SAPELE/DELTA STATE MUST BETTER. A Letter To Hon. Micheal Diden a.k.a Evangelist Ejele. From Grass to Grace. Na ur second name be that. Na u single handedly rise from Wood loading to reach Loaders Chairman. You nor end for dere oh. U cum struggle urself well and ur hand cum dey hot,befor i know i don see u for Politics. Hon. Micheal Diden i know say u love Sport well well,and u go agree with me say Sapele na home of talented players,wen dey cum up. Report blow pass my ear say Sapele Stadium wan host UNITY CUP wen go feature; Eyimba of Aba. Warri Wolves. Dolphine Of PH. Bayelsa Football Club. And two other Clubs and na you dey sponsor the competition. Hon. Micheal Diden Sapele get one Belle nai mak we all dey eat wit one mind,most especially wen we see ourselves for outside Sapele and outside Nigeria. The just concluded Delta State Football League wen Delta State host so,na Sapele known Igho F.C nai represent Sapele well as dem be Runner Up for the Competition. Dem nor dey follow who owe Gun dey struggle,so we nor dey command you,but as Sapele Otota1,i dey beg you to fixture IGHO F.C wen be our known Club for Sapele for dis Competition,so dat collectively we go fit join hand together build a very formidable Football Team wen we go fit nack hand for Chest say yes dis na our Sapele Local Team,becos dem dey registered and recognise for Delta State and for d Nation. I understand say you,say u wan be register ur own Team Itsekiri Academy. Dat na good idea,but dis Boys nor dey train befor now,but as dem don hear say Unity Cup dey cum and e go commence as from on Tuesday,dem wan shook head for ground say dem must play. Hon. Micheal Diden u na leader wen get sense. U like football well well and u hate oppression. I know say na JOE-COLE be the Organizer for the Competition and na u be the sponsorer. Na wetin u talk nai the Organizers go take. As the OTOTA1 of Sapele na wetin go bring about development nai i dey put my hand and my leg. We nor go fit dump our Boys wen manage use deir efforts take carry our names go far just now for d just concluded Delta State League,wen we get better opportunity to play against Nigeria Division 1/Premier League Clubs,wen we know say we even fit sell some players thru dis means and from dere we go cum happy if any National Team Coaches see our Boys and pik dem for African Competitions and better still World-Cup competitions. I believe say belle go sweet u well wen dem go tell u say na from the Grass root competition wen u organize nai send our Boy(s) commot from Grass to Grace like u. Ejele na opportunity wen Nature give u nai mak u dey where u dey today. U na leader wen dey encourage young Boys and u ready to empower people as long as dem get beta objectives. E go pain me if we misuse dis opportunity and throway d serious minded one wen ready to show case deir talent just to prove to d world our pride go play only one Tribe. If we look d Clubs wen dey cum,we go see say na complete Football Club wen comprises of different Tribes and dem nor care. Na so IGHO F.C AND SUNDOFF F.C be too for Sapele. IGHO FC na just name,but na different Tribes nai mak up d team. I nor go talk much here,becos i know say d message wen i dey pass here u don collect d sense inside since and u know say na d simple truth nai be dis. Person nor go dey River dey complain say soap dey e eyes. As we get pipo like u,na Patrone nai u be to all the Football Teams wen dey Sapele,becos u na Man wen sabi. I nor dey beg u alone oh,i use my Followers voice wen don pass 15,200 and my Friends wen be 5,000 all my Fans wen nor dey fit dey access Facebook but dem like no Love me die take shout the Abeg. Say mak u recognise IGHO FC for dis Unity Competition wen go start dis Tuesday for Sapele Stadium. Even if u get ur personal Players for Sapele wen u like see dat day for d Field,call the management of Igho Fc and instruct dem say mak dem admit the players wen u like mak dem play for deir club for dis Competition sake,den mak dem Train together,so dat dem go within dem selves choose mak a very solid Team to rasca among dis Elephant Clubs wen dey cum from our Super League. Wen dis report reach my desk,we for Studio here discuss d issue well nai we agree to call you on Phone. Hon. Micheal Diden ur line numbers wen i get reach 20 and no one dey go. Weda u be Commissioner of MTN,ZAIN,GLO and Etisalat i nor know. As i dey use and condemn sim card,i nor worst reach you. Abeg use ur hand call me today by 10a.m mak we talk deep for dis matter. My people,hope say unu don wake so,becos without unu my voice nor go anywhere. If wetin i talk na Truth join me talk for dis matter,and also who dey close to Hon. Micheal Diden,make fast go tell am say na e matter nai i put for ground dis morning. Infact mak i go St. Malachy weda e go cum dere cum play ball today or tomorrow. SAPELE/DELTA STATE MUST BETTER.
Posted on: Sat, 23 Nov 2013 05:33:19 +0000
Trending Topics
Recently Viewed Topics
© 2015