Presentá pa Promé Minister, Sr. Ivar Asjes, na Parlamento di Kòrsou durante e reunion públiko di Parlamento dia 24 di yüni 2013 Señor Presidente, Honorabel Miembronan di Parlamento, Permití mi pa na promé luga, na nòmber di nos gabinete, gradisí Parlamento pa e konfiansa i e honor di por sirbi nos nashon. Nos gabinete lo traha ku alma i kurpa i di un manera profeshonal pa sirbi Pueblo di Kòrsou i logra resultadonan konkreto konforme e “Akuerdo di Gobernashon enfoká riba pas, trankilidat i prosperidat”, firmá dia 12 di desèmber 2012. Kòrsou ta enfrentando retonan grandi ku ta rekerí un aporte i apoyo di kada un di nos ku ta biba aki. Den e kuadro aki Gobièrnu ta hasi awe un apelashon na tur Miembro di Parlamento pa uni forsa i lucha fuertemente pa realisá metanan kolektivo pa nos nashon por prosperá. Ban hasi awe e kompromiso pa huntu krea i fomentá speransa atrobe den nos komunidat pa Kòrsou avansá. Ban demostrá grandesa, madurés i humildat i forma un aliansa fuerte pa, irespekto nos diferenshanan polítiko, logra hustisia sosial di bèrdat pa nos Pueblo. Komo nashon hoben, nos tin ku realisá nos mes ku ta solamente ku unidat, solidaridat i ku trabou duru nos por saka Kòrsou for di e situashon difisil aki i logra e pas, trankilidat i prosperidat ku nos tur komo siudadano ta anhelá. Nos Gobièrnu ke traha huntu ku un i tur pa logra un Kòrsou sólido i stabil, kaminda tur siudadano tin e oportunidat igual pa ta próspero i desaroyá su talento- i abilidatnan individual di forma optimal. Señor Presidente, E último lunanan a tuma sierto pasonan fèrfèlu, pero nesesario. Nos gabinete lo sigui hiba un maneho presupuestario responsabel i sano, pero kombiná ku hopi énfasis riba desaroyo ekonómiko i invershon sosial pa logra adelanto i progreso di Kòrsou di un manera duradero. Nos ta konvensí ku un mihó balanse entre desaroyo ekonómiko-finansiero i desaroyo sosio-kultural ku énfasis kontinuo riba bon edukashon, salubridat, un medio ambiente sano, seguridat i kuido sosial optimal ta nesesario i den e kuadro aki e Akuerdo di Gobernashon pa e periodo 2012 - 2016 lo ta nos kòmpas. Konkretamente esaki ta enserá pa e areanan prinsipal di gobernashon ku lo sigui traha ku tur fervor pa alsa kalidat di nos estado di derechi, mehorá komunikashon di Gobièrnu i fortalesé nos identidat nashonal. E esfuersonan pa stimulá ‘nation building’ ku entre tantu a keda restrukturá bou di e Direktorado di Komunikashon di Ministerio di Asuntunan General lo haña nos atenshon spesial ku un empuhe pa krea un identidat nashonal i fortifiká nos sentido di patriotismo. A base di diálogo lo inisiá i fasilitá tambe e proseso nashonal pa fomentá mas unifikashon i asina realisá un nashon konsiente di tantu su deber- komo su obligashonnan. Un nashon ku ta orguyoso di su identidat propio i su posishon úniko riba mapa mundial. Nos lo analisá i skohe e plataforma di diálogo i e struktura di partisipashon mas efektivo i apropiá pa realisá e meta prinsipal di un Kòrsou salú, konsiente, krítiko, orguyoso di su herensia i determiná pa desaroyá tur su potensial pa logra lo máksimo. Señor Presidente, Gobièrnu lo mantené relashonnan konstruktivo i un diálogo habrí ku partnernan den Reino a base di igualdat i benefisio mutuo i konforme Statüt. Esaki ta enserá ku mester atendé ku e ‘leinan di konsenso’ di un forma diligente i ku firmesa pa bèrdaderamente tin igualdat den Reino i e espasio nesesario pa kada pais por duna kontenido real na su outonomía konforme deseo di su Pueblo. Gobièrnu su bista no ta limitá solamente na e fronteranan di Reino. Meta ta pa tambe fortifiká lasonan di koperashon ku e mundu rondó di Kòrsou, prinsipalmente e paisnan Latino Amerikano i di Karibe. Nos posishon geográfiko stratégiko i nos poblashon multi-lingual ta bentahanan ku nos mester usa optimalmente pa logra hasi Kòrsou un hub logístiko entre nos region i Oropa. Pa loke ta e maneho riba tereno di Gobernashon, Planifikashon i Servisio Públiko lo sigui