TUNLAIA MIZO TAWNG THLÛK (LAM RIK) DIK TAWK LOTE (22.09.2006-a Art & Culture; MAL & MUP buatsaih Seminar Paper) - C. Chhuanvawra Awze miten Mizo tawng an thiam lohna langsar ber chu a thlûk, a lam rik dan hi a ni. Tunlai hian Awze mi ni si lo, Mizo ngeite hian keimahni tawng hi lam rik dik loh kan ngah sâwt ta hle. Mizo tawng hi chu ‘tone language’ a nih avangin inbiak nana han hman hian a sipel dik mah se, a thlûk a dik loh chuan a awmzia a bo thei hial thin. A chhiara chhiar emaw a sawia sawi emaw pawh ni se, a thlûk a dik loh chuan hriat sual a awl a, hriat dik a harsa thin. Mizo tawng thatzia te, mawizia te tilang thei turin dik taka lam rik te, mawi taka thlûk dik te a tul. Chu chu Zofate chuan kan bâ a ni. Kan bat kan tlâk theih nan kan lam rik dik tawk loh eng emaw zat leh a hman dan dik i han zir ho dawn teh ang. 1. Modification of words : Hei hi sawi hmasak ber a ngai. Tunlaia Mizotawng kan hman dik loh zinga tam tak hi hetiang chi hriat thiam loh vanga hmang dik lo kan ni. Mizo tawng Modification tia Pu Buangan min lo vuahsak hi Verb leh thu mal dang a hman dan azira lo danglam thin ang chi hi a ni. A danglam thin dan chu a sipel lam a ni deuh ber nain a sipel danglam dan hrethiam loten a thlûk an tihdik loh phah tam em avangin sawi tel ve tho a tul . Tin, a dang sawi fiahna turah Modification hi sawi lan a ngai zing hle a, sawi fiah lâwk hian kan hriatthiam phah deuh a beiseiawm bawk. A danglam dan tlangpui chu : bâr - bâr, kal - kal, ai - aih, nei – neih, chu - chuk, mâ - mâk, riak –riah dê - dêt, tia - tiat, bâng - bân, lip - lih, dep - deh, hiat - hiah, nawt - nawh, chuang - chuan, nuar - nawrh, nghak - nghah, zuar - zawrh, etc. leh thlûr thum chi : bia, biak, be; chhia, chhiat, chhe; hria, hriat, hre; bua, buak, baw; hua, huat, haw; lua, luak, law; pua, puak, paw; vua, vuak, vaw; etc. Modification dan zui lova a sipel dik loh ruala a lam rik dan (thlûk) dik lo nghal thinte chu entir nan tlem lo tar lang ila. Kohhran Hmeichhia Golden Jubilee. Pawisa chhia thlengna. Tu motor-ah nge in chuang? Artui kang ka hmeh duh. A zuang thui avangin an la. Khuaizu in nei em? Tui kawtna ka hmu lo. Fianthlirin tui mi suak rawh. Puanchhia keng vek tur. Eng thuamhnaw nge in zuar? etc. 2. Modification ni chiah lo, a ang deuh, thu mal pahnih hmanga hming thar siam a nihin a thu mal hmasa zawk chu a ri tawia lam a ni thin a, chu chu a tawi lova lam chuan a dik lo va, awze rim a tinam thin; mahse chutianga tih ching chu an tam hle. Artê ti lovin ârtê an ti a, arsa ti lovin ârsa, aidû ti lovin âidû, aieng ti lovin âieng, maitê ti lovin mâitê, naupang ti lovin nâupang, zanlai ti lovin zânlai, darkhuang ti lovin dârkhuang, darbu ti lovin dârbu, khawidâng ti lovin khuaidâng, Pi Thangi ti lovin Pî Thangi, Pu Lala ti lovin Pû Lala an