## THLAZING 11 Vawk am Isu? (Pig or Jesus) ~ Rev. Dr. H.M. Songate “Chun, chuonghai chun Isu chu an rama inthawka suok dingin an ngen tah a.” Mark 5:17 Bible chàng vangduoithlâk (saddest) taka ngai chu a chunga thu khi a nih. Iengkim neitu Isu, mipuiin an zui huoi huoi lai zing, lo hnawl dawk el kha chu thilmak tak a nih. Isu ditnawtu mihriem le khuo chu vangduoi tak an nih. Dr. Savidge le Rev. Lorrain hai kha Mizoram an lut hmain, Arunachal Pradesh-ah an lut a. Adi hnamhai lai rawngbawl an tum a. Amiruokchu, Adi hnamhaiin an lo hnawl tlat leiin sawt um thei lovin Silchar tieng an pan nawk a nih. Silchar-a Mizoram mi sumdawnghai an hmu a, damte tein an tawng an inchuk a. Chu zovah Mizoram an va lut a nih. Pathien thu leia Mizoramin malsawmna, thiemna, varna, hausakna le thildang dang an dawng rawnzie hril ngai lova hretu hai ei nih. Adi hnamhai lai hin Mizoram Baptist hai ngeiin kohran an va phun nawk ve tlat. Tangkhul hai chenin missionary an tir. Nasa takin thlarau ramah mî hnung hnawt an nih. Ringtu tlawmte chau an um. Gadara khuoah harsa sa sain thlipui le ruopui karah an va fe a. Malsawmna le damna intlun beiseiin an hung kai a. A khuo phekin an ti sim tak ‘Nuoia’ (Legion) khawm a sukdam pek a. Nu le nau thlaphang taka um hlak, inngup mata an um ding phingin, lawm a nekin an ning innuor el a. Mi kawi le khaw danglam tak chu ni ngei an tih. Isu kutah khan damna, thilmak thawtheina, muongna, inremna, malsawmna tinreng le thilpek chi hrang hrang tamtak a um a. Natna chi dang dang a sukdam zing a. Hi khuoah hin thil dang tam tak khawm thaw nuom a la nei ring a um a. Sukdam ding le hringna pek ding tam tak an la um zing lai, Isu kuomah an hung a, ‘suok dingin’ an hung ngen chawt el a na. Mak chu a mak tho ie! Isu kha, thiemtak le ‘polite’ takin an hnaw dawk a nih! Inrum tak ni lovin, var tak le inngaihnuoi ni awm takin, a ngenin an hung ngen a nih. An nuom chun “Isu kan hnawl nawh. Fe dingin kan ngen chau a nih”! an ti thei. Ieng leia Isu kha an hnawl am a na? Vawk ruol (pigs) lei a ni kha! Damna nekin Vawk an dit lem a! Khawhri hnawt dawk nekin Vawk nei an nuom lem a! Malsawmna tam tak nekin Vawk an dit lem! An venga damnaw umhai nekin Vawk ruol an ngaina lem a. An venga retheihai nekin Vawk ruol an ngaina lem bawk. An venga misuol umhai nekin Vawk ruol an ngaina lem a. Chanchintha nekin Vawk ruol an ngaina lem. Thlarau bohmanghai nekin Vawk ruol an hmangai lem a. Inremna le inhmangaina tluontling nekin Vawk ruol an dit lem. An khuo damna le thatna ding nekin Vawk ruol an thlang lem a. Vawksa kha an du hle mani ding maw! Juda mi chu an ni naw ni ngei a tih! Iengkim nekin Vawk kha an dit lem a ngai thei a nih. A khuo mihai kha “Vawka hai khuo” ti dinga tha an nih! An nauhai hmingah ‘Lalvawklawm’ dam, ‘Vawkduthang’ dam inbuk hai sien tha ding! Vawk ruol kha an sum hnar a ni lei tak ni ngei a tih. Thil dang po po nekin ‘Sum hnar’ kha an ngaipawimaw lem tina a nih. Chuleiin, an hming dingin, ‘Sumduthang’ ti khawm inbukpek thei an ni ring a um! Thil ngainat suol hi a pawi em em a nih. Ngainat lo ding