RAM HMASAWNNA TURA RUAHHMAN THA (Presbyterian Kohhran Nilai zan Jan 14, 2015 sawihona) Chhinga vengthlang Presbyterian Kohhran a lawi kan ni a, kum 5 vel kaltaah khan Dawrpui thlanmualah kan kohhran hmalakna in thing phun a ni a, tunah chuan ral atang pawhin a ngaw khup tawh a, hei hian Mizo zingah Kohhran pawhna a nasatzia a lantir chiang hle in ka hria. A chhan chu kan tleirawl tirh atangin Dawrpui thlanmualah hian kum tin tih mai turin June thla bawr hian thing YMA in kan phun thin a, a dam khawchhuak zo ngai mang lo a, sikul naupangte kan mawh chhiat vel mai mai thin a, tunah pawh sikul naupang chu anla awm reng tho a, Kohhran thingphun chu engvanga dam khawchhuak bik nge tih chu sawi tam ngai lo in alang ruak. Chuvangin kan ramin hma a sawnna tur chuan Kohhran hian tih tak zeta ruahmanna tha kan siam a ngai a, chutiang siam tur chuan kan thlarau mi nihna nun te pawh hi kan thlakthleng a hun tak meuh tawh a, ram hmasawnna tha leh dik kawng zawh zawnga kan kalpui a ngai tawh a ni. Zirlai hmasaah khan tlem ka sawi zawk tawh a, Bible lam mithiam ten Nazareth Manifesto an vuah tak, Luka 4:18-19 mawlh mai hi ram hmasawnna tura ruahmanna tha siam nan chuan a pawimawh ber a ni tih sawilan loh theih a ni lo. Hei hi Mizoram hian nun khawchhuakna thupui berah hmang ila, Bible lam mithiam te pawh hian helai chang hmanga ram hmasawn tawh te hi kohhran mipui min zirtir uar se ava duh awm em!. India sorkar laipui a ni emaw, Mizoram sorkar emaw in ram hmasawnna tura ruahmanna a siam te hi Kohhran ho hian a bingin zir ila, zir sa tliah ni lovin thlaraumina nen nunpui ila, mithiam ten ram hmasawnna tura ruahmanna an siam te hi Synod Social Front hian kohhran tinah tih takzeta zirtir tur hian an puanven sawichhing se, tichuan chhandamnna camp kan uar ang tluk zet hian Sorkar lam mithiam ten ram hmasawnna tur mipui tana ruahmanna a siam te hi camping chhawng li chhawng nga kan nei ang hian neiin zir mup mup mai ila, hlawhtlinna dik tak chu Zoram mipui hian kan hmu mai ang tih beiseina nen hun rei tawh tak atang khan ka lo thlir tawh thin a ni. “Pathian hnathawh Bible a kan hmuh tam ber chu he khawvela mihringte leh thilsiam dangte tan a ni a; chung zingah pawh chuan mihringte nun phuartu leh khawsakho dan relna bulpui politics hi a luhchilh nasa hle. Bible bung tir ber atangin Pathian Thlarau mizia leh a hnathawh kan hmu nghal a, chu Thlarau changtu apiangte chuan a mizia leh a hnathawh chu an changin an chhunzawm nghal zel thin. Pathian inpuanna famkim Isua Krista meuh pawhin thlaraumina ze hran a nei chuang lo va, Thuthlung hlui atanga kawng tam taka inpuang tawh Pathian Thlarau hnathawh chu a rawn chhunzawmin a tifamkim mai a ni. Mizote hian kan thlarau mi-na hi Bible zirtirna eng atanga kan inbih chian a hun ta hle mai. Bible a Pathian Thlarauin a luah thin, Israel thlahtu leh roreltu te, lal te, zawlnei te leh Isua Krista meuh te ai pawh hian kan lo rau zawk palh mai ang tih a hlauhawm hle. He khawvel hnualsuat zawng leh ngai nep zawnga inthlarau mi siak chiam ai chuan, he khawvela sualna leh bawlhhlawhna chi hrang hrang, mihring nun tihnawktu leh tichhetu siam dik zawnga tan lak hi Bible in THLARAUMINA kawng min kawh hmuh chu a ni. Pathianin duh taka a siam khawvela dikna, thianghlimna, intluktlanna, zalenna, remna, inhmangaihna leh rorelna dik te a lo awm zel theih nan Pathian Thlarau chuan min hruai zel rawh se.” ti a Rev.Dr.K.Lallawmzualan, Christian Spirituality and Politics tih bu, Aizawl Theological College 34th Annual Magazine 2013-2014 ah a ziak hian a tlang kan tlip leh ang e.
Posted on: Mon, 12 Jan 2015 15:55:34 +0000
Trending Topics
Recently Viewed Topics
© 2015