ti. 3. Noun leh pronoun thenkhat neitu leh titu an nih avanga lam pir tur lam pir lohte. Lo chîk thinte chuan hetiang chi lam ri dik lo kan thathnem tawhzia an hria ang. Kan zirtirtu lehkhabu, ka nu kawr, i pa chem, tiha noun–zirtirtu, nu, pa tih te hi neitu an nih avangin a tawpa u leh a–te hi lam pir tur a ni, lam pir loh chuan neitu an ni tih a hriat theih loh. A lam pir dan tur chu a hawrawp tawp ber theuh hi ni (sun) sa tiha ‘sa’ ri ang hian a ni. Heti hian : Kan zirtirtu lehkhabu, ka nu kawr, i pa chem. Hetiang lam pir loh avang hian 1Pet. 1:3, “Kan Lalpa Isua Krista Pathian leh Pa…” tih hi Kohhran upa pakhat chuan a sermon sual tih an sawi. A lam pir loh avangin Lalpa Isua chu Krista a ni a, Pathian leh Pa a ni bawk tiin a ngai a, chutiang chuan a sermon ta a ni awm e. Krista tih tawpa ‘a’ hi ni sa tiha sa ri anga lam pir chuan Pathian chu Krista Pathian leh Pa a ni tihna a ni a, lam pir loh chuan Isua Krista chu Pathian a ni a, Pa a ni bawk tihna a ni. Fapa kha Pathian leh Pa a ni ve ve ta emaw miin an lo tih loh nan lam pir a ngai a ni; lam pir chu Mizo tawng kalhmang a ni si a, i lam pir thin ang u. |henkhat lehthung erawh chuan Isua Krista tih te hi Isua lam pirin ‘Isua Krista’ an ti a, Krista chu Isua ta ni awm takin an chhuah thin thung; mahse Isua hi Krista neitu leh titu a ni si lo va, a dik lo. Neitu emaw titu emaw an nih chuan pronoun thenkhat–anni , keimahni, nangni tih ang chite pawh hi ‘ni’ theuh hi ni (sun) anga lam rik tur a ni. Hetiang hian: Anni thu a ni lo. Keimahni chhar a nih kha. Keini leh nangni tan a daih lo ang e. 4 ngamthlêm : Tunlai hian a dika lam ri thiam lo leh chhiar sual an tam ta. An tihdik loh lai chu ‘ngam’ hi a ni, i dâwt ngam leh dâwt rawh tiha ‘ngam’ anga lam riin ngamthlêm an ti. A lam rik dan dik chu II Kor. Hrilhfiahnaa Rev. C. Rosiaman, “In sakhi no khawi chu a ngam phian reuh hi maw le, tiha ‘ngam’ ang hian lam rik tur a ni,” a tih ang kha a ni e. bei tham : Ka hriat dan chuan nau bei tiha bei ri anga bei tham tih hi UT kan nih hnu lama hman tan a ni. Thil lian zawka a te zawk va bei anga ngaihtuahin a dik emaw an ti ni ngei tur a ni. Ka nei tawh tiha nei ri anga bei lam ria ‘bei tham’ tih hi a dik dan leh hman thin dan ber chu a ni. lukhâwng, tehkhâwng : A ‘khâwng’ lai hi sawi chhâwng tiha ‘chhâwng’ anga lam ria lukhâwng, tehkhâwng ti an awm thin, a dik lo. Khâwngbâwk khua tiha ‘khâwng’ anga lam tur a ni. hliam : Hei hi a root verb rik dan leh a modified form rik dan hre hrang lo kan tam a, kan hman pawlh nasa hle. A root verb ri chu chem hriam tiha hriam ri ang a ni a, a modified ri chu diriam tiha riam ang a ni. LPS thupuangtu hian hriam ri ang hlirin an hmang. Hriam ri anga hmanna tur chite chu–an inhliam tih te, mi rilru a hliam tih te, sa hliam an um tih ang chi te