Pinay OFW tumalon sa gusali (Noel Abuel) Pinay OFW tumalon sa gusali Patay ang isang Pinay domestic helper matapos na umano’y tumalon sa bintana ng bahay na pinaglilingkuran nitong Egyptian national sa Al Sahmiya, Kuwait. Nagkalasug-lasog ang katawan ni Love Joy Balagat, 28, may-asawa, tubong Maitum, Sarangani. Ayon sa pahayag ng asawa ng biktima na si Nelson Balagat, bago ang insidente ay maayos nitong nakausap ang misis noong ikalawang linggo ng nakaraang buwan matapos itong isama sa bakasyon ng among babae at lalaki. Gayunman, sinabi ng asawa ng biktima na madalas umano itong nagrereklamo dahil sa hindi pinapasuweldo ng mahigit sa apat na buwan ng pagtatrabaho nito simula pa noong Abril. Humihingi ng tulong ang pamilya ng biktima sa pamunuan ng embahada sa bansang Kuwait sa pangunguna ni charge de affairs Lamberto Monsanto na imbestigahan ang pangyayari sa posibilidad na may ‘foul play’. Sa panayam naman ng Abante kay Department of Foreign Affairs spokesman Raul Hernandez, handa umano ang ahensya na tulungan ang pamilya ng biktima.
Posted on: Tue, 15 Oct 2013 07:11:33 +0000