PULE‘ANGA TONGA ONGOONGO TUKUATU (21 Novema 2013) “ ‘Oku ‘ikai ke ‘iai ha makatu‘unga ‘o e ngaahi tukuaki‘i ‘o pehe ‘oku faihala ‘a e Pule‘anga fekau‘aki moe Modulus Pacific ” ‘Oku faka‘amu e ‘Ofisi ‘o e Palēmia ke tukuange atu ‘a e fakamatala ni koe tali ki he tukuaki‘i ‘ikai ha makatu‘unga pea toe ma‘ulalo na‘e fai ‘e he Fakafofonga Kakai ‘o Tongatapu 8 Sione Taione ‘o pehe ‘oku faihala ‘a e Palēmia pea mo hono ‘Ofisi. Lolotonga ‘a e ngaahi alelea Fakafale Alea ‘i ‘Okatopa 2013 fekau‘aki pea moe Fakamatala Fakata‘u ‘a e Potungaue Fonua, ‘Ātakai, Feliuliuaki ‘o e ‘Ea pea mo e Ngaahi Koloa Fakaenatula na‘e ‘ohake ai ‘e Sione Taione ‘a e fakamatala ‘o pehe koe Modulus Pacific ‘oku fakalele mo pule‘i ia ‘e he ‘Ofisi ‘o e Palēmia pea ‘oku taha pe ‘a e fakamatala ki he fokotu‘utu‘u ko ‘eni ‘a ia koe felave‘i ‘a e Ta‘ahine Pilinisesi Salote Mafile‘o Pilolevu Tuita pea moe Modulus Pacific. Na‘a ne toe hoko atu ‘o pehe koe fakatātā ‘eni ‘o e me‘a ‘oku ne pehē koe faihala. Ko e Kautaha Modulus Pacific koe taha ia ‘i he kautaha fekau‘aki ‘e tolu ‘o e kautaha lahi ‘oku fakatefito ‘i ‘Amelika ‘a ia ‘oku ui koe Modulus Baringer Group ‘oku lesisita ‘i Tongá ni. Na‘e lēsisita ‘a e kautaha ni ‘i Tonga ni ‘i he 2008 ke fakahoko ‘a e fakatotolo ki he lolo pea moe kasa. ‘Oku fakalele pea pule‘i pe ‘e he Kautaha ni ‘a ‘ene ngaahi ngaue ‘o fakafou ‘i hono kau Talekita pea moe Timi Pule. ‘Oku ‘ikai ke ‘iai ha kaunga ‘e taha ‘a e ‘Ofisi ‘o e Palēmia ki hono pule‘i ‘o e kautaha ni. Koe tukuaki‘i ‘o pehē ‘oku fakalele mo pule‘i ‘e he ‘Ofisi ‘o e Palēmia ‘a e Modulus Pacific ‘oku matu‘aki hala. Koe me‘a na‘e ‘ikai ke mahino‘i ‘e Sione Taione pea tōnounou ke fekumi ‘o ‘ilo kiai koe Komiti Fale‘i ‘aia ‘oku memipa ai ‘a e Sekelitali Lahi mo e Sekelitali ki Kapineti, Tokoni Sekelitali ‘oku ne tataki e Va‘a Sioloki ‘o e Potungaue Fonua, ‘Ātakai, Feliliuaki ‘o e ‘Ea pea moe Ngaahi Koloa Fakaenatula, Fakahinohino Lao Pule pea mo e memipa ‘e tolu ‘oku fakanofo ‘e he Modulus Pacific pea mo hono ongo kaungā kautaha fekau‘aki ‘oku nau fatongia‘aki ‘a hono fale‘i ‘o e Minisitā Fonua ‘i hono lakanga koe mafai fe‘unga. Koe Sea ‘o e Komiti koe Sekelitali Lahi pea mo e Sekelitali ki Kapineti pea ‘oku ngaue ‘a e Komiti mei he ‘Ofisi ‘o e Palēmia. Ko e Minisitā Fonua, ‘Ātakai, Feliuliuaki ‘o e ‘Ea pea mo e Ngaahi Koloa Fakaenatula pe ‘e taha ‘a e mafai fe‘unga ki he ngaahi fakatotolo mo hono keli ‘o e petoliume fakatatau ki he Lao ki hono Keli ‘o e Petoliume. ‘Oku poupou ki he Minisitā ‘a e Komiti Fale‘i. ‘Oku ‘iai e polokalama ngaue kuo