hi a ni. Diriam tiha riam anga lam hniam tur chite chu–mi 30 laiin hliam an tuar tih te, hliamin a awm a tih te, lo vah zawng inhliam a hlauhawm tih ang chi te hi a ni. hai : Hei hi khaw khawm hnua lo chhuak a ni. Luhai tiha hai ri anga hai an tih hi hâi a ni a, tiam rih lo tihna a ni. Inkah hâi sawi tam ber laia ‘hai’ tih an inhmanhmuh thut thei kha a mak hle. Khang laia naupang la ni chin khan an hmang ta zel a, nu tling pa tling an lo ni tawh chung pawhin tam tak chuan an la hmang. Zirlai buah a dik lohzia sawina leh a hman dan dik telh ni se tha tur a ni a, a danna dang siam a ni bawk si lo va, a dik lo tih hre lo pawh an tam tawh khawp ang. Hai chu hre ta lo tihna a ni a, hâi chu châwl rih, infiam tur emaw indo tur emawa tiam rih lo, chawlhsan rih tihna a ni. nem, mai, deih, etc. : Hetiang chi hi a hawrawp danglam vanga a thlûk dik lo ve ta phei chu a ni ngei a; mahse a thlûk danglamna hi langsar zawka a lan avangin sawi tel mai ila a tha awm e. Tun hnai deuha chin thar a ni hlawm a. Kan awmpuiteho min hmanhmuh ni maw, ‘a’ thenkhat ‘e’–a hman leh ‘e’ thenkhat ‘a’–a hman a awm ta nual mai. Mai chu mei an ti a, daih chu deih, ngaih chu ngeih, bai chu bei, paih (throw) chu peih; mai mai chu mei mei an ti a; ka peih lo tih chu ka paih lo an ti leh lawi a, ka ngeih lo tih chu ka ngaih lo an ti leh bawk si. Nem (press) chu a hawrawp thlak lovin a rik dan chauh an thlak a, nam (push) thlûkin nem an ti thung. zai, ken, thlen, etc. : I chem hman kha a hriam si a, i kut i zai ang e, i zai chuan a na duh ngawt ang te kan ti a, thingzai te pawh kan ti. Zai (ngaithei tiha ngai ri ang) chu a modification-ah zai (chaichim tiha chai ri ang) a ni a. Mahse mi thenkhatin duh mai e tiha ‘mai’ ri angin ‘zai’ an ti thin, a dik lo; zai chu bia, biak, be tih anga ri thum awm chi a ni ve lo va, ri hnih zai – zai tia hman tur a ni. Keng modification chu ken (chaw mi rawn ken em tiha ken ri ang) a ni a; mahse mi thenkhatin thutna inken hi thil mawi a ni tiha ‘ken’ ri ang hian ‘ken’ an ti thin; hei pawh hi a dik lo; zai kan sawi tâk ang bawk kha a ni, keng – ken tih a tawk. Thleng (reach) pawh hi zai leh keng ang bawk khan a modification chu thlen a ni a, zan men tiha ‘men’ ri anga lam a ni. Engtikah nge i lo thlen? Aw engtik nge ka thlen ve ang? tih ang chi hi hman dan a ni. Mahse mi thenkhatin hetiang chi tho hi a inhen tawk tiha ‘hen’ ri ang hian thlen an ti fo mai, a dik lo. Hen anga ri thlen chu chi hnih a awm hranpa a. Pakhat chu thuneitu hnen emawa lungawi lohna thlen (report, appeal) hi a ni a, modified form a nei lo, a ngai renga lam a ni. A dang chu sa lu a rawn thlen (hawn, Pawih tawngin tlun, Saptawngin bring home) tiha thlen te, Min thlen ang che ka Lalpa duhawm, Lili par vulna i hmun mawi chu tiha thlen (hruai thleng) ang chi te