The Chin Times A Voi (30) Nak September Thla Chung CFB Cawlcanghnak Le Thawngthanhnak September 7 niah a voi (2) nak CEC meeting cu Kalaymyo Lai Baptist Church ah tlamtlingte in lim a si cang. CFB Register tuahnak ding ah O/C hlun bawmtu ding athar thimmi minung hna cu Pu Tial Bik, Pu Hrang Tum, Pu Ram Nawl, Pu Thang He, Pu Hrang Cin, Pu Peng Lian, Pu Thla Awr, Pu Za Cung le Sayakyi Tha Lay hna hi an si. CFB Fund caah Kalay-Kabaw-Gangaw Khrihfabu kip sin in fund hmuhkhawhnak ding caah EC lei in tuanvo an lak te lai. Chin Kum Thar caah khuanu khuapa hna sinah bawmhhal ding le inn khat pakht cio cabawm zong phawt chih a si lai. Zaanghleicawi in thazang nan rak chuah cio naklai kan in nawl hna. Cun, CFB member kip sinah inn khat pakhat cio Yearly Fee cu kum khat voi khat zong rak kholh a si lai. Chin Kum Thar ca i Lucky Draw tuahmi ticket zong atu tiang ah zuar khawh lomi a tam caah a zuartu le a cawtu hna nih tan nan rak lak cio naklai zaangfah kan in nawl hna. Chin Kum Thar ca i Lentecelhnak (1) Pumpululh (2) Paih (3) Nu Volle-ball (4) Hri dawh (6) Zawllung cheh (6) Fei khawh (7) Tlik zuam Nunphung (1) Lai laam (2) Hlasak (3) Fashion show hna hi khuakhat pakhat cio in rak i ken hrimhrim ding a si lai. Aa zuam dingmi khua hna zong nih September thla dih hlan hrim ah CFB Committee sinah thawng rak thanh ding a si lai. Lai laam kong ah nikum bantuk i CFB lei nih laam chimtu ding kha sawmpiak a si ti lo caah mah le khua/sang cio tein rak tawlrel ding a si. Capar tial zuamnak ah CFB motto a simi Lungrualnak cu kan thazang timi tlangtar a si lai. A tambik ah computer in tialmi A4 hmaihnih khat a si lai. Zumnak i aa tel dingmi hna nih, atu in tial khawh a si cang i November thla thawk ah Dr. Sang Hlei sin ap dih ding a si lai. * Kalaymyo sangkip pumpululh chuih zuamnak cu Thingunau ah tuah a si i team (21) an i zuam kho. Sanpiah khua nih pahnihnak laksawng a kan hmuhpiak caah CFB nih Kyats thongkul le Pu S.Tha Bik nih Kyats thonghra lunglawmhnak laksawng an pek hna. * 15.9.2013 ah CFB upa hna cu PindawOo, Phulmawi le Letpanchawng ah an va tlawng hna. Letpanchawng ah Pu. S Tha Bik, PindawOo Baptist Church ah Pu Cung Nawl, PindawOo Senthang Church ah Dr. Sang Hlei le Zotung Church ah Pu Thang Zung hna nih thawngtha phuannak caan an ngei kho. Chun hnu cun Phulmawi khuanu khuapa hna he tonbiaruahnak an ngei. * Kyarinn khua kan pa a simi Pu Than Sang (70) nih 7.9.2013 niah mual a kan liam tak. Ngaihchiatnak a tongmi chungkhar hna cungah thlaza rak campiak cio hna u sih. * Kalay sianghleirun siangngakchia chung in rit-sii a hmangmi minung pakhat cu an tlaih tiah thawng kan theih. Sianghleirun chung i certual, Kumain tiva le suhkhinta tlang hna ah rit-sii an hmang len hna. Cheukhat cu a chunh tiang zong an i chun tiah Kalaymyo palik bawi U Soe Myint nih a chim. Pastor Ruth Dar Pen Nih Mual A Kan Liamtak Cang Pathian rian ah zumhawktlak le bochanawktlak nusal kan i ngeihmi Zion Baptist Church ah kum saupi Pathain rian a tuanmi Pastor Ruth Dar Pen nih September 4 niah mual a kan liamtak cang. A ruak suanni ah Kalaymyo Laimi a simi paoh nih cun ruak a thlah lomi an um lai lo tiawk tiangin minung cu kan tam ngai. Sianghleirun a kaimi siangngakchia hna le Kalaymyo Pastor te cu an zate an tling dih. CBA minister le LCF upa hna nih a ruak cungah upatpeknak zong an ngei. Zion Biakinn chungah a ruak zong an suan i minung tlumawk tha lo tiang in kan tam. Pastor Ruth Dar Pen cu Thantlang peng Khuabung khuami Pu Tei Cin le Pi Ngun Tang hna nih March 