Peter Biaksangzuala hriatrengna inkhel chu December 19, 2014 zan dar 7:30-ah Lammualah khelh a ni dawn a, zan dar 7:15 atangin programme chi hrang hrang neih tan a ni ang. He inkhelah hian Mizoram Premier League champion thar Aizawl FC leh Mizo player tha thlan khawm Peter-a khelhna Bethlehem Vengthlang FC hminga khel turte an intum ang. Indian Super League-a Indian player zinga goal thun tam ber, Jeje Lalpekhlua pawh he hunah hian inlan thei tura beisei a ni a, Mizoram Football Association chuan Jeje club khelhna Mohun Bagan lam an dil tawh a, phalna an pe tawh. Peter-a team Bethlehem Vengthlang FC lama khel tur Jeje chuan, Inkhel chauin zin kual nasa hle mah ila Peter-a pual inkhel hi ka ngai pawimawh a, kan club hotu lamte leh MFA lam an indawr fel tawh a, kei chu Aizawla inkhel turin ka inpeih e. Ka thlawhtheihna ticket a fel theih loh avangin Aizawl atanga Kolkata ka thlawk thei dawn lo a, Silchar lamah ka kual a ngai dawn a; nimahsela Peter-a pual inkhel a ni a, ka Mizopui footballer khelmuala chet sual vanga nunna chân hi ka ngai pawimawh hle a ni, tiin a sawi. Jeje bakah hian ISL-a Mizo player Zodingliana (Adinga) pawh kan hmu dawn a, Northeast United leh Shillong Lajong midfielder Adinga hian Nilaini khan Bethlehem Vengthlang FC hminga khel tur team training a zawm fel tawh. Adinga bakah hian ISL-a Mumbai City FC player Lalrinfela pawh kan hmu dawn a, ani hi Mohun Bagan leh Churchill Brothers-ah pawh lo khel tawh a ni. Peter-a khelhpui thin Bethlehem Vengthlang FC hminga khel tur hi MFA lam chuan a thlang fel tawh. Tunah hian Dinthar FC an zin chhuak mek a, Mizoram Police player thate anni lam hian an pawt nual bawk. Peter-a team lama khel turah hian Peter-a club Bethlehem Vengthlang FC bakah Chhanmari FC, Chanmari West FC, Mizoram Police FC leh ISL-a Mizo player-te an tel dawn a ni. East Bengal atanga ISL-a inlan Lalrindika Ralte, S. Malsawmtluanga leh Robert Lalthlamuana-te chu East Bengal lamin chawlh an pek theih loh avangin an inlan thei dawn ta lo a; Didika chuan, A pawi khawp mai. Federation Cup khel mai tur kan ni si a, kan club-ah kan training tlem si a, club hotu lamin an phal ta lo a ni e. Inkhel tur zawng zawngte duhsakna ka hlan e, a ti. Aizawl FC lam pawh hi MPL aia tha zawk tura ngaih an ni. Anni hi I League Second Division khel tur an ni a, player thar Alfred an nei a, he Liberian striker hi Indian football-a mi challang tak lo ni tawh thin a ni. Tata Football Academy a\angin Toky Zomuanpuia an la thar a, MPL2 best player Malsawmtluanga an kawl bawk. INKHEL EN MAN Inkhel en man hi Rs 50 a ni ang. MFA chuan he inkhela sum lut zawng zawng hi Peter Biaksangzuala chhungte hnenah a hlan vek dawn a ni. Hei vang hian he mi zan hian eng entry card mah a hman theih dawn lo a, MFA, District FA leh MPL club official lam pawhin inkhel an en dawn chuan ticket an lei a ngai vek dawn a, MPL-a card-te pawh gate-a luhna atan hman a remchang lo ang. Inkhel en turte chu zan dar 7:00-a khelmual lut tawh tura beisei an ni. Peter-a team : GOALKEEPER Liansangpuia - Bethlehem Vengthlang FC Lalawmpuia - Chanmari FC DEFENDER Lalrammawia - Bethlehem Vengthlang FC Lalmuanawma - Bethlehem Vengthlang FC Zothanpuia - Chanmari FC Lallawmzuala - Mizoram Police Lalruatthara - Chanmari FC R. Laldinliana - Bethlehem Vengthlang FC C. Lalrosanga - Chanmari FC MIDFIELDER Lallawmsanga - Chanmari West FC Laldingngheta - Chanmari FC Chhanrinpianga - Bethlehem Vengthlang FC Ricky Lallawmawma - Chanmari FC Lalruatdika - Chanmari FC H. Lalmuankima - Chanmari FC Lalruatfela - Chanmari FC Zodingliana - Northeast United Lalrinfela - Mumbai City FC FORWARD T. Lalnunpuia - Bethlehem Vengthlang FC Malsawmfela - Chanmari FC F. Lalrinpuia - Mizoram Police Joseph Lalnunpuia - Chanmari FC Jeje Lalpekhlua - Chennaiyin FC
Posted on: Wed, 17 Dec 2014 11:48:48 +0000
Trending Topics
Recently Viewed Topics
© 2015