Rumannan, ata aki e mensahe semanal di awe // Beste mensen, hier volgt de wekelijkse boodschap van vandaag: KU BISTA RIBA FUTURO BERANS ta un OPORTUNIDAT Ruman, nos tur ta konsiente ku situashon di pais no ta di gaba: desempleo a oumentá ku 2000 hende; polítikonan ta bringa otro; kriminalidat ta terorisá komunidat; komersio ta sklama pa benta; hotèlnan ta den problema; no tin koperashon i sinergia entre esnan enbolbí den turismo; plan pa desaroyo turístiko ta drumi kohe stòf. Asina lo tin mas aspekto ku ta daña e perspektiva pa desaroyo di nos pais. Tur esaki por ta bèrdat, pero un BÈRDAT SIGUR ta ku Kòrsou su bentahan NO a kambia. Nos posishon geográfiko ta ekselente, nos haf ta super, nos posishon finansiero ta mihó ku hopi pais, nos poblashon su nivel di formashon ta hopi bon, mientras nos konosementu di & akseso na IT (Teknologia di Informashon) ta mas haltu ku hopi pais den kontinente Merikano. Esaki ta nifiká ku NO tin un motibu struktural pakiko nos ekonomia mester ta den problema. Pesei mester atribuí e ‘tempu di berans’ akí na faktornan humano: Ta Nos Mes Falta! Pa un komunidat ku por t’asina uní den karnaval, den selebrashon di kualke evento nashonal, nos ta demostrá un enorme divishon i falta di koherensia ora ta trata maneho di nos pais. Anto, pa kolmo, nos no ke siña di otro! Ehèmpel: pakiko nos no ta puntra pakiko Aruba SÍ ta bai bon ku su turismo? Pakiko nan SI ta hala turismo i hotèlnan ta yen di hende? Por algo será! Tòg? Ta pesei mi ke kompartí e siguiente pensamentu ku bo, ruman. Ban wak kiko SI nos por hasi pa remediá asuntu. Ban buska loke ta UNI nos i NO loke ta dividí nos. Pa kuminsá, NOS TUR ta deseá pa kos bai bon ku Kòrsou, pasobra nos TUR ta disfrutá di esaki. Tòg? Pa ‘kos bai bon’ nos mester traha huntu. Nos mester UNI nos talentonan i nos energia pa yega na resultado ku ta duna satisfakshon i kaminda henter nos komunidat ta benefisiá. Esaki ta nifiká ku: - Nos mester stop di kritiká otro sin motibu, i si kritiká mes, bini ku alternativa - Stop di hasi “ko’i kudishi”: elogiá esun ku logra, i purba sigui su ehèmpel - No buska loke ta dividí, pero loke ta uni, pasobra union ta hasi forsa. - No sinta yora malai, pero buska solushon. - No sinta dependé di gobièrnu òf di otro; buska pa abo mes solushoná problema. - Ora bo ta desempleá, adaptá bo prioridatnan, adaptá bo gastunan, i siña biba ku menos. Ta ora bo ta obligá di ‘hala mara’, bo ta siña kon por ‘lora ku menos’. Bo por asta baha peso i biba mas salú! Bai studia òf buska un aktividat ku ta rende algu. Bo’n por sa kon esaki por krese bira un éksito grandi! - No ‘yora kriminalidat’ pero yuda resolbé krimen dor di pasa informashon pa outoridat ora bo sa ‘kiko ta kiko’. - Abo, polítiko, buska sinergía pa pais progresá na lugá di purba di ‘skór’. Ruman, ta ora kada un di nos kumpli ku nos deber, ora kada un di nos ta dispuesto di yuda otro, ora kada un di nos ta sinti su mes uní ku su pais, uní den e amor pa patria, ta e ora ei nos por kita e peso di negativismo akí for di nos lomba, règt nos skouder i kana kara na laria, pasobra nos a proba ku SI, NOS POR, ora nos kumpli ku nos mes i ku nos próhimo. Pasobra hende no ta biba solito riba un isla chikitu, pero den brasa di un komunidat. Ku kordial saludo Joseph ‘Jopi’ Hart KU BISTA RIBA FUTURo
Posted on: Wed, 13 Nov 2013 06:57:56 +0000
Trending Topics
Recently Viewed Topics
© 2015