Sawihona thar siam nan hetah hian kan post leh mai ang e. Pathian lalram leh Vanram [Kingdom of God and Kingdom of Heaven]. Dispensationalist te chuan thil hrang a ni an ti a, Scoffield-a te, Riry-a te, Larkin-a te leh Walvoord-a te sawi duhdan a ni a, amaherawhchu Bible hian thil pakhat sawi nan a hmang a ni. A tifiahtu tha ber chu Vanram tih deuh hlira ziaktu Matthaia ziak atang hian kan la chhuak ang e. Matt.19 ah chuan chatuana nun zawngtu mihausa tlangval leh Isua inkawmna kan hmu a, mihausa tlangval khan a neih zawng zawng kalsan Isua zui chu harsa a tih avangin Isuan heti hian a sawi zui a ni, Tihtak meuhvin ka hrilh a che u, mi hausa tan vanrama luh chu harsa tak a ni, (19:23) a ti a. Isua hian Kingdom of Heaven-a luh mi hausa tan a harsatzia a sawi a, hetah hian Pathian Ram a ti lo va, Vanram a ti a ni. A nih leh Pathian ram lakah chuan Vanram chu awmze hran nei, thil dang sawina ni ta se a dawt chiah changa a sawi zawmna kha han en leh teh ang. Tin, ka hrilh leh a che u, mi hausa Pathian rama luh aiin sanghawngsei hriau benga luh a awl zawk, (19:24). Chang 24 na hian Ka hrilh leh a che u tiin bul a tan a, a awmzia chu a hmaa a sawi mi hausa tana VANRAMA luh a harsatzia kha a hrilh nawn leh tihna a ni. A hrilh nawn lehnaah chuan Vanram a ti ta lo va, Pathian ram a ti ta thung a ni. Hei hian thil thuhmun, tawngkam bungraw hrang mai a nihzia a tilang a ni. A chhan chu Vanrama luh harsatzia a hrilh nawn leh ngatna a ni tlat a ni. Chanchin Tha ziaktute hian Isua thusawi leh thu thuhmun leh ngai theuh an ziak vek a ni. Matthaia hian Vanram a tih kherna chhan ni thei bera lang chu Juda-ho hnena a ziak bik a nih vang a nih hmel a, Pathian hming hi an sawi hreh tih kan hriat vek kha, entirnan Fapa tlanbo thuah khan, Ka Pa, Vana mi mithmuhah leh nangma chungah thil ka tisual e, a ti a, Pathian sawi ri si lo, address ni siin Vana mi a ti deuh kher a ni. Amaherawhchu mi hausa tlangval thu khan chiang takin thu thuhmun sawi nan Isuan a thusawi hlawmkhatah a hmang kawp ve ve tlat a ni. Awmze hran a neihtir lem lo a ni.
Posted on: Fri, 09 Jan 2015 14:09:08 +0000
Trending Topics
Recently Viewed Topics
© 2015