"RUANG KAL THEI" Chak fahran mai a Karizma senduk rawn lîm thla puat puat mai chuan, Repuplic veng kawipui tak mai a nula chhe lo zet mai inkhai bäwr lâk chunga kawng kan tur chiah chu a rawn tai thawi thuak a. Chu nula thil khai chu leiah a baw darh nghal chuai bawk a, a thlang deuh metal road a tyer thlä lang ruak khawpa chiang chuan bike chu a ding chík nghal tuarh bawk a A helmet full face chu muang changa phawkin chu bike khaltupa chu a rawn hawi let a. Hlauhthawnna, thlaphanna leh zahna ina a tuam vel,hmanhawh tak sia a thil baw darh nuai mai lo chhar khawm mek nula awmna lam chu muangchang hian a rawn pan chho chhat chhat a. Nula awmna a rawn thlen chuan nula chu rawn hawi chhuakin an mit leh mit chu a intawng ta siah mai. Chu nula chuan a mit chu a la sawn rang ngei mai. "Pawi ka ti hle mai, ka tihpalh takzeta ni. Na i nei em?" Chu nula hmai chu zaha vangin a sen tan tan a. "0h..aih,a ngai lo engmah ani lo, keima ih... Keima thiam loh a ni..." A ti bah niaih a. Chu tlangval chuan a chhar khawm pui mawlh mawlh a. An chhar zawh chuan nula chu a rawn din hnaih a. Chu nula erawh chu kal nghal mai tumin a inher thung a. "Na i nei lo tak tak maw? Ka hmanhmawh deuh vang a nia. Ka tihpalh liau liau a ni." "Aih nei love. Engmah na lo." "Khawia kal tur nge i nih a?" "Ih..ka haw dawn Salem vengah.." "E, a nih chuan inveng chu ka kal tlang dawn a lawm. Ka rualin rawn kal ve nghal ta che..." "Aih a ngai lo. Ka lawm e." "Engah maw? Lo kal rawh, min hlau em ni a?" "Aih chutiang lam pawh a ni lo. Ka lo kal lo mai ang, ka lawm lutuk." "Lo kal rawh a remchang a lawm, bakah thupha chawi nan hrim hrim pawh ka duh a lawm.." "Angai lo...ka lawm lutuk." Rei ngial an insawm hnu chuan an inphur ta nge nge a. Kawng lakah chuan ngaihdam an indil loh leh thupha an inchawi chhawk kawng tluan a. Chu chu a ni Puia leh Maduhi e intawn dan chu. Chumi ni a tanga thla li a vei leh meuh chuan Puia leh Maduhi te chu an inhmangaih tawh hle. Nitin zantin an inbia a, tawngka a an inbiak loh pawhin text massage leh fb kal tlangte in englai pawhin an inkawm reng a. Inbe lo chuan an awm thei lo emaw tih tur hial khawp a ni ta. Puia chu 3th battalion MAP a nih a vangin Mualpuiah a duty thin a. An awmna a inhlat loh a vangin hmuh pawh an inhmu ngun hle a, an inngaiin an rinawm dun bawk a, tudang mah ngai lovin an inkara hmangaihna lo tiak chu an chawm nung dun a, chu hmangaihna par zu thlum tak chu engmah dang lungkham lovin an tlan dun ta a ni. Kum khat zet an inzui hnu chuan pumkhata insiam zai an rel ta a, tichuan an thiante thik tham hat khawpa ropui leh hlimin "Tiam tlat e..." an ti dun ta a ni. Nupa inhmangaih leh lungrual tak niin hlim takin chhungkua an din a. Fanu duhawm tak mai Esi an nei bawk a, an hlimna chuan a vawr tawp tak meuh meuh a thleng awm e. Mahse, hun leh ni te hi an dan pangngai tein, ahun teah lo thlengin liam leh thin mahse, hringnun erawh a kal ngai rengin a kal thei si lo. Chu chu mihringte nihna leh dinhmun a ni miau si a. Puia chu Police ngang a nih avangin hmun hran leh khaw hrang hrangah an pute chuan an sawn lo thei bik si lova. Chu chu a nun chhiatna lo intan dan chu a ni Tichuan chhungkua chu an awm hrang ta a. Uap loh nun, phuartu awm lo, nun zalen chu Puia chuan a hmang thiam seng