TUOLSUNG CHANCHIN Vol.9 Issue No.38 15-21 Dec. 2014 Muolhoi EFCI NSSD Krismas Carol ** Thawleni zan khan Muolhoi EFCI Naupang Sunday School Department hai chun Krismas Carol an nei. Naupang a za tel bakah zirtirtuhai le Kohran mipui leh meiser chawia Krismas hla sak ruolin khawsung fangna an nei. Hi huna hin bawm thilpek thlak nuom hai ta dingin bawm chawi sa a ni a, thilpek an dawng chu sumfaiin cheng 8500/- a tling phak a, hi sum hi Krismas Trip-a sengso dingin an inhlan. Chun Zirtawpzan khan Muolhoi PCI Naupang Pawl mi 400 bawrvel in khawsung fangin Krismas Carol an hmang a, Mo thar hlim Pu Francis Parate, Secy. PYF inah lutin Cake atna an nei. A tawp ah Muolhoi Public ground ah fekhawmin hlasak le Pathien thu ngaithlakna neiin an tin. NYK in thla 3 sunga dingin training a huoihawt ** Tuta kar 16 Dec,2014 khan NYK (Nehru Yuva Kendra) chun thla 3 sunga dingin Skill Development Eri Silk ti chu Sarkari Bagan, Haflong a hawngna an nei tah. Hi hawngna a hin MA Laskar, DYC, NYK le Mridul Baruah, Addl. Director Sericuilture hai le official hotuhai le mi iemanizat an thang. Training huoihawttu chu Ministry of Skill Development le Sericulture Dept. hai thangkawpin an thaw a nih. CEM le Deptt. hotu haiin Project fe lai zing thlirkirna ** Tuta kar Thawtanni khan Debojeet Thaosen CEM, NCHAC chun a chamber-ah NC Hills Dist sunga Deptt. hotuhai popo le tuta Assam Chief Minister’s Special Package chungchanga indik taka hmang a ni theina ding le sin thaw zinga um tahai financial year hma ngei zo vawng a ni theina dingin inbiektlangna a nei pui tawl. Deptt. hotu thang hai - PWD (Roads) PWD (Buildings) Agriculture, Irrigation, Education, Health & Family Welfare, Social Welfare, Environment & Forest, I & PR, PHE Deptt. hai an nih. APSC-2014 Result ** Assam Public Service Commission (APSC) huoihawt Combined Competitive (preliminary) Examination-2014 result chu Dec 17 khan suksuok a lo ni tah. Ei Dist. le khawsung a ngei khawm prelims-a inziek tling ei um nuol. Hi chanchin lak chena ei hriet thei po hai : (Muolhoi) Tv. Jonathan Lalruotsang Pena, 2. Nk. Phyllis Hrangchal 3. Tv. Zokungpui Pakhumate, 4. Tv. Dr. Robert Tuolor, 5. Nk. Sari Lungtau, 6. Tv. Japhet Darngawn, 7. Nk. Ruthi Selate, 8. Tv. Lalramsang Tuolor, 9.Medad Khawbung.10. Nk. Roboni Khawbung-Hrangajao. 11. Lalthlamuong Hekte - Mahur. Hieng lai zing hin Mains result nghak khawm ei um nuol nia hriet a nih. Kum 70 kai thangsuo puon insiltir ** Tarik 19/12/14, khan Pu Ngamrothang Hmar, Chairman NC Hills Autonomous Council chun P. Hnachangzawl (Ditokchera) khuoa Kum 70 kai ta hai po kuomah Thangsuopuon insiltirna le an bun ding chapal mi 30 chuong kuomah le Tlangva hai ta ding Mobile Handset pathum inhlanna a nei. Kha hma khawm khan Bazar(market) hmun ding khawm hi khuo a hin a lo hawng ta bawk. Pathien zar takmeu a vawisun chena ei pi ei pu mi la dam pek hai ei ropuina le malsawmna a nih tiin thuhrilna a nei a, khuo mipui an lawm hle. Village Authority khawma Thlaithleng siema bufakna neipui an tuma chu a ngai hran naw zie hril pek a, khawsung miha’n an lawm inentirna in Archal tha tak el an lo peka Pu Ngamrothang Hmar khawm a lawm em em a nih. Siemtharnawkna Camp hlawtling taka hmang ** Tuta kar ni 3 sung aw siemtharnawkna camp ICI Muolhoi a buotsai a um chu hlawtling takin Zirtawpni zingkar 10 in tindar a lo ni tah. Hi camp a hin mi 95 an lut a, Sandamna chiengtaka inhre vawnga an suok niin ei thu dawngna chun a hril. R. Suongkhung Hospital panpui ** Pu R.Suokung Zate tarik 19th Dec zan khan a presure an sang leiin damdawi in panpui a ni a, amiruokchu civil hospital-a en chi an naw leiin Guwahti panpui a ni a. Guwahati-a doctor haiin a thluok a bleeding a um an ti a, semi I.C.U ah enkawl a nih. Tawngtaina’n lo sanzui ei tiu. Dil chunga Concert nei vawikhatna Haflong: Ningani zan khan Haflong a thil la um ngai lo Don Bosco Alumni hai huoihawtna hnuoiah ‘Aqua Symphony’ hmingchawiin D$l chunga Stage inlang ah Musical Concert en man bovin nei a ni a, thlirtu mipui tamtak el Haflong lake sir vel an tuom sip mup el. Hi concert a perform-tuhai hi local band deu vawng an ni a, chun tui chunga concert vawikhatna hmu nuom ve hrim hrim khawm tamtak an um. Naute thar ** Nilaini zan khan Pu Lawmzuol Tuolor le Pi Lalhrilmawi hai inkar ah nau nuhmeite hmel lawmum tak el Haflong Civil Hospital ah a pieng suok. Ei lawmpui hle.
Posted on: Tue, 23 Dec 2014 11:07:27 +0000
Trending Topics
Recently Viewed Topics
© 2015