RAILWAY BUDGET PHARH A NI 9) July ni 9, 2014:Kum 2014-15 atana ruahman Railway Budget chu nimin khan Railway Minister DV Sadananda Gowda chuan Parliament ah a pharh. Nimin Press Information Bureau Aizawl-in thuchhuah siamin, Railway Budget pharhna ah hian Railway Minister chuan rel chuanman tihsan anih loh thu a puang a, Indian Railway te chu tih changtlun tum a ni a, kumin budget ah hian ram chhung leh ram pawn atangin Indian railway hmansawnna turin ruahmanna siam tum a ni a ti. Hmarchhak state-a rel tam zawk a tlan theih na turin sum tam zawk pek tum anih thu Minister hian a puang tel. Railway Minister DV Sananda Gowda chuan Rel him zawk neih anih theih nan he Budget ah hian tunlai khawl tha leh changkang te chu hman tum a ni a, rel chetsual chhan chhuina tur leh kawng thar leh tha a awm theih nan ruahmanna siam tum a ni. Hmeichhe passenger te an himna turin Railway chuan hmeichhe constable 4000 a la dawn bawk a, heng te hian hmeichhe passenger te chu an awmna hmun turah an dah thlap zel ang. Information Technology pawh changtlung zawka hman tum a ni a. Railway Reservation System chu Next Generation e-Ticketing enkawlnaah dah a ni ang a, rel tan chhuina tur leh a chuangte mobile ah theuh Wake Up Call System te pawh dah tum a ni. Hei bakah hian A-1 leh A category a chuangte tan Wi Fi Service dah tum a ni bawk. Kum 5 chhungin Indian Railway office zawng zawng te chu IT hmanga thuam that, paperless office ah siam tum a ni bawk. Budget pharhtu Minister hian kum 2014-15 chhungin rel thar 58 siam tum anih thu a sawi a, tlan lai mek zinga 11 pawh thuam thata tih changtlun ani dawn tih a sawi bawk. Tunah hian zirchianna tum 28 neih zawh tawh a ni a, kawng thar siam tum a ni a ti. Railway Budget-a chhut lawk dan chuan kumin 2014-15 chhung hian Railway chuan cheng vbch 1,64,374 a lalut dawn a, heng zinga vbch 1,49,176 chu hman chhuah ani anga kum kalta aiin za ah 1 a hlawk rin a ni, Press Information Bureau thuchhuah chuan a ti.
Posted on: Wed, 09 Jul 2014 01:06:07 +0000