10,1975 kum ah an ngeihmi fanu a si. Chuahpi unau pa(8) lakah a pa (7) nak a si. Tluangram khuami ( Pu Biak Ling) he an i um i fanu fangkhat Dawt Tha Par an ngei. 2006 kum ah a pasal nih a rak thihtak hna. 1995-1998 tiang Kalaymyo Bethel Bible Sianginn ah sianginn a rak kai. 1998 kum in Zion Baptist Church ah Pastor in a thih ni tiang a tuan. 2000-2004 tiang CBA Women Secretary le 2012 in CBA Women President rian a tuan. “ Pastor Ruth Dar Pen hi kan Khrihfabu nih nucan i kan zohmi a si. Amah he Zion ah Pastor rian a tuantimi Pastor pahnih hna nih an rian an chuahtak ko nain, anih cu khrihfabu a daw i Pathian rian ah zumhawktlak le bochanawktlak a sinak cu a thihni tiangah khrifabu hmai le Pathian hmaiah zumhawktlak nusal tha Pathian riantuanmi a sinak cu a lang” tiah Zion Church Pastor Rev. CH Sui Hre nih TCT sinah a chim. Pastor Ruth Dar Pen cu ruahlopi in a thi a kai i September 2 ni zingah Kalaymyo Sii-inn Pi ah a lut. Sii-bawi te nih anti khawh tawkte in an thlopbul ko nain minung nunnak cu Pathian kut ah aa hngat caah September 4 chun sml 1:00pm ah zumawktlak tein a rian a tuanmi a Pa Pathian sinah aa din cang. A fanu a ngeihchun Dawt Tha Par hi Kalay University ah Zoology kum hnihnak a kai lio a si. Atu September 16 ah caminpuai zong an thawk cang i ngaihchiatnak a tonmi cungah thlaza rak campiak cio hna u sih. Kalay University Degree Laknak Hall Kyats Ting Thonghra Dih In An Sak Lai Kalay University i Degree laknak dingah a sau pee-206 le a tung pee-184 Hall cu Kyats ting thonghra dih in sak an timh ti thawng kan theih. Degree laknak hmun cu a um rih lo caah mandat sak chom i tuah tawn a si caah Sagaing ramthen cozah sinah an hal i, Degree laknak Hall pinah ca cawnnak hmun inn pathum, dot thum in sak chih ding zong a si. Ca cawnnak hmun pakhat ah Kyats Ting Thongruk a dih lai ti zong theih a si. “ Degree laknak Hall cu raulote chungah sak kan awt cang lai i, ca cawnnak ding hmun thum, dot thum cu atu kan sak cuahmah lio a si” tiah Kalay University (Pamohkhahchoh) U Myint Shew nih a chim. Kalay University chung i ca cawnnak khaan (Room) khat ah minung 100 tluk ca an cawng kho i, tukum 2013 kum ah siangngakchia 4000(thongli) leng an um. Kum khat minung 1000(thongkhat) leng Degree kan pek hna i tukum kha a voi (7) nak kan pek dih bak a si ti zong a chim chap. Kalay University ah Sagaing ramthen chung in Kalay, Kalaywah, Tamu, Mawleih, Minkin pinah Chin ramkulh chung in Thantlang, Hakha, Falam, Tedim hna in sianghleirun an rak kainak hmun a si. Kalay University cu Tedim peng Khaikam khua pawng le Sagaing ramthen Kalaymyo peng ah a ummi sainghleirun a si. Feb16,1993 kum ah Kalay College tiin rak dirhmi a si. July 7,1999 kum ah Degree College tiin le May 14,2003 kum ah Kalay University tiin a rak kaimi University a si. Pu Zo Tum Hmung Le The Chin Times TCT : Ka pa na sining a tawinak tein na kan chim kho hnga maw? ( Khua/chungkhar kong/Education/ Riantuanmi le riantuan liomi hna) ZTH : Thantlang peng Zephai khua ah ka chuak. Fapa pathum le fa nu pakhat ka ngei. Harvard University in Master in Public Administration degree (foreign policy le negotiations ka lak) cu 2003 kum ah ka dih. CNF Supreme Council Member (Thantlang peng) ka si. TCT : Ka pa ramdang na phak hnuah teh Myanmar na rak tlung bal cang maw? ZTH : December thla 2012 kum ah Yangon tiang ka rak phan. CNF le cozah peace talk ah ka rak i tel ve. Yangon ah nithum lawng ka caam. U.S. Assistant Secretary of State (PRM) Anne Richard he Mizoram i Chin miphun kongah State