Rana Magdy Ahmed منذ 3 ساعات بالقرب من Leuven, Vlaams-Brabant, Belgium الناس اللى لسه بتأييد السيسى و شايفينه بطل قومى و يا ريت يولع فى الاخوان او اللى بييأيدهم بجاز نوعين: النوع الأول من الاصل كان ضد ثوره يناير و كان عايز شفيق و هو ضد مرسي من الاول على طول الخط حتى لو مرسي جابلهم لبن العصفور مش حيعجبهم و حيقولوا ده مش طازه و السيسى بالنسبالهم بيرجعهم لزمن مبارك الجميل انا فاهمه موقفهم و هم بصراحه متسقين مع الذات مفيش حاجه غريبه فى اللى بيعملوه و مش بينافقوا نفسهم و بصراحه معنديش فيهم اي امل النوع التانى ده هم ناس مع ثوره يناير و رفضوا الظلم و ثاروا على مرسي عشان معرفش يواجه الفساد و قعد يطبطب على الفاسدين بدل ما يحاسبهم و ساب ناس تنتمى لتيارات اسلاميه تكلم الناس باسلوب عدائى فى بعض القنوات الدينيه من غير ما يوقفهم و معرفش يحل ازمات اقتصاديه و انا زيهم شايفاه انه تخاذل فى مواجهه الفساد بقوه و فضل يحسس على الجيش و الشرطه فاكر ان بكده حيتقى شرهم و لا وقف الاعلام الفاسد اللى هراه اشاعات و لا الاعلام الدينى اللى اساء ليهم ده حتى معملش وثائقيه واحده محترمه او مناظرات توضح تاريخهم و فكرهم بدل الناس مش عارفه تفرق ما بينهم و بين الجهاديين و السلفيين و باقى الاسلاميين و عاملين يألفوا اي كلام عن عقيده الاخوان و كان لازم يفهم ان الترابيزه حتتقلب علينا كلنا بس انا كنت عايزاه يمشى بالانتخابات او اي طريقه قانونيه فالاختلاف ما بينا فى النقطه دي. اللى حيجننى و قاهرنى من الناس دي ازاي تبقى رافض ظلم مبارك و فساده و رفضت تخاذل او ظلم مرسي لو شايفه ظالم و فاشى هو و قاده الجماعه و فشله فى حل الازمات الاقتصاديه فى غهده و تبقى موافق على اللى بيعمله السيسى اللى بيساوي مجموع: 1.الدوله البوليسيه لعبد الناصر و اعتقال اي معارض مهما كان انتماءه مع تصفيق الجماهير 2.ظلم و فساد دوله مبارك اللى رموزها الله ينور بقوا ابطال الشاشات من جديد 3.الاقصاء و الفاشيه اللى شايفها فى مرسي بقا فى اسود منها فى عهد السيسى و ايه كمان انت بتشجعه بنفسك على الاقصاء بل الاباده كمان و بتصقفله و زعلان انهم كانوا بيكفروك طب اثبت لهم انك مسلم بحق و حقيق و علمهم انت اخلاق المسلمين فى تعاملهم مع العدو المشرك مش حقولك تعاملهم مع اخوك فى الاسلام لما يخطأ و لا انت حتسيب الهام شاهين هى اللى تعلمهم زي ما قالت 4. فشل اقتصادي اكتر من اللى حصل فى عهد مبارك و مرسي مجتمعا بس بتعترف المره دي انها ازمات و نستحملها عشان المركب تمشى فجأه طلعلك option الصبر على الازمات 5. شويه مذابح كده بحجه مكافحه الارهاب و ان فى اقل من 50 قطعه سلاح مظبوطين فى الاعتصامات اتقتل قصادهم اكتر من 2000 بنى ادم ده غير اللى اتقتلوا فى مسيرات و فى عربيه الترحيلات بتاعت ابو زعبل و كل محد يكلمك تقول منزلوش معانا محمد محمود مع ان فى ناس منهم نزلت و من اللى نزلوا دول فى منهم اتقتلوا فى رابعه او اللى واقف جنبه شايل سلاح يبقى زيه ويستاهل ده فى انهى دين؟؟؟ تقول رموا العيال من على السطح فى سيدي جابر طب انت متأكد ان اللى عمل كده اخوان تقول اصله بدقن و ماسك علم القاعده او تقول البلتاجى قال كذا بذمتك انت مصدق نفسك مصدق ان كل اللى اتقتلوا دول ارهابيين او ناس مغيبه مضحوك عليها باسم الدين و فيهم شباب زي الورد و متعلمين احسن تعليم ما بتزعلش عليهم بينك و بين نفسك و بتتمنى تحاسب اللى قتلهم و اللى قتل اللى قبلهم من اول الثوره؟؟؟ طب مرسي غلط و مجبش حق الشهداء اللى فاتوا امتى حتبقى جدع و تطلب من السيسى حق كل اللى اتقتلوا من يناير 2011 لحد سبتمبر 2013 و لا اللى اتقتلوا دلوقت مش على مزاجك؟؟؟ عشان القاده بتوعهم غلطوا مفروض تسيب كل الناس تشيل غلطهم و تفرح و تقول فى داهيه؟؟؟ طب و اللى اتقتلوا و مالهمش علاقه بيهم بس ضد الانقلاب مش زعلان عليهم برضه؟؟؟ طب بلاش ده كل اللى كانوا بييأيدوا مبارك و عايزين يولعوا فى ثوار يناير فضلوا زي ما هم عادي من ممثلين و شخصيات عامه و مذيعين و شخصيات سياسيه عايشين حياتهم و الناس سامحتهم و بقوا قاده ثوره 30 يونيو و محدش اقصاهم و كمان بقيت بتتحمق لو حد جاب سيرتهم و بتدافع عنهم مش مكسوف من نفسك؟؟؟ امتى حتفهم انك بتشارك فى مصيبه سوده؟؟؟ لو خايف مرسي يرجع خلاص هو مش راجع دي مش حجتك كل الناس الكويسين اللى كانوا ضد مرسي و كنت بتتحجج بيهم ان هم معاك يوم 30 يونيو لما حد بيكلمك ان الفلول نازلين خلاص اغلبهم راجعوا نفسهم و بينتقدوا السيسي و شايفينه قاتل و ظالم و حيودي البلد فى داهيه و ده مش نفاق منهم لأن المنافق بيدور على الطرف الأقوي و يبقى معاه مش بيروح للمظلوم و يقف جنبه و مفضلش فى صفك غير الفلول و اللى بيكرهوا الاخوان لله فى لله كل ده مش محسسك ان فى حاجه غلط؟؟؟ عادي تكره الاخوان و تكره السيسى ما دام مبدأك واحد هو رفض الظلم مش مجرد الكره الاعمى و خلاص انا لسه عندي شويه امل فيك عشان شايفه فيك خير و ربنا ينور بصيرتك
Posted on: Sun, 08 Sep 2013 12:03:17 +0000
Trending Topics
Recently Viewed Topics
© 2015