hi a ni; hei pawh hian modified form a nei lo, a ngai renga lam rik a ni thin. Saitualah khian ball pet hi têt tâwt tiha têt ri ang hian pêt an ti niin an sawi. Pêt chu a modified form-ah pêt a ni a, chumi ang ni lo têt ri anga pêt tih chu zai – zai, keng – ken, thleng – thlen tiha kan sawi ang bawk khan a dik thei lo a ni. inrenchem : A laia ‘ren’ hi mi tam takin inchen tiha chen ri ang hian an lam ri thin, a dik rêng emaw ti pawh an tam tawh ang. Mahse ren (sen ri ang) modification chu ren (dul pen tiha pen ri ang) a ni a, inchen tiha ‘chen’ ri ang a ni zawk tuman kan ti lo. Chuti ni siin ren chu dul pen tiha pen ri anga ren ti lovin inchen tiha chen ri anga lam zawkin inrenchem kan ti huai huai si a, sim a ngai a ni; a dan a pel tlat. inrelbawl : Inrenchem tih ang chi bawka kan hman dik loh chu inrelbawl hi a ni, rel lai tak hi. Ro rel tiha rel modification chu ro rel a thiam tiha rel ang hi a ni a; mahse ka kal zel dawn tiha zel ri angin inrêlbawl kan ti kan ti hlawm si a! Kan lo la chhût lo a ni thei e, tunah kan sawi ta a, hre reng chunga thil sual tite tih ang deuh khan hre reng chungin a dik lovin kan hmang lui zel dawn nge, kan sim ang? thawhlawm : Kohhran tinah hian hlo thlova inlâwm tiha lâwm ri anga thawhlâwm ti pawl an awm deuh theuh awm e. Dik lo titute tan chuan a ninawm deuh thin ngei ang. Thawh leh lawm hi thu pahnih thu mal pakhata siam chawp ni lovin thawh khawm sawi nana thu mala an lo hman ve hrim hrim niin a lang. Lawm hi uifâwm tiha fâwm ri anga lam hniamin thawhlawm tih tur a ni. râwlthar : Hei hi thalai leh naupang zawng zawng deuhthawin an thluk dik loh thin chu a ni. Tleirawl thar tih lak tawi niin an ring a ni mai thei. Mahse Mizo pi leh puten mipa naupang an han tleirawl tan a, an awrâwl lo thar thin hi chawiin ‘râwlthar’ an lo ti niin upain an sawi thin. Mipa tleirawl tihna a ni. paukhauh leh bangbo : A thlûk dik nia lang chu pau hi inhau loh tur tiha ‘hau’ ri ang leh bang hi inang tiha ang ri anga lam hi a ni. Mi thenkhatin pau hi nau anga lamin bang hi nangmah tiha nang ri angin an tiri thin a, an ina an bang kha a bo ta emaw tih mai tur a ni thin! uluk, huphurh, ûksâk : Aizawlah ngei pawh hian uluk leh huphurh hi lutuk ri anga lam an tam ta. Mahse a dik zawk leh lâr zawk chu muzuk fei tiha muzuk anga hniama uluk, huphurh tih a ni. Ûksâk pawh hi vawk ngûk tiha ngûk anga ûk tia a râk nasat em avangin tiha râk anga ‘sâk’ tih tur a ni. Mi thenkhatin sâk hi thil sak tiha sak ang hian lamin ûksak an ti thin, sak ni lovin sâk a ni. uiawm : Mi thenkhatin uihawm an ti. A hawrawp dik lo zinga tel awm tak a ni na a, modification kalhmang atanga sawi fiah ngai chi a ni a, ka’n telh a ni. Nui ri ang ui modification chu pui (help) ri anga ri hniam ui a ni a, uih a ni lo. Chuvangin uihawm tih a dik thei