QUESTA E’ UNA POESIA A “POLISTENA” DEL MAESTRO FRANCESCO LARUFFA (Roma 8 aprile 1969) Polistena mi pari ‘na riggina Seduta ‘ntra nnu tronu d’olivàrri, lu suli chi tt’abbàsa la matina ti ggita e ppoi si jetta ‘ntra lu mari. ‘Nu mari chi ssi pigghia cu li mani, cu nn’acqua chi nnui sulu possedìmu, guardando ‘ntra li timpi e ppè li chiani lu Stròmbuli ti pari cchiù vicinu. Nescìru ‘ntra li casi di ‘na vota, cu vvecchi ceramìdhi cumbogghiati, li figghi meritìvuli di nota, pè rricchizza di ‘ngegnu menziunati. Cannata, Scerbu, Rodinò-Tuscanu. Morani, Marafioti e Valensisi, Jeraci chi ddi marmu cu la manu Fici stàtui parlanti a li pajisi. E nno ppe nnenti nominàmu a ccasu Parlatu e Niglia, e Filipu dottùri Chi ti caccia li mali di lu nasu E ddi la gula sana li dòluri. Avisti puru, comu Carcaterra, giùdici onesti, prèviti e prelati chi vvìttaru la luci ‘ntra ssa terra, chi onùranu lu locu undi su’ nnati. Chi ffigghi chi spuntàru a ssu pajisi! Burgisi, li Tigani e Raguseu e ttanti e ttanti chi nno sugnu misi pecchì no vennu a lu penzèru meu. Rigùgghiu fusti di ‘na maistranza: forgiàri, falignami e custurèri parrèra mu ti chiamanu è l’usanza di ‘ngegni tantu nòbili e sinceri. Pè stemma nd’ai ‘na turri smerlettata, ‘na cerza chi a la forza t’abbicìna, si’ ddi lu Jerapòtamu vagnata, mu ti proteggi nc’è Santa Marina. Chi mmeravigghia chidha tò affacciata Chi decantau lu sindacu Manfrè, “Chianu da ‘ Trenità veni chiamata, vista cchiu bedha a nnudha vanda nc’è! Quantu cunsùlu è verzu yia tornàri A ccui ti fu luntanu pe ttant’anni, pari ‘nu sonnu…si torna contrari, scumpàrinu li peni cu l’affanni!...
Posted on: Wed, 03 Jul 2013 20:50:24 +0000
Trending Topics
Recently Viewed Topics
© 2015