Sharing Session : PRAKTIKA HALO AI-DUBUS ORGANIKA EM4 (Alola.Media, 18/10) Maski kada programa tenke halao nafatin sira nia programa maibe sira mos nafatin fo sira nia tempo atu bele aprende buat ruma, sai matenek no forte liu tan. Fahe informasaun entre programa 4, saude, edukasaun, haforsa ekonomia no advokasia hanesan atividade ida hodi hakbi’it staff Fundasaun Alola sira hotu atu sira iha kapasidade natoon bainhira moris iha komunidade nia le’et. Iha loron Sesta (18/10) ida ne’e, liu husi sharing session, Jose Ximenes ne’ebe durante ne’e kaer kna’ar hanesan Jerente ba Programa Haforsa Ekonomia fahe ninia matenek ba staff Alola kona-ba oinsa halao aidubus ka pupuk husi material organiku ho naran EM4 (Effective Microorganisms 4). Ba programa Haforsa Ekonomia, praktika kona-ba oinsa halo aidubus organiku ida ne’e hanesan atividade ida ne’ebe fo ba groupu feto sira ne’ebe Alola organiza. Liu husi kuda modo no atividade agrikultura seluk, programa ne’e mantein nafatin hodi bele apoia feto vurnerável sira, hodi aumenta opurtunidade atu haburas rendimentu no promove feto sira iha rurál nia independénsia ekonómiku. Iha tinan 2012, ema hamutuk 1,542 hetan benifisiu husi programa ida ne’e. Iha opurtunidade ida ne’e, Maun Jose, esplika kona-ba funsaun no benifisiu husi aidubus ho naran EM4. Nia mos halao praktika oinsa bele produz kuantidade aidubus EM4 uza media seluk hanesan kahur ho masin midar, banibeen no bee. EM4 hanesan aidubus organika ida ne’ebe bele fo benifisiu diak ba ita nia rai, uza atu bele fertiliza ita rai too ikus bele sai aidubus diak ida ba ai oan sira. Iha praktika ida ne’e, Maun Jose hanorin oinsa uza media hanesan masin midar no banibeen atu bele aumenta bacteria, halao fermentasaun durante semana rua antes rega no uza ba ita nia ai oan sira. Nia mos esplika katak aidubus organika ida ne’e mos iha benifisiu seluk hanesan bele reduz bacteria negative iha tanki sentina nia laran, bele mos fo ba animal sira, bele mos kahur atu bele halao kompos. Haksolok tebes bele hetan opurtunidade nomos bele involve iha praktika nia laran. Informasaun sira ne’e sei lori esperansa foun ba staff Alola sira atu bele praktika iha skala uma laran nian, uza rai ne’ebe mamuk atu bele kuda netik modo tahan ruma ou ai-funan ruma, ho ida ne’e feto mos bele involve atu bele salva ita nia mundu husi mudansa iklimatika. Mai ita haburas ita nia rai!!
Posted on: Fri, 18 Oct 2013 02:56:26 +0000
Trending Topics
Recently Viewed Topics
© 2015