TIRAMENTU DI LODO LO NO YUDA Awor tiramentu di lodo a kuminsá. Den nan último karta na Gezaghebber UPB ta demostrá ku te ainda nan ta dominá e arte ei. Pabien! Pero esei ta hustifiká ku Burney Elhage ta keda sinta? I esei ta hasi e ‘krísis gubernamental’ e berdadero motibu tras di e Moshon di Deskonfiansa? Ora bo no ta komprondé bon kiko t’e motibu real tras di kualkier krísis polítiko, ta bon pa investigá e puntonan ku esnan envolví ta pleita over di dje. Awor UPB ta menshoná un kantidat di situashon òf desishon di Gezaghebber ku nan tin difikultat kuné. Pero kua desishon òf situashon nan NO ta menshoná? Hopi biaha ta ayanan bo ta haña e motibu real. Tin un issue ku UPB kier pusha ‘kuesta loke kuesta’? Si ta asina, ayanan e investigashon tin ku kuminsá. Nos ta spera ku esnan ku sa e bèrdat lo sali dilanti, habri nan boka. No nesesariamente Gezaghebber mes, pero kisas un amtenar. Tempu a yega pa hasi algu similar na loke Edward Snowden a hasi internashonalmente. Transparensia ... Kòrda ku Rodger Gijsbertha tin un brievenbus! E buzon ei no ta papia. Si bo hinka bo pruebanan eiden anónimamente (den un ènvelòp sin bo nòmber riba dje), e ora ei ni Rodger no sa kende a mand’é un karta. Ta un sugerensia, pasobra pueblo tin derecho di haña sa e bèrdat. Anto di e forma ei bo por yuda esun ku ta víktima di chantahe tambe. By the way, mi tambe tin un buzon. Enfin, nos ta gradisí pueblo un biaha mas pa e forma disipliná ku nan a Manifestá ayera nochi. Tabatin un multitut tremendo i un ambiente festivo. Ta manera pueblo a sinti un alivio. Esaki NO tin ku aber solamente ku e asuntu di Gezaghebber vs. bengansa polítiko di UPB. Pueblo ta iritá over di hopi kos. Tur kos a bira super karu. Sueldonan ta keda abou. Ta trata imigrantenan malu. E maneho Hulandes ta inhumano. UPB ni Hulanda no kier papia over di igualisashon di AOV te na nivel Hulandes, kinderbijslag, supsidio di hür etc. etc. Pa awor Gezaghebber a gana e bataya. Ban wak kiko ta bai pasa awor. Na nòmber di PHU, M. Bijkerk, sekretario
Posted on: Fri, 12 Jul 2013 17:27:13 +0000
Trending Topics
Recently Viewed Topics
© 2015