Patay sa Iloilo kag Antique bangud kay Yolanda, 11 na; 2 bangud sa nerbyos, 1 nag-suicide Posted by Bombo Radyo Iloilo Posted in Ilongo Saturday, 09 November 2013 15:44 ILOILO CITY - Nagsaka na sa 11 ang patay bangud sa paglaslas sang super typhoon Yolanda sa probinsya sang Iloilo kag Antique. Sa Iloilo, isa ang nakuryente sa banwa sang Calinog, isa ang naigo sang galvanized iron ukon sin sa San Enrique, tag-isa ang natumbahan sang puno sang kahoy sa Ajuy kag Dueñas, isa ang natumbahan sang balay sa Brgy. Anabo, Lemery kag isa ang nasapwan nga naga-utaw-utaw sa Suagi River sa Janiuay matapos nalunod. Sa Antique naman, patay ang mag-iloy nga Elvie kag Eduardo Sadhi matapos natumbahan sang puno sang paho sang nagbalik ang mga ini sa ila balay para magkuha sang nakalimtan nga dal-on sa evacuation center. Samtang, bisan nakaluwas sa paglaslas sang bagyo, napatay naman ang duha ka biktima matapos gin-atake sang stroke bangud sa sobra nga nerbyos sa mabaskog nga bagyo. Lakip diri, ang isa ka biktima sa banwa sang Barbasa, Antique nga gin-atake sang stroke bangud sa sobra nga nerbyos sa bagyo kag ang 27 anyos nga si Anabel Estimos sa Brgy. Igtuble, Tubungan nga gin-atake man sang nerbyos bangud sa kahangawa sa kabaskog sang bagyo. Sa banwa sang Barotac Nuevo, sa tunga sang paglaslas sang bagyo kahapon, nagpakamatay ang 22 anyos nga si Jolito Estepona matapos mabilin sa ila balay sang mag-evacuate ang iya mga himata. Ang biktima naabtan na lang nga nagabitay sa ila balay. Samtang, naghiwat na sang aerial survey ang Iloilo Provincial government para ma-assess ang damage sang bagyo sa Northern Iloilo. Lakip sa mga banwa nga labi nga naapektuhan amo ang Ajuy, San Dionisio, Sara, Batad, Estancia, Carles kag Balasan. Ang nasambit nga mga banwa may 70-80 percent nga damage sa mga balay kag halos nagkalatumba ang tanan nga kahoy kag ginpaagi na lamang sa duha ka chopper kag Philippine Navy ang pagpalab-ot sang bulig bangud indi pa masulod ang mga lugar samtang double time man ang Department of Public Works and Highways (DPWH) sa pagkuha sang mga nagkalatumba nga kahoy sa dalan. Sa Brgy. Bay-ang, Ajuy naman isa ka sakayang pandagat ang nakalab-ot sa dalan matapos ginhuyop sang mabaskog nga balod sakay ang 15 crew. Nagdungka ang sakayang pandagat apang nautod ang isa sa lima ka kable sang angkla sini rason nga gindala sang mabaskog nga balod ginabanta 150 metros ang kalayuon halin sa puerto. Nagsaka naman ang tubig sa bahin sang banwa sang Zarraga kag Pototan, Iloilo bangud sa paglapaw sang Jalaur River samtang sa banwa naman sang Bingawan, Iloilo gindala sang mabaskog nga hangin ang atop sang munisipyo, covered gym kag simbahan. Subong nga hapon magasapol na ang Iloilo Provincial government para sa pagdeklara sang state of calamity sa probinsya bangud sa damage sang bagyo. Sa rekord sang Iloilo Provincial Disaster Risk Reduction and Management Office (PDRRMO), yara sa 30,000 indibidwal and nag-evacuate sa probinysa sang Iloilo apang wala diri nalakip ang mga hardly hit areas sa Northern Iloilo. Samtang, ang bulk water supplier nga Flowater Resources Iloilo Incorporated ang nagpanghatag naman sang libre nga potable water sa mga biktima sang bagyo sa nagkalain-lain nga banwa sa probinsya sa diin ang mga luyag maka-avail nga municipal local government unit kinahanglan lang makakuha sang permit sa Provincial Social Welfare and Development Office (PSWDO). Sa siyudad naman sang Iloilo, nakabalik na ang halos 50 porsyento sa 4,000 pamilya nga nag-evacuate apang isa ka estudyante ang missing matapos naglumpat sa mabaskog nga balod sa dagat. Nahibaluan nga naglunsyar ang Bombo Radyo Philippines sang Oplan Kabalaka para sa mga biktima sang bagyong Yolanda sa Visayas kag padayon ang pagbaton sang bulig ilabi na ang pagkaon, tubig, panapton, mga kagamitan sa balay kag iban pa.
Posted on: Sat, 09 Nov 2013 08:42:09 +0000
Trending Topics
Recently Viewed Topics
© 2015