Promé Minister Asjes lo hiba palabra durante Asamblea General di Nashonnan Uni. Willemstad, 19 di September 2013. Di 23 pa 27 di September próksimo nos Promé Minister, señor Ivar Asjes, lo partisipá na New York na e di 68 Seshon di Asamblea General di Nashonnan Uni. Direktamente despues di su yegada na New York e Promé Minister di Kòrsou lo tin un enkuentro ku e Minister di Relashonnan di Eksterior di Reino, señor Frans Timmermans. E djaluna, 23 di september 2013, señor Asjes lo forma parti di e Reunion di Alto Nivel riba Realisashon di e Metanan di Milenio pa Personanan ku Desabilidat i tambe lo e ta presente e atardi ey na e desvelo di e diseño ganadó di e kompetensha internashonal pa e monumentu na Nashonnan Uni pa konmemorá viktimanan di esklavitut. Dia 24 di September 2013 e Promé Minister di Kòrsou entre otro lo presensha e diskurso di Presidente Barack Obama frente Asamblea General. Durante di su bishita na Nashonnan Uni Premier Asjes tambe lo dirigi su mes na e Foro Politiko di Alto Nivel riba Desaroyo Sostenibel, kual foro ta forma parti di e Asamblea General di e aña aki. Na New York señor Asjes lo topa tambe e Sekretario General di Nashonnan Uni, señor Ban-Ki Moon. Ademas e programa di Promé Minister Asjes ta kontene enkuentronan bilateral ku Promé Ministernan i Ministernan di Relashonnan di Eksterior di diferente pais di nos region, entre nan: Trinidad & Tobago, Barbados, Republika Dominikana, Repúblika di Panamá i Saint Vincent and the Grenadines. Premier Asjes lo asisti tambe na un desayuno di alto nivel riba e asina yamá ‘small island developing states’, esta islanan chikitu den desaroyo. Un enkuentro ku Sub-Sekretario General di Nashonnan Uni enkargá ku entre otro paisnan chikitu den desaroyo, señor Gyan Acharya, tambe ta riba e programa di e Promé Minister di Kòrsou. Finalmente riba invitashon di CARICOM Promé Minister Asjes tambe lo asistí na un reunion di e Ministernan di Relashonnan di Eksterior di CARICOM.
Posted on: Sat, 21 Sep 2013 01:53:06 +0000
Trending Topics
Recently Viewed Topics
© 2015