RONALDO GOAL 2 NEN SUPER CUP 2014 Cristiano Ronaldo goal hnih hmangin Real Madrid chuan Sevilla an hneh a, Uefa super Cup 2014 an chawi ta a ni. Mahni khuaah ngei Gareth Bale chuan Uefa Super cup a chawi a, goal khung lo mahse Ronaldo goal hmasa zawk khung nan mawi takin a siam a ni. He match-ah hian James Rodriguez leh Kroos te an inlan nghe nghe. Real Madrid hi Champions League champion lai an ni a, Sevilla hi Europa League champion lai an ni. Alonso chuan Uefa Super Cup hi a khel ve thei lova, Champions League final-a a khawsak dan vangin UEFA chuan an hrem a ni. Real Madrid 2-0 Sevilla Ronaldo 30, 49 Real Madrid : Casillas, Carvajal, Pepe, Ramos, Coentrao, Modric, Kroos, Rodriguez, Bale, Ronaldo, Benzema. Sevilla : Beto, Fazio, Fernando Navarro, Pareja, Coke, Krychowiak, Daniel Carriço, Suárez, Vitolo, Vidal Parreu, Bacca. Inkhelh tan atangin a hmuhnawm nghal em em, Real Madrid hian chance hlauhawm an nei hmasa. 14th mins-ah box pawn chiah atangin Ronaldo chuan free kick a hlawh chhuak a, Ronaldo chuan petin, a goal teuh hle. minute 20 an khelh tlin hmain Bale chuan goal khungna chance tha zet a nei. Mual veilam sir atanga James Rodriguez cross tha zet chu Bale chuan petin, Sevilla keeper Beto chuan tha zetin a lo dang hman hram a. Darkar chanve an khel tling tep, mual dinglam sirah Benzema chuan ball tha zet a dawng a, box lamah a tlan luh pui a, Ronaldo tan tha zetin a pe, Ronaldo hian box chhung atang chuan a pet goal tawh ngei dawn emaw tih laiin a hnampui Beto chuan a lo save sak a. 30 mins a ni a,mual veilam sir atangin Gareth Bale chuan ball tha tak a vawrh a, box chhunga Ronaldo chuan mawi zetin a lo pet goal, si khat faiin Real Madrid chuan hma an hruai. Sevilla chuan an si phurh an rul nghal teuh kher mai, Real Madrid defending a buai deuh nak a, Daniel Carriço chuan hnai set sawt atangin a pet a, mahse Casillas chuan tha zetin a lo dang hman. Half time thlengin goal dang a lut lo, 30th mins-a Ronaldo goal chu team hnih danglamna a ni.Second half tan a ni a, 49th mins-ah Benzema chuan Ronaldo tan ball tha zetin a pe a, Ronaldo hian pen 15 vel lek atangin kawh em emin a pet goal, si hnih faiin Real Madrid chuan hma an hruai a. Hemi hnu deuh lawk hian Ronaldo ball pek tha zet chu Benzema chuan dawngin, a shot a, Beto chuan tha zetin a lo dang hman a. 70 mins an khel tling tep tihah Bale ball tha zet chu Rodriguez chuan dawngin, a shot nghal a, mahse hei pawh hi Beto chuan a lo save hman. Goal dang a lut tawh lo, Real Madrid chuan Ronaldo goal hnih hmangin Sevilla 2-0 in an hneh a, 2014 Uefa Super Cup an chawi ta a ni.
Posted on: Wed, 13 Aug 2014 13:30:00 +0000
Trending Topics
Recently Viewed Topics
© 2015