ngainat hi sietna dam, thina dam chen an tlun thei a nih. Isu chanchin kha an lo hrietsa a ni ring a um a. Amiruokchu, an Vawk (sum) ngainatna kha a’n sang em em a nih. Pathien thuin “Tangka sum ngainatna hi suol tinreng bul a nih” a lo ti tawp el kha a na. An va thaw fuk naw de aw. Isu hi, hnawla a umna khuoah a châm ngai nawh. A fe hmangsan vang vang hlak a nih. Isu hnawl pal hi inlau a va zuk um de…! Vawk le sum du taluo leia Isu hnawl hiel el chu a mak ngei! India bollywood nunghak Ziah Khan a’n awkhlum le inzawmin Shah Rukh Khan-in hieng ang hin a hril a. “Khawvelah hringna a hlu tak a, chuleiin, thalai le tleirawl tukhawmin in hringna la hmang naw ro” tiin. Hi khuohai hin hringna nekin Vawk le sum an thlang lem a. Isu nekin bo nawk el ding vawk (sum) an dit lem a nih. An thaw suol nasa em leiin kha khuo hai khan a hnungah insirna an la nei el naw di’m a ni aw…! Anleh, eini rawi hin teh ieng am ei ngaina tak a? Iengin am ei nitin nun a mi thuoi a? Ei mimal hringna le ei insung hringnahai hi iengin am a mi thuoi aw..? Kohran le khawtlang hringna iengin am a thuoi a? Iem ei ngaina tak a? Ngaituo chet chet chun, ei insung, khuo le tui haiah, Isu hi fe hmang dingin ei nawr ve tlut tlut nisien a hawi bak a? Isu hmel angna a vang deu ta naw maw? Mimal, insung le kohran nunah Isu ei ngaina chie de’m? ‘Polite’ deuvin Isu ei hnawl dawk an naw maw? Isu chengna hmun a va hawi naw de! Isu hnawla a umna taksa, Isu hnawla a umna insung, Isu hnawtdawka a umna khawtlang, Isu hnawtdawka a umna kohran, Isu hnawdawka a umna hnam ei hawi zo ta naw maw? Isu nekin Vawkin (sumin) ei mimal, ei insung, ei kohran pawl le ei khawtlangah hmun a chang lien lem an ta naw maw? Vawk ngaituo pumin biekin i pan mei mei a ni ta naw maw? Vawk ngaituo malama zing tawngtai fe mei mei i ni el naw maw? Isu chu, an hnawlna khuoah a cheng ngai nawh. Isu hnawla a umna lungrilah Isu a cheng ngai nawh. Isu hnawla a umna insungah a cheng ngai nawh a. ‘Vawk’ ringawt ngaituona khawtlang le kohranah Isu a cheng ngai nawh. Isu hnawla a umna Hnamah Isu a cheng ngai nawh. Kei khawm kum tam tieng ka lo ni ta leiin, penson nei bawk lo. Vawk ka lo ngaituo vung vung chang a um hlak ti ka man suok! Ni khat chu chawkidar pakhatin “Pu, I penson hnai ta chun, ‘penson hlaw’ in nei am”? a mi tih a. “Kan nei nawh. Bei a sukdawng chang a um hlak” ka zuk ti thla ringawt a. Ama chun mak ti taluoin, “Pu, Penson nei naw leiin nang chen i bei a dawng maw? Pathien i ring an naw”? a ti ta el a. Kan zak em em! Ka tuok suol hlein ka hriet. Vawk ka lo ngaituo lai tak a mi’n dawn fuk a ni ka ring! Vawk, sum, penson ngaituona nekin Isu hi ngaituoa thlang lem ding a nih. Unau, nang khawm inthup mawi naw ta! ‘Vawk’ a ni kha maw, a sun a zana i buoipui hlak chu! Isu ‘ka hnawl’ ti nuom si lovin ei laklut naw chu a ni hi! Isu’n “A ram le a felna chu zawng hmasa unla chuong po po chu a pek belsa ding cheu a nih” a lo ti a ni kha. Unau, Krista hnawl hmang lul naw, Vawkin hluo bit pal a che!
Posted on: Mon, 12 Aug 2013 05:11:48 +0000
Trending Topics
Recently Viewed Topics
© 2015