ta bik ngang lo a ni mahna. A taksa leh pumrua a hleitlingin a hmel a chhe si lova, thla tin hlawh nei ngat leh lirthei nei bawk si chu, pa a ni tih hrereng tan pawh chuan nep har tak tur a ni ve reng a ni. Maduhi nena an inneih hmaa zuin ve zeuh zeuh chauh thin kha, tunah chuan zungawlvei dik tak a lo ni ta! Chu chuan thinramna, ngaihsamna leh hmeichhe laka inthlahdahna a nunah chuan a thlen a. A kalna leh awmna hmun a piangah chuan ngaihzawng a nei ta zel zul mai le... A hlawh a chhungte thawn chu sawi loh, a mah ngei pawh chuan a tla ta lo. A awmdan leh mizia chu thup reng theih a nih tak loh a vangin ralkhat a tang pawhin Maduhi chuan a lo hre ve ta mai le! Engtin tak ngai ang maw..? A tawpa tawpah zawng a khawsak dan leh a nungchang tha lo tak avang chuan an pute chuan Puia chu Aizawlah bawk an sawn leh ta nge nge a. Tunah chuan mahni inlum a tang ngeiin a hna chu a thawk leh thei dawn ta. Mahse, hmana an hlimna inchhung kha tunah chuan hlimna ten mual an liam zo ta! Tahna leh lungngaihna in a lo ni zo ta. Lungngaihna leh tahna chuan thla a zar a, hlimna ni êng chuan chu in chu a rawn chhut lut ngai ve ta lo... Hlim nuiri hriat tur a awm lova, thinur au rawl chu englai pawhin a thang khawk rum rum reng ta! Tukzan tha an nei ngai ta lova, Puia awm hun chu inhauh hun a ni tawp mai. Eng hunah pawh chhuak se, a lo hawn hun chu zan reh, mi zawng zawng mut hnu a ni a. Puia tan erawh chuan thinrimna tur zawn hun chiah a ni ve thung si! Ruih loh lai leh harhfim lai a nei lova, thinurna tur a hriat zawng zawnga a inhrikthlak zawhah thik tur leh Maduhi kutthlak na tur remchang chu a zawng char char thin. Kut tuar loh zan Maduhi chuan a nei tlem ta ngei mai. Hmun hrang hranga angaihzawngte phone-in a be reng a, a nu leh pa, a chhungte leh a nupui Maduhi awm lai ngei pawh chuan a pawisa zo ta lo. Thil hoteah thisen chhuak khawpin Maduhi chu kuta thlak ngei ngei a. Maduhi hma hun chu a va thim ta em! Chu mai ni lovin a ma fanu ngei mai Es-i pawh chu a fanu a nih a ring ta tlat lo, chu tluka Maduhi tana thinlung natna tur chu a awm dawn chuang em ni le? Eng hunah pawh lo haw se, Maduhi chuan a pasal chu zah leh duat takin a lo dawngsawng vat vat a. Mahse, chu chuan Puia chu a ti lawm zo chuang lova,kutthlak a tawrhna tur laka ta a chhan zo chuang hek lo. Maduhi taksa leh rilru chu a retheiin a rim takzet a, mahse chhel takin a tuar hram hram thin. A mah a lo chhanna lamah Puia nau, tlangval leh puia chu an insual zantin deuh thaw a. An sirah hlau leh khur zawih zawihin Maduhi chuan a lo thlir thin a. Hmeichia a zawnga hmeiche zaidam leh nunnem, mize zawi leh zakzum, zantina a thil tawn leh hmachhawn a tan chuan a rapthlakin a va na lulai em! Maduhi chu a pasal tan nupui a tling zo ve lova, a pasala châk changa pianga a inhrîkthlakna hmanraw pa khat ve mai chauh a ni ta! A duhtawka ngah hnuah khumah pawh mut tir a phal ngai lova, room chhuahsan phal bawk si lovin room kil khatah Maduhi te nufa chu an ding tlaivar thak thak thin a, Puia zurui lah muhil tak tak thei si lovin a rak zankhua thak thak mai si. Nufa vanduai chu an va ni tak em! Maduhi thian thate chuan Puia chu then mai turin an ngen lawm lawm a. Mahse, Maduhi chuan an inneih thutiam chu mihring hma mai a tiam an ni lova, Pathian