lo va, uiawm tih tur a ni. hlarua : Poetical word tihna hlarua hi hmachhuan tih ang hian lam rik tur a ni; maurua tiha rua angin mi thenkhatin an tipir a, hlarua an ti hi a dik lo. Amaherawhchu a dik lo ka han ti rawk na a, a dik loh chhan leh hmachhuan tih anga hlarua tih ngei tur a nih chhan chu upain an ti thin tih bâk sawi tur ka hre chuang lo. Tin, nachang tih anga hlarua titute pawhin hmanrua tih te nena ni thei âwmang hmehbel chawpa ti an ni tho. |awng hi a bul leh a lo nih chhan hriat theih chu tlem tê a ni. Kan hriat loh apiang rin loh dawn chuan paih tur a tam hle ang. Pi leh puten an lo hman kan chhawm a ni a, an hman dan anga hmana an thlûk dan anga thlûk hi kan tih tur chu ni maiin a lang. |hian chhan thih ngam : Kan pasalthate zara Mizo insawimawi nan taka kan hman thin thian chhan thih ngam tih hi kan lam rik dan a inang lo thluahin a lang. |henkhat chuan ‘chhan’ hi a chhan chu tiha chhan (cause) ri angin, ngam pawh hi ka kal ngam lo tiha ngam angin an lam ri a; a thenin chhan hi min chhandam tiha chhan ri angin, ngam hi ka ngam che tiha ngam ri angin an thlûk thung. A awmzia tak hi thiante chhana thih ngam (huam) tihna niin a lang a. Chuvangin chhan (rescue, help, defend) hi kan lam sual loh nan ‘chhana’ ti ila, a tawpa ngam hi hmarcha ngam tiha ngam anga lamin ‘|hian chhana thih ngam’ tih tlân hi a tha mai awm e. nuai : Hei hi sing sawm hi a ni a, nuaih ti pawl an awm a, h ri telin an lam bawk. Chu bakah ‘h’ tel lo rau rauvah nuai sawm rawh tiha nuai anga nuai ti an awm bawk. Mi tam ber hman dan chu a hawrawp lamah ‘h’ tel lo, a rik dan lamah a buai nuai mai tiha nuai ri ang hi niin a lang. Chutiang chuan hmang tlâng ila, a tha ber awm e. aman : Sam 37:5 “I awm dan tur chu Lalpa chungah nghat la, Amah chu ring la, aman a ti vek ang,” tih hi chhiar ta hlawm ila, saw zebra rân nasatzia saw tiha rân ang hian ‘man’ hi lam riin ‘amân’ kan ti thup awm e. Mahse ama’n chu amahin tih ‘h leh i’ bâna a tawp ‘n’ nena inzawmtir a ni a, amah leh in ri chu han la kawp ila, thlûk sei awm lo ri tawi ve ve a ni a, a man eng zat nge tiha a man anga ri tur hi a ni tlat a ni. Hetianga thlûka ‘amân’ kan tih tanna leh a ngheh chhoh viau dan hi a hun lai âwmang ka hre hlei thei lo. Hmanlai deuh kha chuan an la thlûk lo a nih a rinawm, Pu Buanga khan ‘aman’ tihah thlûkna a dah ngai lo em mai. Hman a nih chhoh dan tak chu hre thei lo mah ila, dik thuah chuan thlûk lova ‘ama’n’ tih hi dik zawk ngei chuan a lang a ni. he leh chu : Kan mi hmasate khan ‘mi’ hi a hrang hlirin an lo ziak a, he mi hmunah hian, chu mi lai chuan, chu mi chu Nathana fa a ni tiin a hmaa he leh chu nen zawm lo vekin an lo hmang a. Tunlai hi chuan hun leh hmun sawina a nih chuan hemi, chumi kan ti tawh a, mihring erawhchu he mi, chu mi kan la ti tho va. Mahse