TAWI WILDLIFE SANCTUARY......... Centre for Environment Protection (CEP) chuan Tawi Wildlife Sanctuary-ah sava chanchin zirna (random bird sampling) leh ramhmul chanchin zirna tunhnai khan kan nei a. 35.75 Sq.kms a lian Tawi Wildlife Sanctuary-ah hian sava an tam thawkhat hle tih zirchhuah a niin, sava awm dan phung tehkhawng hrang hrang atanga a lan dan chu hetiang hi a ni. A bit dan (density) chu 3.73 birds/hectare a ni a, sava tam dan (species richness index) chu 16.82 a ni a, sava chi tam lam (species diversity index) chu 2.50 a niin sava chi insemrual dan (species evenness index) chu 0.95 a ni. He sava chanchin zirna atang hian sava family 34 atangin chi (species) hrang 119 zet record an ni. Sava chanchin zir pah a ramhmul awm dan zirchianna-ah thing chi 56, thingbuk hniam (shrub) chi 20, hruihnang (cane & rattan) chi 6, thlai nem chi (herbs) chi 12 leh hruizam chi (climbers & lianas) chi 15 zet record a ni bawk. A tehkhawng atanga a lan danin ramhmul bit dan (density) chu 73.26 plants/3m2 a ni a, a tam dan (species richness index) chu 55.30 a ni a, ramhmul chi tam lam (species diversity index) chu 4.09 a niin ramhmul chi insemrual dan (species evenness index) chu 1.03 a ni bawk. Tawi Wildlife Sanctuary hi sava leh ramhmul lamah a hausa hle a, BirdLife International hnuaia Important Bird Area (IBA) atana puan a ni theihnan hmalak nghal a niin, he Sanctuary behchhan hian Eco-tourism development lama hmalak a pawimawh bakah; sawrkar department hrang hrangte he Sanctuary hi hmang tangkaia a chhehvela Development kalpui thiam turin CEP chuan a duh hle a ni.
Posted on: Fri, 14 Nov 2014 07:13:24 +0000