September ni 5, 2013 (Inrinni zan) hian Chaltlang Biak Inah Baptisma rawngbawlna neih a ni a, heng kan Upate hian an chang ve a. Baptisma rawngbawlna neitu Bialtu Pastor Rev. Chhunglawma. 1. Senior Upa K.Lianzama 2. Upa H.Zosangliana (Kohhran Committee Chairman) 3. Upa H. Lalropuia (Puitling S.S. Secretary) 4. Upa R.Lalropuia (Kohhran Secretary) Heng mite bakah hian kohhran member nghet/nisa baptisama chang an awm nual bawk. Heng kan upa nilai ten baptisma an han chang hi a ropui dangdai khawp mai a; amaherawhchu, rilru-ah zawhna chhan thiam har tak si a awm thung! 1. Hêng kan upate hian Lalpa Isua hmingin baptisma hi an lo la chang lo nge? Lo la chang lo ni ta se, rei tak kohhran hruaitu (Upa-te) an lo ni tawh bawk si a! Sual ngaihdamna Baptisma pawh la chang lo, Upa, rawngtuah ka lo hmang reng tihna a ni thei ang em? Lo chang tawh pawh lo ni se, an lo chan tawhna chu rinna tak takin an lo la chang lo zawk nge? 2. Naupan lai deuha phur vanga lo chang ve tawp mai pawh an lo ni thei e; chuvangin tunah mahni duhthlanna/rinna ngeia chan an duh leh tak avanga an chang ni turah ngai ta ila. Mahse, zawhna pawimawh tak a la awm thei cheu mai! Chan that leh ngaia an lo chan tawhna chu chiang lo pawh lo ni se, hun kha leh chen a liam tawh a, Upa, rawngbawltu lo ni tawh a, hun rei tak Kohhran (Lalpa mithianghlimte zingah) rawng an lo bawl tawhnate kha thulthlung pawh hmu chiang lovin rawng an lo bawl reng mai a ni thei mai a ngem? 3. Isua hminga sual ngaihdamna baptisma hi vawi khat aia tam chan tur a ni tih Bible-ah hian a awm reng em? 4. Kohhran Longroll-ah Upa hial lo ni tawhte hi chu baptisma chang tawha record vek an ni tlangpui a. Tuna an chan that leh hian baptisma Certificate pawh pek leh vek an ni bawk si a. An baptisma channa hi a eng zawk nge Longroll-ah rin zâwk tur ni ta ang le? 5. Tuna an chan that lehna hi rinna tak tak avanga chang tha an nih chuan, a hmaa an lo chan tawhna kha chu engmah loah lo ngaih sak ta mai ila, mahse chuti a nih si chuan Kohhrana Upa (rawngbawltu) ni tur chuan kan Bible chuan “ringthar mi an ni tur a ni lo” a ti leh bawk si a; Tunah Upa leh rawngbawltu ni mek lai an ni bawk si a, kan bible kalhin ringthar mi, Upa leh rawngbawltuah kan hmang a ni thei mai ang em? An lo chan tawhna lah chu duh khawp lovin an mahni duhthu ngeia chang tha leh an ni bawk si a! Ring thar mi nge an nih tak ang ring hlui? 6. Thlarauah pawh intuai thar reng kan ngai ang hian, baptisma an lo chan tawhna kha a rei tawh em avangin tun hunah hian a renew-na ang deuhin an chang leh nge ni ta ang? Renew-na (Intuaitharna) ang deuh pawh lo ni dawn teh reng se. Khawiah nge Bible-ah hian a awm reng reng ni ang aw? 7. Isua hminga sual ngaihdamna baptisma hi Adama thlah, sualfa renga piang kan nihna (Original Sin) ngaihdamna a ni. Nitina kan nuna kan tihsual chi hrang hrang (Daily Sin) hi chu, Paula’n “nitin ka thi thin” a tih ang hian thlarau thianghlima khata awma sima kan kalsan zel tur a ni thung a. Baptisma chana intuai thar leh thin tur a nih ngai chuan, baptisma hi chan nawn kan va mamawh zing hlawm dawn tak em! 8. Kan bible-ah baptisma chang tawh ten an chan nawn leh thinnaa kawng khat chiah kei chuan ka hmu. IKorinth 15:29-ah Mitthi-te pualin baptisma an chang leh a ni tih Paula hian a sawi. Chuvangin kei chuan heng kan upa, baptisma kum tak hnu-a chang tha leh te hian an chhungte tuemaw ber pawh nise, baptisma chang hman lova lo thi tate puala chang an nih chuan kei chuan engmah sawi theih ka nei lo a ni. A ROPUI DANGDAI EMA KA HRIAT AVANGIN KA RAWN POST VE TAWP MAI A NI E.
Posted on: Sun, 06 Oct 2013 08:37:07 +0000