SAPELE/DELTA STATE MUST BETTER. 30/09/2014. Today na the last day of September and for this forum the Commissioner for Higher Education throway words to us say Sapele Poly go commence operation before the end of September. Today as the Otota1 of Sapele i dey call on Hon. Hope wey be the Commissioner to wake up and do something to kick off the Poly for the proposed site of APOLLO PRESIDENTIAL HOTEL,because na so we go dey dis issue go waka pass ground again. I don dey expect the Commission to begin recruit but from all indications things dey slow too much and we know say na Election era nai we dey dance enter so. Sapele nor dey ask for University now or one major thing wey other Towns and Cities within the State nor get. How Sapele wey be the second most popular town for pre-independence after Lagos State nor go get any meaningful School or Infastructures to show its growth and yet unu wen sidon for power wey dey even reside here for Sapele go dey happy put. I don notice say na d absent of good minded leaders wen dey represent Sapele nai be Sapele problem. If small towns like Ugwachukwu,Ozoro,Asaba,Oleh,Oghara,Abraka,Mosogar fit get Higher Institutions nai be say Sapele wey be the host to one of the oldest and formidable Technical School suppose be a place for Engineering School but today Sapele get the worst democratic effect. I dey very bold to nack my hand for chest say Sapele norva gain INDEPENDENCE,becos from my point of view na INTERNAL COLONY we dey suffer under. Our people dey oppress us and we dey smile. During elections we go be deir friends and after them don enter power finish dem go dey use Horn dey greet us for street. As a matter of fact wetin Sapele wan talk say e don achieve since after Independence of 1960 and 1999 after Kaki people commot from power? NOTHING. The only surviving AT&P shut down. The First Black Man Drilling Company Lonestar shutdown. The Zartech of our time Shutdown. The Top-feed and Premium Feeds shutdown. etc I dey very disappointed for the likes of Chief Dafinone and all Politicians most especially the likes of EGIGBA,FELIX ANIRAH, AUSTINE AYEMIDEJOR, HON. MONDAY IGBUYA, PAULINUS AKPEKI and all other state office holders and stakeholders of Sapele. If Companies dey fold up from Sapele,and unu know the risk of been around unemployed and aggrieved youths,why unu nor put heads together to send a very strong letter to Federal Government to re-open our Seaport,in great support of our Royal Majesty The Orhue1 Of Okpe Land. In absense of dis Seaport. The State Government get the power to Commission Higher Institutions for Sapele wey go make the young ones of Sapele get great interest for Education. Sapele lack Good Roads. Sapele lack Good market. Sapele lack Sport Centers. Sapele lack Stadium. Sapele lack Health Centers. Sapele lack Civic Centers. Sapele lack Jobs Opportunities. Sapele LACK SCHOOLS. HIGHER INSTITUTIONS. ETC The only thing wey the Government don dey maintain for Sapele wey i big meet and e still dey in order nai be SAPELE PRISON. Commissioner for Higher Education Hon. Hope i kneel down beg you to finish wetin u start about our School or else na me and you go shook legs for one Trousier for this town and Sapele nor go contain you again. You promise us School and you say na September ending e go commence. You also promise to finish our State Library by September ending and na today the September dey end,so just by now know say the mouth wey i use thank you for the promise don dey sharp down to start war with you if we nor get our Library and our School sonnest. I Remain The Otota1 Of Sapele. The Urhukpe1 Of Okpe Kingdom. The Asamaigor1 Of Itsekiri Kingdom. The Eagle Eyes Of Delta State. God Bless Sapele. MY PEOPLE ABI WE NOR WANT THE SCHOOL AGAIN? SAPELE/DELTA STATE MUST BETTER.
Posted on: Tue, 30 Sep 2014 06:38:18 +0000
Trending Topics
Recently Viewed Topics
© 2015