Suria sipai hotu Naamana kha Suria ho humhimtu atana Lalpa hman thin a ni a. A pu Suria lal ngaiha ropui leh mi zahawm tak a ni a. Mi huaisen tak a ni bawk. Mahse mite hmuh phak loh lamah phar natna a lo kawl/vei ru tlat mai nia. Khang hunlai khan a phar kha tuin emaw lo hmu mualphosak ta se chuan dai pawnah an hnawt chhuak ang a,mi dangte kawm serh a ni tawh dawn a ni. Ral an dova an hneh changin miten Naamana nge nge tiin chawimawiin lo lawm thin mahse a pindan chhungril a thlena a kawr a phelh hunah a phar a hmu thin ang a. A rukin hrehawm a tuar thin dawn a lo ni. Miten ka phar lai hi an hmu palh ange tih hlau reng renga hun hman kha a tan chuan a har ngawt ang. A duh loh leh thlan loh phar natna in a mana a nun a nei a. A lang tlangah chuan mite chawimawi leh fak hlawh in lei lam,Suria lal meuh ngaiha mi ropui ni mahse a ngai ropuitu Suria lal hmuh loh lamah chuan PHAR a ni tlat . Lei lam thilah kan thenawm khawvengte,kan thiante,kan u leh nau zingah te,kohhranah te,society lamah te,kawng chi hrang hrangah mite fak hlawh nihna kan nei theuh ang a. Lei lam thila hlawhtlin ve chang ni te leh hnehna changtu din hmuna kan din chang ni te hian mite fak leh lawm hlawhin nang nge nge,nang ber ber i tel loh chuan tih ang chite kan dawng theuh thin awm e. Miten min fak lai pawn faktlak loh chhungril lam phar natna hi kan kawl tlat a. Mahse hei hi thlarau thianghlim zarah lo chuan tuman kan hre lo va,mi dangte min fakna vel mai mai a lawm kan tam thin. Naamana kha miten fak thin mahse a lawm a kim thei lo. Phar natna a vei tlat vangin! A lang tlang mai ni lovin chhungril lam hi Lalpan a en thin a. Pawn lam lang theiah chuan fel tak tak,fak rawn luai luai tlak khawpa tha leh fel kan awm teuh ang. Mahse chhungril lam hmutu hmaah hian thlarau lamah kan la phar ru reng lo maw? (To be continued)
Posted on: Sun, 26 Jan 2014 14:28:35 +0000
Trending Topics
Recently Viewed Topics
© 2015