Sumpay... Abtik sa tsiks"" Human matagbaw sa ilang pagpangaligo, mipauli ang grupo niana nang pagka hapon. Apan wala mokuyog si Clifford sa iyang mga barkada sa pagpauli kay didto siya kang Fatima mikuyog. “Wala ba’y masuko nimo kun mokuyog ko sa inyo Fat,” gipangutana ni Clifford ang dalaga samtang nagdagan ang motor. Si Clifford na ang nag-angkas sa motor kay si Fatima na maoy mibanos sa pagmaneho. “Wala man basta tinarung lang ang imong pag-uban nako Cliff,” ni Fatima pa nga milingi kadiyot sa ulitawo. Dunay mga higayon nga sa matag brake ni Fatima, madip-ig sa buko-buko sa dalaga ang dughan ni Clifford. Dali ra sila nga miabot sa pinuy-anan nila ni Fatima sa Consolacion. Gipaila-ila ni Fatima si Clifford ngadto sa iyang mga ginikanan, kahigalaan ug mga ig-agaw nga misugat kaniya. “Si Clifford maoy mitabang nako nga makit-an dayon ang balay ni Tiya Susing,” giingnan ni Fatima ang iyang mga ginikanan nga midalit og pahiyom sa ilang bisita. “Wala pa ra ba kita makaandam og makaon Day,” matud sa inahan sa dalaga. “Walay problema kay wala pa tingali gutoma kini si Clifford uy, gikan pa mi sa dagat kay giapas namo ang iyang mga barkada nga nangaligo kay nabiyaan man siya dihang giubanan ko pagpangita sa balay ni Tiya,” ni Fatima pa. Human mahimamat ni Clifford ang mga ginikanan sa dalaga nga misukit-sukit kaniya, giagni ni Fatima ang iyang bisita nga moadto na lang sila sa lungsod aron mag-snack kay wala pa’y andam pagkaon sa ilang balay. “Sori kaayo Cliff ha, unsaon nga pobre kaayo ning imong amiga,” mauwawon si Fatima nga misulti ngadto ni Clifford. “Walay problema uy, kinsa ba go’y datu kanato. Hai’y maayo kun mobalik ka sa imong Tiya sa Busay aron magkuyog lang ta karon didto,” sugyot sa ulitawo. Naghinuktok kadiyot si Fatima. “Tuod no kay wala man kaayo ko magdugay didto ganina. Sigi mananghid ko ni Mama ug Papa kay Domingo man ‘sab ugma,” matud ni Fatima. Wala mobalibad ang mga ginikanan ni Fatima nga mobalik siya sa Busay ug adto matulog sa balay sa iyang iyaan. “Tana Cliff,” agni ni Fatima sa ulitawo. “Mosalig lang mi nimo dong ha,” matud sa amahan ni Fatima. Nahuna-huna ni Clifford nga makalugar na siya didto sa Busay sa pagdiga na g’yud sa iyang gibati ngadto sa dalaga. Kilum-kilum na sila nga miabot sa Busay ug gihatud niya ang dalaga sa balay sa iyang iyaan. “Balik ko karong taud-taud Fat ha, mag-ilis ra ko sa balay,” matud ni Clifford. - Igo lang nag-ilis sa iyang sapot si Clifford didto sa ilang balay ug mibalik dayon siya didto sa balay sa iyaan ni Fatima nga nahimutang sa Sitio Maaslum. Nagpahatud siya ni Tatay nga drayber sa habal-habal. “Dali ka ra man lagi mibalik Cliff. Dali mangaon ta kay naghukad na man og pagkaon si Tiya,” matud ni Fatima nga nagpahiyom ngadto sa ulitawo. Wala balibari ni Clifford ang pagdapit ni Fatima kaniya. Human nila’g kaon, didto sila sa tugkaran sa payag nagsultihanay. “Basin ganahan ka nga manuroy ta sa unahan Fat... nindot kaayo sud-ongon ang tibuok syudad didto sa ibabaw, total naa ka may motor nga atong masakyan,” matud ni Clifford. Nananghid si Fatima sa iyang iyaan nga manuroy sila si Clifford. Didto sila nagpalabay sa oras sa usa ka tindahan nga nag-umbaw sa dakbayan sa Mandaue, Lapulapu ug kabahin sa dakbayan. “Hala makita lagi dinhi ang among lugar sa Consolacion no?” matud ni Fatima. Dali ra nga namingaw ang palibot, duha na lang sila nga customer sa tindahan. Nakahigayon si Clifford sa pagpanguyab ni Fatima. “Mora’g swerte g’yud kaayo ko karong adlawa Fat kay gikaila ko ikaw,’ matud ni Clifford. “Mao g’yud, nakagakus pa g’yud ka nako ilawom sa dagat,” matud ni Fatima nga milingi kang Clifford. Wala gayud diay makalimot si Fatima dihang gigakus siya ni Clifford ilawom sa tubig dihang nagduwa sila og dakup-dakop kaganina. “Sori kaayo Fat ha, wala lang ko makapugong sa akong gibati kaganina,” ni Clifford pa. “No problem uy. Ulitawo ka man g’yud kaha,” dali nga tubag ni Fatima. “Aw Oo, pure g’yud nga ulitawo mao nga dili g’yud ko mauwaw nga manguyab nimo karon,” walay lipud-lipod si Clifford. Napalingi na usab si Fatima kang Clifford nga mora’g nakurat. “Kusog ka pa man sa alas kwatro Cliff,” nangomedya si Fatima. “Kun sugton ko nimo Fat, isaad nako nga ako ka nga panggaon,” pasalig ni Clifford dungan sa pagbutang sa iyang kamot sa hawak sa dalaga. “Agay kagilok anang imong bukton uy nga naa sa akong hawak,” ni Fatima pa nga miagik-ik kay gigilokan. Nakabantay na si Clifford nga dili siya mosipyat sa iyang pagpanguyab. Wala tuod motangdo si Fatima apan wala na niya badlonga pa si Clifford nga mipabalikis sa iyang bukton sa iyang hawak. “I love you Fat,” matud ni Clifford. Milingi si Fatima kang Clifford nga malolot kaayo ang mga mata. Daw nasalipdan sila sa mga tanom mao nga wala magpanuko si Clifford sa pagpatik og hawok sa aping sa dalaga. Kadto maoy nagsilbi nga sinugdanan sa ilang pagparayganay nga maoy nakasugnib og kainit sa ilang kalawasan. - Katapusan Admin(bangasun)
Posted on: Thu, 12 Sep 2013 04:19:34 +0000