Department ah iton ding kan si caah Washington, DC ah ka kir than colh. Cingla rualchan le hawikom hmanh an kut ka tlai manh hna lo. Kan ram Lairam belte ka phan kho rih lo. TCT : Ka pa Guam lioah laimi hna a chanhchuahtu bik hi nangmah na si tiin kan theih caah, zeitindah na rak chanhchuah hna i, minung pazeizahdah an si? Zeibantuk in dah rian na rak tuan? ZTH : Atawinak in chim ahcun Health and Human Service Secretary Tommy Thompson nih bawmhawk ah minsen a thut caah Guam in Chin miphun 1000 deng U.S. ah an lut kho. Chin miphun kongah U.S. cozah i vuanci (cabinet minister) tiang nih minsen a thutmi ka ruah than lengmang tikah Pathian dawtnak thawng lawnglawng in a si, tiah ka ruat. TCT : Hlan ah Malay UN zung i rian na rak tuan lioah Chinmi pawl ram 3 nak ah tampi na rak thlah khawnh hna ti thawng kan theih. Nai te June thla zong ah nangmah le Pu Lian Uk Malay nan va tlawn hnuah UN nih Chinmi pawl an lak than hna lai ti kan theih than tik ah UN he pehtlaihnak ah na riantuan khawhmi nan kan chim kho hnga maw? ZTH : UNHCR nih mi thar lak than dingin timhlamhnak a rak ngeih cia ko cang. 2010 kum in UNHCR nih mithar a la ti lo. Cu tikah 2011 kum zongah Malaysia voikhat ka phan. U.S. cozah zongah kan chim len cang. Chinmi i kan pa pakhat a simi Pu Lian Uk he UNHCR kan ton hna tikah anmah zong an i lawm ngai ve ko tiah ka ruah. United Nations High Commissioner for Refugees (UNHCR) zungpi hi Switzerland ram Geneva khualipi ah a um. UNHCR zung tengnge cu Kuala Lumpur, Malaysia ah a um ve. UNHCR Gevena nih Malaysia ah riantuan dingin 2003 kum ah an rak ka theihter. Keimah nih ka hlat hmasami a si lo. Cun, Malaysia i Chin Refugee Committee i lutlai a simi Pu Victor Khen Sang zong nih a rak ka sawm len cang. Cutikah 2004 kum February thla ah UN zung riantuantu (UN staff) sinak in Malaysia ka phan. Ka tuan bikmi cu holhleh a si ko nain, UN zung riantuantu pakhat ka si ve bantuk in UNHCR staff meeting kip ah ka tel ve. Cu tikah Chin miphun kongah ka siaherhmi vialte chimh khawhnak caan ka rak ngei. Malaysia i Laimi thong an tlaknak thonginn pi hna le immigration detention camp ka phak lonak a um lo. A har taktak ko. Lahkhah zong chim tlak lo a si, ka degree kong ruah ahcun. Asinain, Laimi caah a si caah ka tuanmi a si i, nihin tiang kaa ngai chih lo. TCT : Atu i Malaysia le Delhi i kan laimi ralzam hna khi teh, ramthumnak an phak khawh lai na zum maw? UN nih zeitin dah an ruahning a si? ZTH : Ka zum lo. Ram thumnak kal kongah UN kut ah nawl ngeihnak a um lo. A latu ram, tachunhnak ah U.S. le Australia tibantuk ram hna, kut ah bia a um. Kan ram that lei a panh ahcun kirthannak kong UN nih a tuaktan te lai. TCT : Laimi hna ramthumnak tiang an phak hnuah hin, an tlonlenning hna na hmuh ning na kan chim kho hnga maw? ZTH : A tha ngai tiah ka ruah. Laimi cu rian ah kan teima tuk. Zumhawktlak kan si. Duh a nung setsai lomi thawngpang zong a um kho ko. Cu bantuk thawgpang a um hmanh ah Nga fuan lio kong he ka tahchunh tawn. Nga fuan lioah Nga lawng an kai lo; Uktlak pakhat - hnih an i tel ko. Mah bantuk cu kan si. TCT : Atu Myanmar ram ah a tangmi Laimi hna hi teh, ram chuahtak in ramdang leiah van ra kho peng rih hna seh law a tha lai ti na ruat maw? ZTH : Ka ruat lo. Kan ram, kan vawlei chuahtak ka siang lo. Pathian nih a kan pekmi a si. TCT : Hmailei ah Laimi hitin kan i thek peng ko ahcun, zeibantuk dah thil kan ton khawhmi a si ti na ruahmi na kan chim kho lai maw? ZTH : Atu bantuk in kan chuah tak rih ko ahcun kan ram ah Chin miphun