#Tangkong Why Tangkong? Sa mga naka ila nako, palihug ayaw e-disclose ang akong identity for National Security reasons. Bitaw, wala man koy planu nga musikat mao nga nagtago lang ko sa pangalan nga “Hashtag-Tangkong”. Wala lang ko mag expect nga basahun diay sa madlang pipol ang akong mga sugilanon. Naay mga nangutana ug kinsa man na si Tangkong. Ayaw nalang gud ninyo ila-ilaha kay kung inyo siyang mailhan, dili man pud na makasulbad sa isyu sa kurapsyon sa nasud. Si #Tangkong dili ganahan mahimong public image kay natagam na siya dihang nag-artista siya sa una nga pirmi siyang hilam-usan ug intrega. Ge-link siya kang Christine Reyes sa una samantala nga in-relationship pa sila ni Anne Curtis. Mao nga mi-uli nalang siya sa Dulag ug didto nananom siya ug tangkong. Naay nangutana diri sa VsuC kung nganung #Tangkong man. Trip-trip ko ba lamang kini or naka-kaun lang ko’g tinabal nga butete mao nga nayabag nako. Mao kini ang labing tinuod nga sugilanon mga bata…….. Nagdaku ko sa usa ka baryo sa lungsod sa Dulag. And yes, usa ako ka lumad nga Waray-Waray. Nakat-on lamang ako sa pinulungang Bisaya sa dihang nag-edad ako ug 16 dihang mi-skuyla ko sa Beska. Para sa wala kabalo ug asa ang Dulag, tan-awa sa google maps, border na siya sa Aparri ug Tawi-Tawi. Rice farming ang among panginabuhi. Mag-uuma ang akong tatay ug nanay. Unom mi ka mag-igsuon. Kakha-tuka, musimos, pobre, ug mga ulipon kami sa yuta. Gikan nagka naa koy boot until grade 5 ko, sa tunga-tunga sa pilapilan mi nagpuyo. Wala mi kuryente. Ang among mga kugmo murag kopras tungod sa ano-os sa lamparilya. Ang among pinaka duol nga silingan naa sa mga 500 meters ang gilay-on. Kada adlaw (from grade 1 to 5) magbaktas mi paingun sa eskwelahan nga naay gilay-on nga 3+kilometro (1 way) samtang magsubay sa mga kapilapilan, kakawayanan, kadaruhan, mulabang mi ug sapa. Lisud among kahimtang. Sa usa ka salmon (daku nga sardinas), mag-share mi nga 6 ka mag-igsuon ug ang akong nanay ug tatay. Puro otan among kinaun, wala mi’y space maka garden ug lain nga vegetables kay kahumayan man ang palibot busa puro tangkong among gulay. Ang topography sa among baryo dili bukid. Puro patag mao nga ideal ang rice farming. Daghan pud ug stagnant water sa among baryo mao nga by early 90’s nahimong widespread ang case sa Scistosomiasis sa among lugar. Four out of ten sa among baryo infested sa Scistosomiasis. Unfortunately, sa among pamilya, 3 out of 8 namo ang nagka-scisto. Si tatay, akong manghud ug ako. Grade four ko atong mga panahuna dihang mi-abot sa stage 3 ang pag-gara-gara sa mga Scistosoma japonicum sa akong pancreas. Wala nuon miburot ang akong tiyan pero pirme labad akong ulo. Salamat nalang kay naay nag medical mission nga mga Hapon mao nga gipatumar ko ug tabletas nga mura’g liso sa santol ang gidak-on ug nawala jud sa hingpit ang akong Scisto. Musulod mi sa skwelahan nga walay bag. Ang among (with my siblings) mga lapis, papel, notebook ug libro, sa netbag namu isulod (netbag= bag gamiton sa pang-merkado). Kasagaran wala mi balon kay walay kwarta sila Nanay. Bati man kaayu ug musulod ko sa school kung walay balon busa kada buntag (school days), manguha sa ko ug tangkong ug akong banganun. Inig paingun na sa school, maglukdo ko ug tangkong kay ako e-deliber sa akong mga suki. Ang tangkong nga akong baligya, ipaka-un to nila sa ilang mga yobabz. On my way going to school, there was I, galukdo ug mga binangan nga tangkong. Imagine, 10 year old nga bata nga nag-lukdo ug tangkong paingun sa school. Ang akong netbag ipadala nako kang Ate. Usahay ang akong suki dili mupalit sa tangkong labi na kung naa pa silay stock gikan kagahapon. Mao nga mapugos ko ug libud sa baryo sa akong nilukdo ug musinggit ko ug….. Hoooooooyyyyyyy!!! Tangkooooooong!!! Hooooooooooyyy!!! Tangkoooong!!! Naa koy mga classmate nga magsungog-sungog nako nga “Tangkong”, tungod lagi sa pagpamaligya nako’g tangkong. Kadugayan, nahimo najud na “tangkong” ilang tawag nako. Bata pako ato, wala pako’y boot, mao nga dili man ko sakitan biay-biayun ko tungod sa among kapobre. Kadugayan, mas nailhan pako sa ngalan nga “Tangkong” kaysa nickname nga hatag sa akong ginikanan. Mutubag nalang pud ko ug sampiton ko’g “Hoy! Tangkong!” sa akong mga classmates kay no choice man ko. Pag high school nako, mga ka-baryo nalang ang mutawag nakog “tangkong” kay ang Dulag Nat’l High School naa man sa proper mga 7.5 kms gikan sa among baryo gamay ra’y naka-ila nako. Pag college nako, wala na’y mutawag nako ug “tangkong’ apan nakarehistro na sa akong pagkatawu ang “tangkong”. Naa cguro’y naka-ila nga ang “tangkong” nag-refer sa ako-a pero dili widely used sa beska. Dihang nag-Army ko, ang akong codename “Tangkong” sa mga radio communications, written correspondence, ug bisan kung tawagun ko sa P.A.system, “tangkong” ang ilang itawag. Kung sa una back in my elementary days, ang ngalan nga “Tangkong” gigamit sa pag discrimate sa among pagkapobre. Karun, proud ko nga mugamit sa Pen Name nga #Tangkong. Ang mga nag-bunyag nako sa ug “tangkong” sa una tangkong lang gihapon ang sulod sa ilang tiyan karun. Gigamit nila ang “tangkong” para manamay ug tawu. Apan gigamit nako ang “Tangkong” para maka-abot ko kung asa ang akong mga tiil naga-barug karun….. Ginutlo gikan sa kinabuhi ni #Tangkong - Alumnus
Posted on: Mon, 14 Oct 2013 11:25:20 +0000
Trending Topics
Recently Viewed Topics
© 2015