ne fa‘u pea fokotu‘u mai koe fatongia ‘o e Komiti Fale‘i ko hono fakamahu‘inga‘i mo sivi‘i fakata‘u taha ‘a e ngaahi ngaue keli pea moe ngaahi fakmole ‘a e Modulus Pacific pea mo hono ongo kaungā kautaha fekau‘aki. Koe polokalama ngaue ‘o e ngaahi kautaha ‘e tolu ni ‘oku kau ai ‘a hono sivi‘i ke ma‘a ‘o e ngaahi geophysical areas, ngaahi ako fakasioloki pea mo hono fakalakalaka ‘o ha motolo petoliume 3D kimu‘a pea toki fakahoko ha fa‘ahinga ngaue vili pe keli lolo ‘i Tonga. ‘I he hiliange hono fakamahu‘inga‘i mo sivi‘i ‘o e polokalama ngaue ‘oku toki fale‘i leva ‘e he Komiti Fale‘i ‘a e Minisitā pe ‘oku totonu ke tali, fakatonutonu pe fakatale‘i ha ngaahi konga pe koe katoa ‘o e polokalama ngaue kuo fakahū mai mei he Modulus Pacific pea mo hono ongo kaungā kautaha fekau‘aki. ‘Oku totonu ke fakatokanga‘i ange ‘e he kakai ‘o e fonua koe fakaloloa ‘oku tuhu‘i mai ‘e he Fakamatala Fakata‘u ‘oku ‘uhinga ia ki he fakaloloa ‘o e Konga ‘Uluaki ‘o e Fakatotolo mei he ta‘u ‘e 4 ki he ta‘u ‘e 6, ‘aia ‘oku ‘i loto pe ia ‘i he totonu fakalao mo faka-aleapau ‘a e Modulus Pacific pea mo hono ongo kaungā kautaha fekau‘aki kenau tohi kole kiai ‘‘i he malumalu‘ oe Aleapau ki he Petoliume ne fakamo‘oni kiai ‘a e Pule‘anga, Modulus Pacific pea mo hono ongo kaungā kautaha fekau‘aki ‘o fakatatau ki he Lao ki he Keli Petoliume pea mo e Ngaahi Tu‘utu‘uni ki he Keli Petoliume. Na‘e tali ‘a e fakaloloa koe ‘uhi ke lava ‘e he Modulus Pacific pea mo hono ongo kaungā kautaha fekau‘aki ‘o fakapapau‘i ange mo ‘omai ‘a e fakamatala ‘oku updated fekau‘aki pea mo e fenga‘unu‘aki ‘o e kilisitahi ‘o e Fonua ‘o fakafou ‘i hano toe fakahoko ha savea ‘e taha ‘o ngaue‘aki ha ngaahi me‘angaue fakaonopooni. Koe fakamatala ‘oku lolotonga ma‘u ne tanaki mai ia laka hake he ta‘u ‘e 20 kuohili. Koe ngaahi ola fakasaienisi ‘e tanaki mei he ngaahi fakatotolo ‘e fakahoko ‘e he Modulus Pacific pea mo hono ongo kaungā kautaha fekau‘aki tene foaki ha ngaahi faingamalie ‘oku makehe atu mo ha lelei ‘oku toe loloto ange ki hono fakalakalaka ‘o e ngaahi ngaue lalahi pea moe ma‘u‘anga ngaue ma‘a Tonga. ‘Oku totonu ke tomu‘a fakahoko ha ngaahi faka‘eke‘eke fe‘unga ‘e Sione Taione pea mo e kakai hange ko ia ke ma‘u ‘a e mo‘oni‘i me‘a kimu‘a pea toki fai ha tukuaki‘i mamafa ‘o e pehē ‘oku faihala ‘a e Palēmia pea mo hono ‘Ofisi. NGATA‘ANGA Tukuatu mei he: ‘Ofisi ‘o e Palemia, Nuku‘alofa, Tonga. P. O. Box 62, Tel: (676) 24 644 Fax: (676) 23 888; Email: [email protected]
Posted on: Fri, 22 Nov 2013 00:27:47 +0000
Trending Topics
Recently Viewed Topics
© 2015