hma meuha tiam an nih avangin Pathian hmaa a thutiam bawh chhiat ai chuan a taksa leh nunna chuan tuar zawk mai rawh se tih chu a ngaihdan a ni tlat si a. Engtin tak awmzel ang maw? Maduhi chuan a pasal tan dilin theihtawp tak meuh meuhin tawngtai sak thin mahse, Puia nun chuan ziawm lam aiin zual lam a pan zel si a. Beidawnna chhumpui chuan Maduhi thinlug chu a rawn bawm ve fo thin. Chutiang hunah chuan Maduhi chuan an nunhlui leh hlimlai mualliam tawh hnu, a nulat lai leh anin ngaihzawn lai te, an intawn tan dan te chhui kirin a mittui chu a tla fo thin a. A chang chuan thih daih maitea duh rum rum thin. Maduhi chuan chaw a ei thei lova, a mu ngai hek lo. A taksa chu a cherin a däng var pep mai a. A chauin a zawi em em mai bawk a, ataksa mawina leh ahmelthatna te chuan mual an liam zova, mihring damlai hmel pawh a pu tawh lo. A rilru hahna leh thinlung rumna te, a taksa hliam tuar reng maite avang chuan minung hmel pawh pu thei tawh lovin, RUANG KAL THEI ang mai a lo nizo ta! A fanu hmangaih em em Es-i pek tur hnute tui tak ngial pawh a nei ta lo. Nausen duhawm leh chum biang mai ni thin Es-i pawh tunah chu cher ria thâl mai a lo ni ta a, hmeichhe naupang nuih heh leh lawmawm ni thin pawh kha tunah zet chuan tapbelh leh lawm nuih zawh rual a ni ta lo. Hmangaihtu nu tan chuan ava na dawn em! A malchunga a fanu duat leh hmangaih em em, cher leh sam thur bem mai, hnute tui awm lo fawp dek dek, fawh chhuah tur awm si lo hrilh hai hmel chu Maduhi chuan lainat takin a thlir vawng vawng a. Lo thanglianin lo nula ve pawh nise, amah anga pasal vanduai nei a,hringnun a rawn hman ve chu khawvela a thil hlauh ber a ni lo thei ta lo... Zan dang ang lo takin Maduhite nufa chu an tui takin an muhil ve sêk sêk a. Room kawngkhar rawn ri bur thawmah chuan an mutui lai chu an phu nasa dun kher mai! Thawh phan awm miah lovin Maduhi chu a tho nghal zawk a. Es-i erawh chu a muhil zui leh nghal mai a. Room kawngkhara Puia leh hmeichhe pa khat lo ding dun a hmuh chuan Maduhi chu a phu nasa kher mai. Mak a tiin a hamhaih takzet a. "Upui..." ati chhuak thei hram a. Mahse, a chhanna dawn chu tawngkam ni lovin kuttum bawk a ni leh ta! Maduhi bek chu a ri no chawk a, paih ang thlawrh hian chhuatah chuan a hlawm nawk a. Puia chuan duhtawk mai lovin a samah chuan a rawn tham tho a, bang deng dawt khawp chuan a namthlu leh ta a. Maduhi nati lutuk chu tah pawh a tapchhuak thei lo hial a. Amittui erawh chu dan rual lohin a dir nghal zung zung a. An thawmah chuan khuma mu Es-i chu rawn harhin a rawn tap chhuak that that a. Puia chuan khum lam chu panin a pai phei tuang tuang a. Dimna tel hauh lo hian naute bân bulah chuan manin a khai kang ta a. Es-i chu a tap nghal tuar tuar a. Chu ve leh Maduhi chu thei leh thei lo hian a rawn tlan hnai vat a. Mahse, Puia chuan lo nam per lawp pah hian, "Rawn kal hnai vaih teh, he nau hi ka vawm a ni mai..." a ti ta chher chher mai. Maduhi mangang leh thlabär lutuk chuan awm ngaihna rêng a hre tawh lo. Puia chuan a tih duh tak tak mai a ring si a. A kal hnaìh luih chuan a tihnat phah zawk ang tih hlau siin a khur zawìh zawih a. "Upui...upui, khawngaih takin dah rawh i fanu kha, nangma fanu ngei a nia sin. Chu chu ka nunna chhalin ka sawi ngam...upui, khawngaih takin ka naute