THISEN SAWNGBAWLNA SENSO PHUHRUK NAN THISEN UNIT KHATAH Rs. 550 LAK ANI DAWN Mizoram sorkar chuan National AIDS Control Organisation (NACO) aṭanga ṭanpuina dawng blood bank-te chu thisen hmangtu hnen aṭangin thisen unit khatah thisen sawngbawlna man (processing fee) Rs. 550 zel la turin a hriattir. Mizoram sorkara Hospital & Medical Education department director-in nikum kum tawp lama hriattirna a chhuah chuan, private hospital-ten NACO supported blood bank-te aṭanga thisen an lakin, processing fee thisen unit khatah Rs. 550 zel la turin a hriattir a; chumi ang chuan December 2014 thla tir aṭangin private hospital-ten blood bank aṭanga thisen an lakin processing fee Rs. 550 zel an la a, sorkar damdawi-ina awma thisen dawngtute aṭang erawh chuan processing fee lak a ni rih lo. HME director chuan December 22, 2014 khan hriattirna (notification) chhuah lehin, NACO aṭanga ṭanpuina dawng blood bank, sorkar damdawi-ina blood bank zawng zawngte chu January 1, 2015 aṭangin processing fee, thisen unit khatah Rs. 550 zel la turin a hriattir leh bawk. HME director notification chuan, Medical Reimbursement, Health Care Scheme leh RSBY hmanga damdawia inenkawlna sorkara bill leh theite hnenah thisen hmangtute aṭangin processing fee unit khatah Rs. 550 zel lak tur a nih thu a tarlang a; blood processing fee lakte chu damdawi-in inenkawlna RKS-a lut tur a nih thu a tarlang bawk. Hetih lai hian, damlo natna khirh bik, thisen pek reng ngai ang chite chu thisen an dawn nawnnaah chuan processing fee laksak loh tur an nih thung. Blood processing fee lak tura tih hi State Blood Transfusion Council rawtna anga kalpui a ni a; sorkar damdawi-inte hnena thisen dawngtute aṭanga thisen sawngbawlna senso phuhrûkna tur la tura tihna thupek hi sorkar damdawi-inte chuan order an hmuh chauh avangin a takin an la kalpui lo nia thu dawn a ni. Association for Voluntary Blood Donation (AVBD) chuan, sorkarin thisen hmangtute aṭanga thisen lakna hmanrua leh sawngbawlna senso phuhrûkna tura processing fee unit khata Rs. 550 lak chu thisen man a ni lo tih hrethiam turin mi tinte an ngen. AVBD chuan, sorkarin thisen petute ei leh in tur (refreshment) man tur blood bank-te a pek theih rih loh avangin, tun hnaiah Khatla YMA-in Rs. 25,000 leh mimal ṭhenkhatin pawisa an pe tih sawiin, lawmawm an tih thu an tarlang bawk. AVBD tarlan danin, miin a thlawnin thisen pe mah se, damloin a hman theih tura thisen siam nan unit khatah Rs. 1,200 vel sen a ngai ṭhin. Sorkarin sorkar damdawi-inah blood processing fee a lak hma hian private hospital-in sorkar blood bank aṭanga thisen an lakin unit khatah Rs. 550 lak phawt a ni. Private hospital blood bank-te chuan kum eng emaw zat kal ta aṭang khan processing fee an lo la tawh a; Christian Hospital, Serkawn blood bank chuan unit khatah Rs. 750 an la mek. Synod Hospital blood bank chuan thisen unit khatah Rs. 400 leh Rs. 1,500 an la a; hei hi NACO guideline rate ang a nih thu MSACS hotute chuan an sawi.
Posted on: Wed, 07 Jan 2015 02:39:46 +0000
Trending Topics
Recently Viewed Topics
© 2015