traha pa optimalisá e struktura i organisashon di e Ministerio pa por alsa e kalidat di servisio ku ta brinda na Pueblo, pero tambe na otro Ministerionan di Gobièrnu. Manera nos tur sa, e Ministerio di Gobernashon, Planifikashon i Servisio Públiko tin un ròl klave pa garantisá bon gobernashon i naturalmente lo kaba di ekipá e Ministerio aki di tal forma ku debidamente e por kumpli ku e tarea importante aki. Aparte di mehorá e aparato públiko, nos lo sigui traha riba e inisiativa pa sentralisá e servisionan di Gobièrnu den un kompleho di edifisio. Lo instituí un ofisina sentral di planifikashon pa asina brinda informashon ku por sostené formulashon di maneho riba diferente tereno. Tambe lo kontinuá ku formulashon di un Plan Maestro pa Kòrsou. Pa loke ta trata e Ministerio di Hustisia, ta un echo ku seguridat físiko di kada miembro di komunidat ta elemental pa por gosa plenamente di nan derechinan humano. Gobièrnu ta konsiente ku mester fortifiká e kadena hudisial pa kombatí e grado i forma di kriminalidat, ku tin nos komunidat den ansha i tenshon, te den su raís. Aparte di pasonan represivo Ministerio di Hustisia lo enfoká riba prevenshon dor di traha estrechamente huntu ku e Ministerio di Enseñansa, Siensia, Kultura i Deporte, e Ministerio di Desaroyo Sosial, Labor i Bienestar i e Ministerio di Desaroyo Ekonómiko pa eliminá mas tantu posibel e motibunan ku ta pone prinsipalmente nos hobennan kai den gara di kriminalidat. Señor Presidente, Danki na e ehersisionan ku a keda hasí, Kòrsou a skor faborabel ku e rumbo ku ta siguiendo pa sanea nos finansas públiko. Gobièrnu su meta final ta pa yega na un situashon kaminda strukturalmente nos finansas públiko ta balansá i ta duna sufisiente espasio pa invertí den desaroyo duradero di nos pais i tambe duna bèk na Pueblo di Kòrsou. Den e kuadro aki lo instituí mas pronto posibel un Kámara Presupuestario. Tambe lo hasi ehersisionan pa reforsá e kuerponan di inspekshon i kòntròl eksistente ku por kontribuí na generá mas entrada pa kaha di Gobièrnu. Ademas lo eksplorá, di un manera inovativo, fuentenan di entrada alternativo pa sektor públiko. Un prioridat ta pa ekstendé nos ret internashonal di akuerdonan fiskal pa reforsá nos sektor finansiero i a la bes nos ekonomia. Gobièrnu lo delineá un maneho general nobo pa kompanianan di gobièrnu basá riba kriterionan di prestashon interno i eksterno. Un aspekto importante di e maneho aki ta e kontròl di gastu i un tarifa mas favorabel, na bienestar di tantu Pueblo en general, komo di invershonistanan en espesial. Tambe lo presentá un maneho spesífiko pa pago di dividendo di kompanianan di Gobièrnu. Pa loke ta e union monetario entre Kòrsou i Sint Maarten nos ke apuntá ku Gobièrnu lo ta firme den su empeño pa salbaguardiá interesnan di nos pais i e balor di nos moneda na promé luga. E punto di salida aki lo ta e guía prinsipal pa yega na un desishon final enkuanto e union monetario aktual. Manera palabrá den e akuerdo di Gobernashon, Gobièrnu di Kòrsou tin tambe komo prioridat pa kombatí pobresa i fortifiká esnan mas vulnerabel den nos komunidat pa medio di un fondo pa deporte i responsabilidat sosial pa asina duna aporte i sosten na organisashonnan ku ta enfoká riba mucha- i hobennan entre 4 pa 24 aña. Señor Presidente, Enseñansa di kalidat ta e fundeshi pa un desaroyo sano di nos Pueblo. Si nos ke pa Kòrsou alkansá un luga mas prominente den mundu, nos mester distinguí nos mes komo un Pueblo moderno, bon eduká i ku a desaroyá plenamente tur su abilidatnan pa por karga su propio destino. Den e afan aki, Gobièrnu lo sigui invertí pa alsa e kalidat i mantené enseñansa liber i aksesibel pa tur nos muchanan. Ademas, lo presentá i ehekutá un programa integral pa renobá estado físiko di diferente skol rònt Kòrsou. Gobièrnu lo presentá tambe un kuadro di maneho mas efektivo pa aloká tur e fundashonnan aktivo riba tereno di enseñansa. A base di un repartishon di tarea bon delineá mester yega na mas