Tala fou o na mea e tutupu I luga o Nukunonu. Na iei lava te tama huiga o te tau mo ki tatou i Nukunonu i te vaiaho nei ko te lahiga o taimi e huhulu manaia te la kae tumau pea te havili manaia eiei foki lava na taimi nae ua ai. E tuha nei ko te kau malaga mai Fakaofo e nonofo i te fale o Tahe ma Hio i Motuhaga vena ia Atafu e nonofo i te fale o Apolo ma Panapa i tua, fakatahi ai ma na faiakoga mai Hamoa e nonofo ki laua i te Luana Liki Hotel. I te taeao oi te aho Gafua na uhu ai ia fanau akoga a Matiti vena ma na faiakoga ki te falemai Hagato Iohefo fehoahoani ki te tapenapenaga o te falemai, fakatahi ai ma na matua o te fatupaepae vena ai foki ma he tahi vaega o te malohi o te nuku e mahani lava oi galulue i te falemai, na iei ai foki he fehoahoaniga pe he fakatupega na fehoahoani ai te akoga ki te fafagaga o te galuega, na tukua atu ai lava ia fanau akoga ki te latou tukuaga tona 3 o te tauhaga. I te 8:30 i te taeao o te aho Gafua na tatala aloakia ai te akoakoga a te Mataeke o te Hikomaga ko te Financial Literacy ma te Business Training, na fakatahi uma na hui mai na motu toka 7 mai Atafu toka 8 mai Fakaofo vena ai ma te toka 10 mai Nukunonu fakatahi ai ma te Hui Pulenuku, Hui Faipule ma te Huhuga a te Tiakono, e toka 2 ia faiakoga mai Hamoa ko Maletina ma Senele vena ai ma te matua e takitaki kia Asi Tumua, na kamata ihe talohaga mai te huhuga a te Tiakono Pio Tuia, i hana kupu na matau atu kiei e leamai ko te Fakaofo ko te hopoga ia o te la, Nukunonu ko te tupou o te la kae ko Atafu ko te gotoga o te la, e fakafetai ona kua potopoto fakatahi ki Talikilagi hiki te fakafetai kia te Ia ona kua taunuku ienei fakamoemoega nae taupo tauao, na hohoko atu kiei ma te kupu a te tamana hui faipule kia Lino Isaia i hana kupu fakamalohilohi mo ki latou uma kua fakatahia ki tenei akoakoga taua ke iei he aoga ona akoakoga ienei ke uma ake te akoakoga kua iei he poto ma he iloa mafai e tagata tautokatahi ke fakaoga na taleni tautokatahi ke fakatino ai na pihinihi ienei, e vena ai foki hana fakafetai ki te mataeke o te Hikomaga mo te fakatinoga o te akoakoga tenei, i he fakamatalaga ki te taua o te akoakoga tenei ke fehoahoani ai ki o tatou lima vaivai, ma na fakamoemoega mo te lumanaki i hana toe kupu, Kua tatala aloakia te akoakoga tenei. Na maea tena oi tuku atu ai te avanoa ki na hui takitahi mai ina motu mo te latou fakatalofa e tuha ai foki ma te tatalaga o te vaiaho, na hohoko mai ai kiei te fakatalofa mai na hui ienei na malaga mai i Hamoa mo te fakatinoga o te akoakoga tenei, I he laua fakamatalaga ko te akoakoga tenei e tuha ko te taimi tona lua tenei kua fakatino ai i Luga o Tokelau, na fakatino foki te akoakoga tenei i te tauhaga 2002 e fakamoemoe ko te taimi tenei kua mafai ai e tagata ke fakaaoga loa na akoakoga ienei ke fakahavali ai ni a latou pihinihi taigogole, e vena ai foki ma te fehoahoaniga ki kaiga kua tau kamata a latou pihinihi ki te fakamautuuga oa latou pihinihi, na malolo atu ki te kaputi i te taeao i te 9:05 ma toe fakaauau ai loa ki te fakatinoga o te polokalame a te akoakoga. Ko na vaega taua lahi lele ienei na fakaholo i loto o na akoakoga ienei ko te talanoaga ki te TUpe maua, tupe fakafano vena ai ma te polofiti o te tupe totoe, na talanoa ai foki na itu e lelei ai ma a itu e he lelei ai te tupe, e tuha e lahi lele na mau vaega i loto o te akoakoga tenei e uiga lava ki na pihinihi taigogole, i haku matau atu ki loto na aoga lahi lele tenei akoakoga mo te taumafaiga ke fakatino ni pihinihi taigogole ke fehoahoani ai foki ki te tama o kaiga o Tokelau. E tuha ko te akoakoga tenei fatoa uma i te aho Lua 8 Oketopa o te vaiaho fou. I te 3 i te afiafi lava o te aho Gafua na fano ai te vaka fai popo/uto ona fanau ienei kia Apolo, Kanava, Manuele ma Leo i te 5 i te afiafi kua haoni mai ai te latou vaka ka toe taliu mai ki fenua na maua ai eki latou ni punua fonu i he latou lipoti e tuha e ova atu i te 100 o punua fonu na latou maua i te matafaga o Lalo i te Fenualoa, ma e 50 oioti ia punua fonu na mafai ke kaumai eki latou ki fale, na fakaholo uma ki latou ki kaiga takitahi mo ki latou e initalehi oi tauhi na punua fonu ienei. Ko te taeao o te aho Lua na fakaauau ai na akoakoga a te Small Business, eiei foki na matua ma he tahi vaega o tama taane e fehoahoani ki te fakavelaga o na meakai kae maihe ai te tauhiga ote akoakoga tenei. I te taeao o te aho Lua na toe taliu atu ai te malaga a te PBMatua ki Apia mai Nukunonu, na toe foki atu ai te kaumalaga a te UNDP, vena te kaumalaga a te Transport fakatahi ai ma te kaumalaga PACC. litia maiava mo na tala fou NUKUNONU TOKELAU tautuaga a te TE MANA
Posted on: Tue, 01 Oct 2013 02:16:10 +0000