Steven Gerrard a vui Liverpool khaw naupang, Liverpool a ṭan em avanga inkhelh bana kawr inthleng ṭhina an hmelma Manchester United kawr reng reng pawh kawl ve duh lo khawpa Liverpool ruhkawlin Anfield a chhuahsan dawn - a chhuah hun a hnai a, Steven Gerrard-an a vui thu a sawi chhuak ve tlat. Liverpool captain hian, Ka vui lo, tih mah se, a interview ngaihtlakin a vui chiang a, contract thar ziahpui an tum tak tak a nih chuan season ṭan hmaa an sawm a lo ring a, season ṭan hma khan sawm ni se Liverpool kawr hi hlih a tum loh thute a sawi chhuak. Stevie G chuan, Season ṭan hma khan contract ziak tur hian min sawm se ka ziak nghal ang. England tana inkhelh ka chawlhsan chiah a, Liverpool-ah ka theihna zawng zawng insawrbing ka tum chiah... tun hnai kum hnih leh a chanve chhungin inhliam pawh nei mang loin ka inkhel thei a, mimal taka ka thlir pawhin season hmasa kha ka khel ṭha ve hle-ah ka inhngai. Tunah erawh chuan, Lo ni ta se, tih bak sawi theih a ni tawh lo a, season ṭan hma leh November inkar kha a rei a, khatih hunlai khan thutlukna ka siam fel tawh, a ti hmak mai. Gerrard hian tumah a dem loh thu a sawi a, a thusawi danah erawh a lawm lo tih a lang lawi si. USA lama pçm tum chuan, Tumah ka dem lo a, thinrimna pawh ka nei lo. Keimah ni lo midang he squad-ah hian an awm ve nual a, hengte hi club-in an enkawl a ngai a, ngaihtuah tur thil dang tam tak a nei, tiin a sawi chhuak. Liverpool tana game 700 dawn khel tawh chuan, Tun season-a kan chet chhiat hi ka chhuah chhan a ni lo a, result chhiat avanga chhuak tur chi ka ni lo. Kan dinhmun hi chhe ta viau se siam ṭha turin ka chhuak lo hial zawkin ka ring. Ka rilruah squad player nih mai hi pawm harsa ka ti a, player pawimawh ka nih dawn loh chuan min tiphûr zo tawh lo... mi ṭhenkhat chuan hei hi an pawm lo ang a; nimahsela kha leh chen kha inkhel bul ṭantu ka ni ṭhin a, bench-a ṭhut fote hi ka thiam ve dawn lo a, team-a tel ve mai mai nih chu ka duh lo, a ti. Gerrard hian manager Brendan Rodgers nen an inkawmnaah manager-in a dinhmun chiang takin a hrilh tih a sawi a, player pawimawh leh rinrawl ber a nih phak tawh loh tur thu a hrilh vangin a khelh phakna tur lamah a kal ta tih a sawi.
Posted on: Thu, 08 Jan 2015 14:15:26 +0000