Ramonsito (CHAKA GRANDI) Booi ta orguyoso ku James (RATON KU TIN SIGI BIRA PA HANJA DIPLOMA DI CHAKA GRANDI )Kroon a siguié komo lider di UPB “E negativismo aki nos tin ku bai traha kuné. Nos por papia kiko ku nos ke, pero Boneiru no ta bai logra si Boneiru su hendenan, maske ku nan ta di otro kolo i otro partido, pa yega na algu. Ta p’esei awe mi ta kere ta e mihó eskoho ku e partido aki por a skohe pa sigui mi komo lider polítiko, ta un ku a kana huntu ku mi for di dia ku el a kuminsá te ku awe i ku sosten di Yonchi i otronan, lo ta unu ku por guia i kana e brùg ku nos tin pa bai kambia e struktura di polítika na Boneiru. E polítika ku esaki lo bai bira, nos tin ku bai kustumbrá kuné. E asuntu di por yega serka un diputado ántes i ku e diputado por a hasi tur kos, e tempu ei a pasa. Un diputado t’ei pa kordiná kosnan. E no t’ei mas ku ora yega serka dje bis’é ku bo kabes di dede ta morde, e wak un manera pa bo por yega hospital kuné. Awe bo ta kue bo sédula i presentá na hospital i nan mester duna bo servisio. I si bo tin reklamo riba esaki, bo tin ku bai na e servisio ku ta atendé ku reklamo. Si ta remedi bo mester, bo ta bai ku bo sédula botika. E kuestion di kana na porta di diputado a pasa pa historia. Tin ku komprondé esei. E por ta ferfelu, pero ta esei ta e realidat di Boneiru, awe ku bo derecho den man bo mes por atendé bo asuntunan ku bo tin derecho ariba. E kuenta di bati porta di diputado pa mira si e tin 50 florin pa yuda bo a pasa.” Asina Ramonsito Booi a deklara. Booi: “Nos a pone un hende ku kurason pa e pueblo aki. No un hende ku ta yega saka e hendenan for di kunuku, pasobra nan no ke bende e lugá, etc. Un hende ku kurason pa e pueblo aki ta James Kroon. Anto ami ta sumamente orguyoso awe nochi, ku James Kroon ta sigui mi aki nan. Nan por bisa kiko ku nan ke di dje. Ku James Kroon ta sabi òf e no ta sabi òf e ta kiko òf kua. Ami a mira masha hende supuestamente sumamente sabi, pero ku no por a hasi nada te ku awe. Un di nan ta Nochi Willem. Super sabi, pero kiko el a logra? Nada! Ni na Kòrsou, ni aki na Boneiru e lo no bai logra nada tampoko. Bati boka na radio kibra kos tur dia. Ohalá Dios baha den su kabes un dia, pe por komprondé ku e no ta yuda nada ku esei. Tin mas sabi tambe, manera un Jopie Giskus. Ingeniero, hòmber sabi ku su brel bisti, bo ta kere ku den mundu aki no por tin hende mas sabi kuné. Pero kiko nan a logra? Negativo, negativo, negativo. Riba Robby Beukenboom mi no ta papia mes, pasobra esei ta ‘red spider’ pisa. Primitu si!” Ramonsito a ekspresá yamando James di kurason pabien. “Ba ripara ku un simpel petishon ku bo a purba yuda un hende den nesesidat ku un pèrmit di taksi, di baina nan no a kita bo garganta for di bo kurpa. Pues bo por komprondé ku e direkshon ei lo sigui bini tambe pa hasi bo daño. Anto esaki mi ta spièrta bo, komo un hòmber ku a pasa den bastante kos, sin a kaba pasa den tur ainda. Pues na e momentu ku bo posishoná bo mes pa traha pa e pueblo aki i ora ku nos a skohe pa bai ku Hulanda, nos a trapa riba dedenan ku nos no a spera. Anto kos a bira peligroso, ku ora bo trapa riba dedenan, aki nan a pone Ministerio Públiko nos tras pa a likidá nos, pero nan no a logra. Pero na Kòrsou nan no a bai ni