TALLAWAH FI TRUE!! To the non-patois speakers and readers, please excuse me while I indulge myself and my fellow countrymen. People, is how wi likkle country so tallawah man? When mi see di one Bolt him (ahem, ah mean Mr. Bolt) a han’ ova di French Open trophy, mi haffi really refleck fi a moment. Oonu realize seh di population of Jamaica ah less than half the population of New York City? Well, we really talking bout di population pon di island, cause oonu know seh di whole a we farrin-minded Jamaicans weh live a farrin might outnumba di one dem who still deh deh! Ah so we come like sand, attach to and move wid anyting! LOL. But look how we tek ova di place! And is not just in track, cause people act like di ongle ting Jamaican can do a run. Mek dem tan deh undaestimate we, yuh soon see Jamaican US President, wait! Nuh worry bout how yuh haffi be US born, cause if yuh parents a Jamaican, yuh a Jamaican too, all when yuh neva set foot pan di island! A so we infectious like virus! Mek dem gwaan…. We can chat too. Oonu know seh we love run wi mout – like dat Peter Thomas (real housewives of Atlanta – and stop act like yuh nuh watch it!). Jamaicans can act yuh funneh! We ah act from school days fi avoid punishment – act like yuh figgat di homework, act like yuh have headache true yuh caan memba yuh times table, act like yuh money drop outta yuh pocket when yuh know jolly well she yuh use it buy staggaback. So yuh cyaan surprise fi know seh Lyriq Bent (nuff show), Sheryl Lee Ralph, Roger Cross (X-Men 2), Madge Sinclair, Basil Wallace (Blood Diamond) all come from bung grung (RIP Louise Bennett). Mi not even haffi talk bout how we love sing – that list is endless. All who neva sing a church when dem likkle a Jamaica ah bat!! All mi haffi seh is Bob Marley. Mi nuh know a single soul who nuh know Bob Marley. All if yuh live inna bush, yuh know Bob Marley cause di tree (not three) likkle birds dem wi tell yuh. Nuh badda start talk bout Jamaican beauty cause dat deh list couldn’t even fit pan di intanet. Three Miss Worlds-- need I say more?? I will…. Grace Jones, Tyson Beckford, Naomi Campbell, Stacey McKenzie, an’ all the playboy dem too.. mi wouldn’t know who dem be.. mi nuh watch dat. All mi a try seh is that we lawge an soon to be in chawge. We inna ebryting! And oonu know how we full a pride and anybody weh look di part and do di right ting a Jamaican, if we even haffi go back four generation fi find di link. Das why mi still a seh dat bwoy Jozy Atidore weh score da first goal deh fi di U S of A ‘gainst reggae boyz di odda night, him a Jamaican too – watch - dem soon tell we!! DWL Comment, like and share – mi a try tun virus too!!! Please also like the page itself so you can be made aware when I add a new blog. Thanks!
Posted on: Tue, 11 Jun 2013 16:50:12 +0000