kha tina lul suh aw, dah hram rawh upui... I duh leh keimah hi i duh tawkin min sawisa zawk rawh. Upui...upui..."tiin a tap zawïh zawih a. Mahse Puia chuan Maduhi thusawi chu pa khat mah a ngaithla lo. Naute chu enin, "Nang hi, ka fanu i ni lo. I hria em chu chu? I hria em?" a ti tuar tuar a. Es-i chu a tap vawn vawn a. Room kawngkhar a kawi fahran mai a lo ding bu lâwk lâwk nu chuan, "Ka rin ai daihin i lo pa ve dawn a nih hi my dear..i tih tak tak ngam pawh ka ring lo a sin male..." a lo ti buh nuaih a. Puia chu a lo nuih sâwng bawk a. Puia chuan pai tuang tuang chungin naute chu tukverh lam a pan pui a, tukverh kalhna chu hawngin tukverh zawnah chuan naute chu a khai ta a. Maduhi lam chu hawiin, "I rawn hnaih vaih chuan, i hrethiam em?" a ti khur khur a. Maduhi chuan en pawh a en ngam tawh lo. "Upui...upui, engthil nge maw i tih tak le? Khawngaih takin ka..." a tih lai tak chuan Puia chuan naute chu a thlah ta..! A awrawl tawp tak meuh hian Maduhi chuan, "Bawihteee....." a ti ruah ruah a. Maduhi chu a khur zawih zawih a, che lo chang loin a ding reng a, a melh ngai chu a melh ngawt ngawt bawk a. Mahse, a mit chuan engmah a hmu lo tih a hriat hle a. Ding chungin a thi dang a ni ber ang chu. Puian, "I duh leh i fanu chu zuk zui ve nghal rawh," tih paha a beka a rawn vuak chuan Maduhi chu a ti harh zawk a. Mahse, a fanu tlakna hmunah ni lo, chhuat daiah chuan a tlu zawi hnawk a. A beng, a hnar leh a ka a tangin thisen a rawn chhuak nghal zawih zawih a. Chumi zana an thawm hria a rawn tlan lut ho chu an va tlai teuh teh lul em! Minute 5 pawhin damdawi in chu thlenpui tlai se chuan Maduhi te nufa nunna chu an chhan hman an rin loh thu doctor-te chuan an sawi uar kher mai... Damdawi in khum pakhatah chuan nufa vanduai leh khawngaihthlak Maduhi te nufa chu inkuah rialin an mu dun a, an rilru leh taksa chuan na leh hliam tuar mahse, tun ang reng renga thlamuang leh thinthi a an mut lohna chen a va rei tawh em! Mahse, tunah chuan thlamuang takin an muhil ve ta siai siai e. Inchhirna leh pawitihnain Puia chu a khat a, mahse chu chu a sawt tawh chuang si lo. A taksa zu ei chhiat, a thil tih leh nun dan chu mangchhia mai ni zawk se a va ti teh lul em! Mahse a tak ngei a ni si. Thih a duh ber a, mahse a ruattu in a hun a tih hma chuan a thi mai thei si lo. A nunsual leh a nupui fanau chunga a thil tih chuan a damchhungin a nun a vaw let tawh dawn a. Taksa alawi pawh nei tawh lo, minunga chhiar tel ve tlak pawh ni tawh lo, thi thei bawk si lo, lungngaihna leh hrehawmna tinrengina a bawm khah Puia chu thi si lo dam si lovin RUANG KAL THEI mai niin a hringnun chawhnu lam zawng chu tanin thimah a hmang ral ta... Tlai ni tla tur sen phût mai chu damdawi in tlang a tang chuan Maduhi chuan a fanu Es-i pawm chungin a thlir vawng vawng a. A fanu hriat tham lek chuan, "Bawihte, pa i nei ve ta lo... Upui, dam takin mangtha aw.." a ti chhuak sap a. Es-i chuan anu thusawi chu hrethiam ve niawm tak hian Ni tla liam ruai ruai chu a bye bye ve lauh lauh a. Mittui tling pam chung chuan Maduhi chuan a fanu hmangaih em em biangah chuan a fawp vawng vawng a. Ni pawh chu kâwlah a her liam ve ta nghal riai riai bawk a.......
Posted on: Sat, 27 Jul 2013 07:55:49 +0000
Trending Topics
Recently Viewed Topics
© 2015