warda Ministerio Públiko yega, sino a yega i asesiná e polítiko di mas popular di e isla. Pues kuida bo kurpa, hasi bo trabou, basa riba e ideologianan ku e partido aki tin, ku ta Dios promé sobra despues i kana e kaminda korekto i práktika e loke nos a siña otro durante e tempu. Pasobra si no a siña i ku nos no a traha e kaminda ei, Dios lo sa.” El a bisa ku nan a pasa henter e partido, a interogá Yonchi komo 4 biaha, Maritsa komo 3 biaha i asina por menshoná. E hendenan di DROB, Domein i otronan i asta pastor di Rincon. Pero te awe nan no por logra inkriminá nan. Pa un simpel yudansa pa e pastor di Rincon a purba kalifiká esaki komo korupshon, pasobra e lo por a haña voto for di esaki. El a bisa ku por hari e kosnan aki, pero ta kosnan tristu, kon hendenan ku ta gosa di tur sort’i kos di e isla aki, ku yudansa di otronan i yudansa di Ministerio Públiko ta hasi tipo di kosnan asina aki. Esaki simplemente pasobra a bisa i awe ta ripitié, ku Ministerio Públiko di Kòrsou no ta sirbi. “I esaki ta un bèrdat amargo. P’esei nos kier a bai bou di Hulanda, anto ke mata nos p’esei. Nos ta keda ripitié i esaki a keda demonstrá tambe,” segun Ramonsito Booi. El a mustra riba e echo ku kosnan ta pasa na Kòrsou i nan no por arestá niun hende. Esnan ku nan mester arestá nan no por arestá i ta bin purba arestá esnan ku nan no mester arestá, pasobra no tin kos pa kue nan kuné. Ramonsito a gradisí su diputadonan, sr. Santana ku a kere den e vishon di UPB pa a forma koalishon ku e partido i na tur miembronan di UPB i tambe empleadonan públiko ku el a traha kuné i tambe koleganan di Kòrsou i Aruba i ta deseá AVP éksito den elekshon próksimamente. El a terminá mustrando den un dje logronan ku ta aeropuerto Flamingo ku den área di Karibe aki no tin un mihó i segun plannan aprobá, pronto esaki lo sigui desaroyá pa brinda Boneiru mas i mihó posibilidatnan. Sinembargo posibilidat grandi ta resultá ora bo traha pe, soda pe i si bo tin e deseo pa bai pe. Pero si bo para na banda, keda keha, grita ku otronan ta pasa bo dilanti i krítika, bo ta duna kaminda pa di bèrdat otronan pasa bo dilanti. “Niun hende por pasa bo dilanti si bo no permiti’é. Si bini un Chines Boneiru i ta traha di 6’or di mainta te ku 10’or anochi, anto e haña sèn, no rabia kuné. Hasi abo tambe meskos. Si mira bon, tur otro nashonalidat ku ta riba nos isla ta traha duru pa nan bai dilanti, ta ki falta nos komo Boneriano ta sinta skucha Nochi Willem tur mèrdia tende e keha i keha huntu kuné. Ku esaki bo no ta bai pa dilanti. Si bo ke bai dilanti, bo tin ku traha na lugá di skucha e pesadia ei. Bonerianonan no sa ta asina. Ta mentalidat di hendenan robes ku a bini riba e lugá aki a bin hinka e mentalidat aki den nos. Nos tin ku saka e mentalidat aki i krea bek e mentalidat di trahadónan Boneriano. Bonerianonan semper tabata respetá komo hòmbernan trahadó. Tantu riba tera komo riba laman. Pero aparentemente nos a importá e flohonan, tiradónan di para, sinta aki i gosando di lokual nos tin i purba kibra e loke tin pa Boneiru. Habri boso wowo pueblo.” Ku e palabranan ei Ramonsito Booi a terminá su disertashon djasabra anochi na Cas Patriótiko.
Posted on: Wed, 18 Sep 2013 11:24:52 +0000
Recently Viewed Topics
© 2015