RALTIANG I KAI VE ANG (Chhunzawmna) Khawtlang thil bawk hian min kap tlat mai. Khauphâr hmuam an sawi ang mai hian min kamki tuk mai. Mahni ta anga en leh lutuk kan awm thin niin a lang. A hmanna tur remchang kan neih chuan làk mai pawh hnial lo kan awm mai thei asin. Mahse, Ram leh Hnam hmangaihtu kan la ni tho tho. Tawngkamah chuan. VANGLAI Lukhum hmaireh leh mawza lum neia kan lungawi hun, kan tar hunah chuan, vanglai hun hmang fuh lote chu kan khawro hle mai thei a ni. Chu mai chu a la ni lo. Ka pa hi alawm, eikhawpah chauh a lungawi a. Tia tû leh faten min melh hunah chuan inchhir a sawt lo nasa dawn ania. Kan chawm seilen, kan fate ngei ngei pawn min hrâwk ngam hun, kan khuh rik chhuai chhuai hunah chuan, Zoram hmangaih teh vût hian awm zia a nei tam dawn lo. Ram tan Martar hûam ngawt mah ila, Martarna hmachawn turin kan penchhuak thei tawh lovang. Awmhmuna Vanglai hun thangtharte sawikhum chiamin Ram a ti changkang kher lo bawk ang. Vanglaia In-sakah kan tû leh fate chentîr mai i tum ang u. Dik thei, dik lo thei awmkhawmna Ram a ni ve miau mai si a; Dik lohna bulah dikna a awm a, pen tam a ni lo. Vei lam tan ding lam banphak a ni a, ding lam tan pawh vei lam chu banphak a ni thin. Mahse, Ram leh Hnam bikah chuan a ni ta lo em ni? Dikna ban pha lovin, dik lohna kan tham ta chat chat ni berin alang. Zoram tan Kutbùl bân sei kan ni ta mai long maw!?. KHAWIAHNGE RALTIANG RAM CHU Sapram pawh khu Zoram tan chuan raltiang ram a ni ngei mai. Mahse, zuk pemthla vek ang u tih chi a ni lo. Thlengthla tur pawhin tangka a ngai tam lutuk tlat. Thleng zo lo tam tak kan awm dawn chiang sa. Kei phei chu a baa in-eisen thin, chengsawm ba pawh thlahnih hnua cheng nga cheng ngaa rul thei hram ka ni leh nghal. Silchar thlen pawh a huphurhawm lutuk. Chuti anih chuan raltiang ram kai lovin Zoramah hian ka awmhlum thak mai dawn em ni. Ram dang thenkhatte chuan an ram chhuahsan miah lovin raltiang an lo kâi daih tawh alo ni. Mimal nun atangin chhungkuaah, chhungkua atangin khawtlangah. Khawtlang atangin Ram tan an inchingfel thin a lo ni. Changkanna thilte chu nei leh nei lovin an bawh ngai lo va, thawhrimna leh rinawmna, dikna an nunpui miau avangin, dinchhuahna tura hmasawnna tha leh changkanna thilte chuan a bawh zawk thin. Keini Ram ve hi zawng, a ler atangin ka thuai a, kung tha kan duh leh lawi si. Dikna leh taimakna kung chu a zung atangin rinawmna thlantuiin chawm ila, tichuan, rah duhawm a chhuah ang a, felfai takin kan dingchhuak ngei ang. Tichuan, Ram changkang tak taktena min kâisan, Raltiang Ram chu Mizoram chhung ngeia awmchung hian kan kâi ve tawh dawn a ni.
Posted on: Sat, 30 Nov 2013 14:43:16 +0000
Trending Topics
Recently Viewed Topics
© 2015