial thanem dikdek in na um li haw hi. 14. Egypt mi le Kanaan mi tei ancang leinak sum hempoh cu Josef in munkhat ah khawlkhawm in Faro kumpi pai inn ah koih hi. 15. Egypt mi te le Kanaan mi te cu a sum neih haw mi a bo khawng ten Josef lakah zuan in, An pe in hi. Ka sum neihmi uh hempoh bo khawng limlem zo hi. Hehpihnak tuah na ngaihsut sak ma tale thi khawng ngangai tuk ung hi, tin kun haw hi. 16. Mahten Josef in, Na sum uh te a bo khawng zo toh a hi tale na ngannung uh te keng unna, ancang tuah hehsak tung hi, tin ti hi. 17. Mahticun Josef lakah a ngannung haw tuu, keel, cipuh, le laak te cu keng haw aa, Josef in ancang tuah hehsak hi. A ngannung haw te hehnak in Josef in mah kum sung cu ancang na pia hi. 18. A mai kum ten Josef lakah zuan leh haw aa,Bawipa, nangma lakah cun im tuk ma ung; ka sum uh te bo khawng in ka ngannung uh te vang nangma ta cang khawng zo haw hi. Atu cu ka longam le ka taksa luangpi siar ngawl a dang imah piak tuk nei leh ma toh ung. 19. Hitin ka thihsuk tuk ngangai uh cu phal zal pahsun. Hehpihnak tuah ngaihsut sak lo poh in hi. Keimuh mihing le leingam te hi an tuah lei in hi. Faron ii sal ah cang khawng tuk poh ung. Ka leingam uh te vang ama ta cang khawng ta poh hen. An ngawl in ka thih khawng uh ngawlnak tuk le ka leingam uh te ngamking a cang haw ngawlnak tuk in an le anci pe zazal in hi, tin ngen haw hi. 20. Mahticun Josef in Egypt ngam sung leingam hempoh cu Faro ta tuk in lei khawng hi. Paampi a nase leita hangin Egypt mi hempoh ten a longam haw cu Faro lakah zuak khawng haw hi. Mahticun Egypt ngam sung longam hempoh cu Faro ii ta na cang khawng ta hi. 21. Egypt ngam khatlam mawk pen khatlam mawk tian a um mi mihing hempoh cu Faro in a nadektu sal in bawl khawng hi. 22. Josef ii lei ngawlmi longam cu thiampi tei longam bek tang hi. Thiampi tei ca cun a longam haw zuak kul ma hi; itahum titale Faro in amu khamkhop an na pe leleng hi. 23. Mahtein Josef in Egypt mi tei lakah, Zo un, tu-ni in nohte le na longam uh te Faro ca tuk in lei khawng zo ing hi. Atu in hilai ah nangmu ca tuk in anci um hi. Hung in la unna, na lo uh ah cing tek ta un. 24. Ankung na cop uh ten khennga khenkhat cu Faro lakah pe tuk uh ci. A taangmi hempoh cu nangmu ta hi tuk hi; anci cin hun ten na cin leh tuk uh hihen, nangmuh le na canu na capa uh tei cawmdunnak an na hi tuk hi, tin ti hi. 25. Amuhten , Ka nunnak uh pansuah ngah zo ci; bawipa, nangcu kohtei humah pha ngangai ci. Kohte cu Faro ii sal na hi tuk poh ung hi, tin ti haw hi. 26. Mahticun a an neih haw mi khennga khenkhat Faro lakah pe tuk in Egypt ngam buppi zui tuk cu Josef in daan na bawl hi. Mah daan cu atu tian mang leng haw laih hi. Josef In A Pai Maiah Thukam 27. Israel mi te cu Egypt ngam Goshen ah um haw hi. Mahlai a um haw ten neinung in pungzai ngangai haw hi. 28. Jacob cu Egypt ngam ah kum heisarih um hi. A dam kum zah komkhawm ten kum za le sawmli sarih hi. 29. Jacob cu thih nai dedeuh zo ing hi tin a theihdun ten a capa Josef sam in a lakah,Keimah na it ngangai tale na khut cu ka khuk laklawh ah dual inna, Egypt ngamah phum tuk ngawl in thukapnak bawl in hi. 30. Ka thih ten Egypt ngam pen tulpih inna, ka pu le ka pa tei khaan ah na phum in, tin ti hi. Josef in ,Na hilh bangin bawl thung hi, tin ti hi. 31. Jacob in,Bawl hihim tung hi tin tamsiat in thukam in hi, tin ti hi. Josef in,Bawl tung hi, tin thukam hi. Mahtein a pa Jacob cu a ihkhum lulam ah lukun in Josef lakah lungdamthu na hilh hi. __________//___________
Posted on: Thu, 14 Nov 2013 01:59:44 +0000
Trending Topics
Recently Viewed Topics
© 2015