Tamil Nadu CM Jaya-i kum li tang turin hrem Tamil Nadu Chief Minister, AIADMK hotu lu, J Jayalalithaa-i chu kar kalta Inrinni khan special court-in eiruk thubuaiah thiam loh chantirin, kum 4 tang tur leh cheng vaibelchhe 100 chawi turin a ti. Thiam loh chantir a nih avangin Jaya-i hi Chief Minister a nihna aṭanga a ban a ngaih dawn bakah, kum 10 chhung politics a khel zui thei dawn lo bawk. Inrinni zan khan Tamil Nadu CM hi Bangalore Central Jail-ah dah luh nghal a ni a, zanriah pawh jail-a eitur an siam ang pek ve nghal a ni. Nimin khan Jaya-i hian a awm a nawm loh avangin private hospital-ah sawn a phut a, mahse thiam loh chantir a ni tawh avangin jail dan a zawm ve a ngai thu hrilhin, jail hospital-ah jail doctor-ten an endik ang a, pawn lamah enzui ngaia an hriat chauhin private hospital hi panpui theih a ni ang. Nimin khan Jaya-i independent cell, Barrack 23-ah sawn a ni a, a prison number chu 7402 niin, a tanna jail-ah hian VVIP cell hran a awm lo. Jaya-i rual hian a ṭhian hnai tak Saisikala-i, a vahnu Ilavarasi leh a fapa Suhdhakaran-te pawh thiam loh chantir an ni a, kum li jail tang tur leh cheng vaibelchhe 10 ṭheuh chawi turin Special Judge Johna Michael DCunha chuan a ti bawk. Kum thum aia tam tang tura tih an nih avangin Parappana Agrahara-a Central Jail-ah dah an ni. Kum 66 mi, Jayalalithaa-i hi kum 1991-1996 inkarah a sum lakluhna hriat si loha cheng vaibelchhe 66.65 neia puh a ni a, a thubuai hi kum 18 chhung ngaihtuah a nih hnuah Inrinni khan Special Judget DCunha chuan Indian Penal Code Section 109 leh 120 bakah, Prevention of Corruption Act hmangin thiam loh a chantir a ni. Jaya-i hi India ram chief minister ṭanglai zingah eiruk kaihhnawihah thiam loh chantir hmasa ber a ni a, hei bakah hian a sum chawi hi special judge-in politician sum a chawi tir tawh zingah a sang ber a ni bawk. Special Public Prosecutor Bhavani Singh chuan Jaya leh midang pathumte hian High Court-ah bail-a chhuah an dil thei dawn niin a sawi a,vawiin hian Jaya-i hian bail-a chhuah dilna hi a thehluh rin a ni. Nikum July thlaa Supreme Court-in dan a siam tharah, MP emaw, MLA emaw-te chu thiam loh chantir a, kum hnih aia tam tang tura hrem an nih chuan thiam loh chantir an nih ni aṭangin MLA/MP an nihna aṭangin disqualify nghal an ni ang tiin a lo sawi tawh a, hei vang hian Tamil Nadu CM pawh hi Representation of the People Act hmangin disqualify a ni dawn a, kum 10 chhung chu inthlan pawh a chuh phalsak a ni dawn lo. Tamil Nadu CM eiruk thubuai hi Inrinni khan Bangalore bul, Parappana Agrahara-a high security court complex-ah ngaihtuah a ni a, thubuai ngaihtuah a nih lai hian Jaya-i thlawptu, AIADMK member tam tham tak chu court pawn lamah an awm a, an hotunu thubuai sawi vungtu leh politics lama an hmelma, DMK hruaitu Karunanidhi leh Subramanian Swamy limte an lo hal a ni. Special Court-in CM thiam loh chantir a, hremna tur a puan hnu hian state chhung hmun hrang hrangah buaina a chhuak zui a, AIADMK mi leh sa thinrim chuan vantlang thilte khawihin, buaina an siam a, hei vang hian sumdawnna hmun hrang hrangte pawh an inhawng ngam lo. Jayalalithaa-i thubuai hi Tamil Nadu CM a nih hmasak ber ṭuma mi a ni a, a sum lakluhna hriat si loha a hausak chak lutuk avangin Vigilance and Anti Corruption Department chuan kum 1991- 1996 chhung khan a chhui a, 1997-ah Special Court, Chennai-ah thubuai a thehlut ta a ni. Mahse DMK hruaitu, K Anbazhagan-an Jaya-i thubuai hi state chhunga ngaihtuah a nih chuan rorelna dik hlenchhuah a nih thei lo tia a sawi vangin kum 2003 khan Supreme Court chuan he thubuai hi Bangalore Special Court-ah hlanin, thiam loh chantir a ni ta a ni. An chhui hun chhung, kum 1991-1996 inkar hian Jaya-i hian thla khatah a CM hlawh chu cheng khat chauhin a la a, mahse hetichung hian kum nga hnuah a hausakna chu cheng vaibelchhe 66 chuangin a pung chho hman a ni. - See more at: vanglaini.org/ramchhung/25406#sthash.nIAulGIF.dpuf
Posted on: Mon, 29 Sep 2014 04:43:57 +0000
Trending Topics
Recently Viewed Topics
© 2015