tunlai hian mi tam takin mihring sawina pawh thil dang sawina pawh ‘mi’ hmaa ‘he’ leh ‘chu’ reng reng thlûk seiin ‘hê’ ‘chû’ an ti vek mai a. Hun leh hmun sawina chu inzawma ziakin a ri tawia lamin ‘hemi’ ‘chumi’ tih ni se, mihring sawina erawhchu a hranga ziakin a ri seiin ‘hê mi’ ‘chû mi’ tih ni se, kan hman dan a rual thei ang. a, chu, te : A pawimawh ber zawk, a nghawng pawh tam leh thui tak mai a la awm, han sawi leh ila. Mizo tawngah hian a (particle) leh chu leh te (conj) te hi a (pron) anga ri tawi, thlûk sei loh leh tihpir loh a ni thin a. Buai hma te kha chuan naupang chang zir a lam dan tur dik ber nia hriat anga kan zirtir te khan a ri tawi chi hi kan hmang thin. Entir nan : Mi suaksualte remruat anga awm ngai lo va, Mi sualte kawng pawha ding ngai lo va, Hmusittute thutphah pawha thu ngai lo mi chu, a eng a thawl e. tih kan zir te hian suffix ‘a’ pathum – anga, pawha, pawha tiha ‘a’ leh tlar tawpa a (va) particle pahnihte leh a tlar tawp dang chu leh e te hi kan lam pir ngai lo, a ri tawi vekin kan zir a, kan inzirtir thin. Chung chu tunlai hi chuan thlûk pir chiin kan lam deuh vek tawh. Kan han ziah chhuah tâk Sam 1-na hi chhiar ta theuh ila, hmeichhe lam chuan an tipir deuh vek ang, mipa pawh a tam zawk chuan kan tipir mai thei a ni. A intan lai ka hre lo, UT kan nih hnu deuh kha chuan a pir hle tawh tih chu ka hria. Hei hi tun kum 40/50 chhunga Mizo tawng danglam nasatna ber lai a nih hial ka ring. Hmeichhe tawngin min influence a ni deuh ang em? A ri tawi hi thenkhat chuan a bung deuh vat a, a mawi lo; a ri sang pir hi a fân a, a dam a, a tha zawk te an ti. |henkhat erawh chuan a ri tawi hi Mizo tawng dik a ni, Mizo tawngah tê (small) ni lo ‘tê’ leh ‘chû’ a awm ngai lo an ti thung. 24. Hla thu lam pawh kan lam rik dik loh zualpui tal telh ve ila. a) nuam : N-u-a-m hi chi hnih kan nei a. Pakhat chu nuam (pleasant) a ni a, hlaah chuan ‘Aw a va nuam dawn em!’ tiha nuam te, ‘Chu hmun nuam chu an thleng zo ta’ tiha nuam te hi a ni. A dang chu ruam ri anga nuam tia lam, duh, châk tihna a ni. Hlaah chuan ‘Hmuh ka nuam e, chul hnu an vul tur chu’ tiha nuam te, ‘Zion khaw ri leh ram thianghlim, Hmuh ka nuam e, Lalpa’ tiha nuam te hi a ni. b) raltiang, chungtiang : Tiang hi lung intiang tiha tiang anga lam rik tur a ni a, lam (direction) tihna a ni. A lam dan hre loten tiang (stick) ri angin an lam ri a, ‘Chungtianga lengin thla an zar’ tih te, ‘Raltiang i kai ve ang’ tih ang chi te hi an hril sual phah thin. c) mawi : Sen (adj) chu verb-ah Sen (chal pen tiha pen ri ang) a ni. Chutiang bawk chuan mawi (adj) pawh verb-ah chuan sâwi (thelret) ri angin ‘mawi’ tih tur a ni. “Se chal lian leh nula hmelthain khua an mawi,” an ti thin. An va hlu em thil nung tinreng tih dawt chiaha Tlang tin mawia lungrualin tiha ‘mawi’ hi hril dik thiam an tlem hle; a ri hniam kuaiin ‘mawi’ tih tur a ni. d) luaithli : Mittui tihna luaithli hi phunthli tiha thli angin lam rik tur a ni. Mi thenkhatin thli (wind) emaw an ti nge |o thli tih angin luaithli an ti thin, luaithlipui tih pawh |o thlipui tih angin an lam ri thin, a dik lo. A rik dan pangngai chu mi hausa thli tiha thli ang hi a ni a, a modification erawh chu ‘thli luanna’ tiha ‘thli’ ang hi a ni. Luaithlipui tihah hian a modification hi hman a ni a, a ri a tawi a ni. e) lêntû : A ‘lên’ lai hi chu a buai lo, a ‘tû’ lai hi sawi ngai lai chu a ni. Zirtirtu tiha ‘tu’ ang hian lamin ‘lêntu’ kan ti deuh vek awm e; mahse dik lovin a lang tlat mai. ‘Tû’ hi ngaw tihna a ni a, tawngkam pangngaiah leh hla thuah pawh an hmang ve ve. |awngkam pangngaiah a modified form-in tuhrik te, tumau te an ti a. Hlaah pawh an hmag thin. Lianlunga hlaah khan, ‘Tu kipah chhawl kan phah e, rualin an sel’ tih a awm a, Tuchhingpa zaiah pawh ‘Zo tu phuaivawm kal luai luai’ tih a awm kha. |iau rala chhuak hlaah lêntû a vang hle, an la hmang lo a ni mai thei. Tichuan tû chu hla thuah mawi takin lêntû an lo ti a, a hnuah lêntupui an lo ti ta zel niin a lang a ni. f) râuthlâ : Mi thenkhatin Bar thla tih ang chiaha lam tur a n ti a, a thenin Vâu thla tih anga lam tur an ti thung; mahse rau hi thlarau tiha rau angin, thlâ hi hlimthlâ tiha thlâ angin lam tur ni zawkin a lang. A chhan chu râuthlâ hi arsi siâr an tih anga thlarau lehkoh a ni a, thlâ leh râu nena inpersana Bar thla, Vâu thla tih thu awm theiin a lang lo, kan hla thu siam dan kalhmang a kalh dawn tlat a ni. A modified form bawk hi sawi a ngai leh thin, râuthlalêng tih a nih chuan ‘thla’ hi a modified form a ni a, darthlalang tiha ‘thla’ angin a rik a ngai. Tichuan râuthlâ tih hi dik ngeiin a lang a, râuthlâ i ti theuh ang u. g) ramloh : Hei hi chu a hawrawp lam a ni zawk; mahse chu chuan a lam rik dan a nghawng tlat si a, sawi tel ve ila. Saihnuna hla ‘|ap lo thei ka ni lo’ tih thunawna Hmunin, ramloh tih tur kha a faten Hmun in, ram, lo tiin an ziak a, Hla thar buin Hmun in ram lo a ti thung. Ram hi hla thuah ramloh tih a ni thin a. Awithangpa paw’n ‘Ramloh khauleng, palaiah ka tir ang che’ a ti a, Zikpuii pa pawhin ‘Chuan ka nuam ramloh lentû’ a tih kha. Chuvangin Saihnuna hla pawh hi ‘Hmun in, ramloh’ tih tur a ni. A thu a dik loh chuan a thlûk a dik thei si lo va, a thlûk dika hril a nih theih nan a thu dik lo hi tihdik a ngai a ni. Heti zawng hi tun tuma ka rawn chhawp chhuah theih chu a ni e. Lo titawp tawh ila. Ka ziah tâkte bâka sawi ho atan : Kalhmang leh manhla leh hnar (nose) hi engtia lam rik tur nge? Mizo tawng hi engtin nge kan humhalh ang a, kan tihphuisui theih ang?
Posted on: Mon, 15 Jul 2013 05:52:42 +0000
Trending Topics
Recently Viewed Topics
© 2015