TRADE LICENCE Mizoramah hian Trade Licence chungchang hi kan sawi fo a, tukkin chanchinbu headline meuhah pawh a rawn lang a; Mizoramah non-tribal trade licence nei an awm thu an rawn sawi a nih kha. Hei hi chiang taka ka sawi duh chu Mizoramah non-tribal tan trade licence emaw, trading regulations engmah a awm lo, kan vauchher ber chu ILP hi a ni mai. Hnam dang hriata sawi chi chu a ni hauh lo a, Zofate tan a tangkai zawk theih nan heti zawng hian thluk teh ang. Kum 1954 khan Lushai Hills District (Trading by Non-Tribal) Rules kan nei a, kum 1955 atanga hman tan a ni. Non-tribal sumdawngte khuahkhirhna dan a ni. Hun a kal deuh a, kan UT hnu kum 1974 khan Mizoram Trading by Non-Tribals (Regulation) Act chu passed a ni. He dan section 16-in a sawi danin, he Act hian a hma Rules, 1954 chu a rawn repealed (luahlan) a ni. Nimahsela, vanduaithlak deuhin he dan section 1(3) sawi angin, he Act hi kum 10 atan chauh a siam a ni a. Kum 1985 hnu lam atang chuan Trading regulations reng reng kan nei tawh lo a, trade licence kan tih pawh engmah lo mai a lo ni ta. MNF sawrkar khan trading regulations hi siam a tum a, mahse Union Home Ministry ngam lovin a zuzi ta tih thawmte kha a awm deuhin lo maw? Non-tribal Mizorama sumdawng tur chuan Mizoram Value Added Tax pek a ngai a, chuti anga inziak lut tur chuan kum 2 chhung validity nei ILP neih a ngai. ILP hi kan vauchher ber a ni lo thei lo.
Posted on: Wed, 16 Jul 2014 12:18:36 +0000
Trending Topics
Recently Viewed Topics
© 2015