efisiensia den funshonamentu di kada fundashon. Kaminda ta posibel, lo integrá fundashonnan ku no ta direktamente útil mas den otro fundashon. Den e kuadro aki lo realisá un Instituto Nashonal di Kultura pa stimulá un mihó noshon kultural. Lo pone tambe èkstra atenshon na e aspekto di repartishon di supsidio i ehekushon di maneho kultural. Un punto di atenshon spesífiko ta realisá e plan pa renobá Sentro Pro Arte komo nos teater nashonal. Pa loke ta deporte, Gobièrnu lo ehekutá e maneho di deporte ku a aprobá resientemente i tambe realisá un Instituto Nashonal di Deporte. Ta imperativo pa kombiná esfuersonan pa oumentá e invershon den deporte di Kòrsou. Pa loke ta trata Salubridat, Naturalesa i Medio Ambiente, Gobièrnu su empeño ta pa alsa kalidat i aksesibilidat na tur servisionan di salubridat públiko. Na mes momentu ta imperativo pa redusí i kontené gastu den e sektor di kuido. Nos ta rekonosé ku introdukshon di seguro básiko por tabata mas efektivo. P’esei Gobièrnu ta trahando riba e lei di reparashon pa e seguro básiko di malesa kuadra mas tantu posibel ku e nesesidatnan real di nos Pueblo, spesialmente nos penshonadonan. Na mes momentu lo kuminsá traha riba un seguro general di malesa. Den e periodo di gobernashon aki definitivamente e plan pa realisá un hospital nobo lo kristalisá. Gobièrnu a inisiá e proseso pa ehekutá e moshon di Parlamento al respekto i entretantu tin un komishon di eksperto enkargá pa deliberá ku Hospital Sint Elisabeth, esta Sehos, pa sondeá posibilidat i kondishonnan bou di kua por yega na un akuerdo pa konstruí e hospital nobo den Otrobanda. Huntu ku konstrukshon di e hospital nobo lo revisá tambe henter e struktura di nos salubridat públiko ku e meta pa en general realisá un kuido muchu mas efisiente na bienestar di nos Pueblo. Tambe lo duna mas importansha na nos medio ambiente i naturalesa. E diskushon riba funkshonamentu di nos refineria ku su efektonan menos favorabel riba nos medio ambiente por sirbi komo un ehèmpel klásiko di e tenshon ku por eksistí entre desaroyo ekonómiko i un medio ambiente saludabel. Gobièrnu tin e intenshon pa revisá nos leinan eksistente, relashoná ku medio ambiente, teniendo kuenta ku desaroyonan teknológiko i e bienestar di nos poblashon. Señor Presidente, Hopi biaha nos mes no ta konsiente di e seriedat di e grado di pobresa den nos pais. Gobièrnu pa medio di e Ministerio di Desaroyo Sosial, Labor i Bienestar lo hiba un maneho di desaroyo sosial basá riba hustisia sosial i inklusividat. Pa enfrentá e problema di pobresa di un forma efektivo nos lo brinda perspektiva di trabou, espesialmente na nos hobennan. Edukashon i empleo ta e vehíkulonan prinsipal pa garantisá bienestar sosial i alsa kalidat i nivel di bida di nos komunidat. Pa Gobièrnu, krea empleo i alsa e partisipashon di nos propio hendenan riba merkado laboral pa medio di lei ta puntonan di lansa ku lo haña atenshon inmediato i kontinuo. Den konsulta ku representashon di dunadónan di trabou i sindikatonan lo inisiá i ehekutá proyektonan i programanan spesial pa stimulá i logra mas envolvimentu tambe di nos hóbennan den e proseso laboral. Ku énfasis riba e desaroyo di nos potensial humano i invershon sosial nos lo prepará siudadanonan pa nan por okupá kuponan di trabou kreá pa diferente proyekto ekonómiko ku Gobièrnu ta bai fasilitá di un forma aselerá. Pa garantisá e partisipashon laboral di nos yunan di tera, Gobièrnu lo ehekutá e lei ‘80-20’ despues di instituí un banko di vakatura kaminda ta registrá nos hendenan sufisiente prepará pa traha i tambe oportunidatnan ku tin habrí pa trabou. Huntu ku esaki Gobièrnu a korto plaso lo hasi e invershonnan nesesario pa reforsá e struktura di kòntròl eksistente pa garantisá ku i un tur ta kumpli ku nos leinan laboral i sosial. Desaroyo di nos barionan ta otro punto di lansa di nos maneho sosial. No por t’asina ku den e Kòrsou di 2013 ainda muchanan ku nase i ta lanta den barionan menos pudiente no tin e