SABAAD KO MGA KATHARO O RASULOLLAH (S.A.W) A MAPNGOLAOLA SII KO MGA UMAT IYAN A SII MIMBOWAT SANGKAIYA MASA TANO >Pitharo o Rasulollah (s.a.w): (يأتى زمان على أمّتى يحبون الخمس، وينسون الخمس: يحبون الدنيا وينسون الآخرة، يحبون المال وينسون الحساب، يحبون المخلوق وينسون الخالق، يحبون القصور وينسون القبور، يحبون المعصية وينسون التوبة، فإن كان الأمر كذلك ابتلاهم الله بالغلاء، والوباء، والموت الفجأة، وجور الحكام) الحديث Maana: phakaoma a masa sii ko mga umat akn a khababayaan iran so lima, go khalipatan iran mambo so lima: (1) khababayaan iran so donya go aya khalipatan iran na so Akhirat, (2) khababayaan iran so tamok go aya khalipatan iran na so Kaphamagitonga kiran (so kipagisaan kiran ko okit a kiyakowa-a iranon go so kiyanggastowa iranon) (3) khababayaan iran so inadun go aya khalipatan iran na so Miyangadun, (4) khababayaan iran so kambabalay sa mga ala a walay go aya khalipatan iran na so mga Qobour, (5) khababayaan iran so kambaradosa go aya khalipatan iran na so Kathaubat (kambalingan sii ko Allah) na amay ka giyanan e maolaola na itiyoba kiran o Allah so kapakaporo e arga pphamamasa-anun, go so sasoson a sakit a pndayamang, go so kapatay a pankaw, go so mga kokoman a mga tangarasi. >go Pitharo iyan pn: (والذى نفسى بيده ليأتبن على الناس زمان لا يدري القاتل فى أي شيء قتل، ولا يدري المقتول على أي شيء قتل) الحديث Maana: go ebt ko makapapaar rkaniyan a ginawako ka phakaoma dn sii ko mga manosiya so masa a di katawan o phamono so sabap a nganin a inipamono iyan, go di katawan o miyabono so sabap a nganin a inikabono iyan. >go Pitharo iyan pn: ( يأتى على الناس زمان يأكلون الربا، فمن لم يأكله أصابه من غباره) الحديث Maana: phakaoma sii ko mga manosiya a masa a khan siran phi-Ribaan, go bapiya so taw a di phakakan sa phi-Ribaan na pkhisogaton so bayanak o Riba. go sii sa isa a riwayat na aya kiyapakaokit iyan: (يأتى على الناس زمان يستحلون الربا بالبيع) الحديث Maana: phakaoma sii ko mga manosiya a masa a phakain iran so kap-Riba, sabap sa aya phaka-okitanon na kaphasaie. >go Pitharo iyan pn: (يأتى على الناس زمان لا يبالى المرء ما أخذ منه، أ من الحلال أم من الحرام) الحديث Maana: phakaoma sii ko mga manosiya a masa a dadn a labot o taw ko nganin a miyakowan yan a (sokatan) o ino (aya kiyapaka okit iyan) na phoon sa halal anta-a ka phoon sa haram. >go Pitharo iyan pn: (يشرب ناس من أمّتى الخمر، يسمونها بغير اسمها) الحديث Maana: pthakaan o mga taw a pd sii ko mga umat akn so Khamr (pakabrug) sa-mbthowan iran sa salako a ngaran. go obadi aya katharo o Omar (r.a): (والخمر ما خامر العقل) Maana: go aya ptharoon a Khamr (pakabrug) na so nganin a pphakaalin sii ko aql (katatanor o pamikiran). أقول قولى هذا وأستغفر الله لى ولكم....
Posted on: Thu, 14 Nov 2013 08:36:33 +0000
Trending Topics
Recently Viewed Topics
© 2015