oportunidat igual pa un desaroyo personal ku e perspektiva pa tambe por duna un aporte na nos nashon. Famia i bario lo ta e entidatnan kardinal den nos strategia pa yega na un Kòrsou sólido i stabil. Den e kuadro aki tambe lo stimulá mas trabou i aktividatnan di trahadónan sosial direktamente den barionan. Lo aloká fondonan èkstra pa invershonnan sosial ku e meta prinsipal pa alsa kalidat di nos barionan, spesialmente esnan di mas nesesidat. Señor Presidente, Gobièrnu lo bai tuma desishonnan konkreto riba asuntunan ku ta regardá desaroyo ekonómiko. Ministerio di Desaroyo Ekonómiko lo ehersé trabounan dirigí pa realisá un desaroyo ekonómiko aselerá, pero alabes sano i ekilibrá. Den e konteksto aki Gobièrnu entretantu a instalá un komishon Ministerial pa fomentá mas sinergía entre e Ministerionan di Asuntunan General, Desaroyo Ekonómiko, Tráfiko, Transporte i Planifikashon Urbano, Desaroyo Sosial, Labor i Bienestar i di Finansas. E komishon lo identifiká i fasilitá pa tur e proyektonan i programanan sosial-ekonómiko ku tin preferensha, en bèrdat, keda implementá pa aselerá e proseso di rekuperashon sosial i ekonómiko di Kòrsou. Tambe lo duna mas sosten na empresa chikí i mediano ku ta hopi importante pa nos ekonomía. Riba tèrmino korto, Gobièrnu lo instituí e “Curaçao Economic Development Board” ku lo mester fasilitá i stimulá invershon lokal i djafó i tambe eksportashon. Ademas, lo salvaguardiá interes di konsumidó dor di instituí un instansha indepen¬diente ku lo kontrolá i regulá tarifanan i kalidat di servisio. Señor Presidente, A inisiá kaba e proseso pa eliminá retraso di mantenshon di nos kayanan. Lo hasi tambe esfuerso èkstra pa lòs terenonan pa traha kas pagabel pa Pueblo. Ta imperativo pa nos kumpli ku normanan internashonal riba tereno di seguridat marítimo i aereo. Ta p’esei lo reforsá e Ministerio di Tráfiko, Transporte i Planifikashon Urbano pa kabalmente kumpli ku su tareanan di supervishon i maneho. Tambe ta sumamente importante pa tur nos asuntonan aereo i marítimo ta bon reglá komo kiera ku nos ta un isla ku ta dependé di bon konekshonnan aereo i marítimo pa nos sobrebibensha. Retonan ku nos ta enfrentando aktualmente riba tereno di aviashon lo keda atendé di un forma responsabel. Kòrsou lo hasi mas i mihó uso di su posishon geográfiko stratégiko pa oumentá su potenshal ekonómiko i den e kuadro aki tambe ta importante pa nos maneho di tráfiko aereo i marítimo ta di tal forma strukturá ku e ta sirbi nos nesesidatnan ekonómiko. Sinembargo, no ta solamente importante pa tin un komunikashon efisiente ku e mundo p’afo di nos fronteranan. Tambe lokalmente nos mester tin un sistema di transportashon públiko moderno i ku ta dirigí mas pa sirbi e nesesidatnan di nos desaroyo sosial i ekonómiko. Den konsulta ku tur esnan konserní lo yega na palabrashon konkreto pa restrukturá e rutanan di konvoi i bùsnan chikí. Señor Presidente i Honorabel Miembronan di Parlamento, Laga nos ban traha pa konhuntamente stimulá i oumentá nos sentido di patriotismo. E tim di ministernan sirbidó ku ta forma parti di e gabinete aki, lo kumpli ku e deber di traha ku dedikashon i diligensia pa duna un kontribushon signifikativo na adelanto i progreso di Kòrsou. Nos ta trahando riba un programa di gobernashon den kua e intenshon- i ambishonnan ku nos a menshoná lo ser tradusí den maneho i akshonnan konkreto. Kòrsou tin speransa i nos mester avansá. T’esaki ta nos kompromiso i nos ta pone esaki nos dilanti ku firmesa pasobra nos ta kere den nos Pueblo i nos tin tur konfiansa den Kòrsou. Si nos tur uni forsa i tur gremio sera kabés pa traha huntu na bienestar di Pueblo, nos ta konvensí ku nos lo logra pa e Kòrsou ku nos tur stima bira un nashon sólido i stabil kaminda tur siudadano tin e oportunidat igual pa ta próspero i desaroyá su talento- i abilidatnan individual di forma optimal. Masha danki pa e atenshon.
Posted on: Mon, 24 Jun 2013 16:32:53 +0000
Trending Topics
Recently Viewed Topics
© 2015