an tlawm chin lengmang lai. Mah cu a tha lo ngai te lai. Asinain, ram thumnak ah a phanmi kan fa le hna nih kan ram an ser te lai tiah ruahchannak nganpi ka ngei. TCT : CFB nih a voi (2) nak Chin Kum Thar Khampat khua i tuah ai timhmi ah, CFB kan pa le nih sawmnak ca kan kuat cang an ti i, rat ding in teh na lungah a um maw? Rat khawh dawh na si te lai maw? ZTH : Rat ka duh ngai ko. Kai fiang rih lo. A ka sawmtu CFB upa hna cungah lunglawmhnak bia chim cawk lo ka ngei. TCT : The Chin Times a reltu hna sinah bia cah na duhmi? ZTH : Pathian dawtnak hngalh zungzal i zuam usih. Miphun a dawmi le ram a dawmi si i zuam hna usih. TCT : Ka pa hibantuk in na caan na kan tenhpiak caah na cungah kan i lawmtuk. ZTH : Kei zong kai lawmtuk ve ko ka fa. Chin Kum Thar ah hmaitonh in kan i ruah than te lai mu. Tonnak a tuahtu - Pa Bawi CNP le CPP Ikomhnak Ding Kongah Chin Tv Le Pu No Than Kap Itonnak Chin Tv nih Pu No Thang Kap cu tonnak an ngei. CPP le CNP ikomhnak kong an halmi ah a lehmi hna cu, komh a duhmi cu keimah ka si. Komh ding in bia a chim hmasami zong keimah ka si tiah a leh hna. Asinain kan i komh khawh lonak cu a lian deuhmi CPP party le a fa deuhmi CNP party von i komh tikah covo aa tluk ding cu a si thiam lo. Cun, a fa deuhmi CNP nih covo itluk tein an duh tikah, cucu kan i komh khawhlonak a si tiah a langhter. CPP hi a ngan deuhmi party a si caah, a covo zong a ngan deuh awk a si- CNP hi a fa deuhmi party a si caah, a covo zong hi a hme deuh awk a si- nain a ngan deuh zong ah 50, a hme deuh zong ah 50, 50/50 in kal cu a si thiam lo tiah a leh hna. CNP le CPP Ikomhnak Ding Kongah The Chin Times le CNP GS Salai Ceu Bik Thawng Itonnak CNP le CPP ikomhnak ding ah covo kong kan i ceih rih lo. Ikomhnak ding kong lawng kan ceihmi a si. Ikomhnak ding caah a biapi bikmi pakhatnak cu covo kong ceih ding a si rih lo. Party ikomhnak ding ahhin Election Committee nih Guide-line a kan tuahpiakmi a um. Cu Guide-line ning in cun tuah a hau. Cu Guide-line chung i a ummi cu kap hnih party i chungtel CEC hna nih ikomh kan duh ko tiah min thut ding a si. Cu min thutmi cu Naypidaw election committe ah kuat ding a si. Election committee nih an hnatlak hnu lawngah covo kong hi iceih te ding a si. Pu No Than Kap nih covo kong a chimi kha cu Party pahnih ikomhnak ding ah tuah hmasa ding a si lo. Atu party ikomh ding ah CNP nih min kan thut dih cang. CPP lei in minung 7 a thu ding an um i atu tiang ah minung pathum lawng nih an thut rih. Cucaah, atu tiang kan ikomh khawh rih lonak a si. Cun Pu No Than Kap nih “ komh a duhmi cu keimah ka si. Komh ding in bia a chim hmasami zong keimah ka si” a ti si ahcun a ziah atu tiang party ikomhnak dingah min a thut duh rih lo ti hi a si. Ruakvuinak I Caan Kan Hman Tikah (1) Thihlohnak a tong i ngaihchiatnak mitthli a tlami hramhnak hmun le ruakvuinak programe hi mah policy le mah tuanmi rian nolh lengmang in chimnak hmun a si tiah ka ruat loh. (2) Thihnak a tongmi hna hramhnak hmun i rian cu mah le khrihfabu cio nih an i zohkhenh pinah TLCF le Lai Seino nih tlamtlingte in an kan tuanpiak lengmang komi a si i, an nih nih an tuah tuanmi kong an chim bal lo nain Laimi kan caah biatha tampi a chim tawn. (3) Ruakvuinak hmun le caan i miphun kip hmai ah a hmemi riantuannak ngaihawktlak set lomi mah policy nolh than lengmang hi ruakvuinak a rami miphun dang kan hawile hna an hmai ka khap lo. (4) Ruakvuinak caan paoh ah caan a tuahtu Pastor te kha va hnahnawh peng ding a si tiah ka ruat loh. Siaherhnak in Pu Chan Lian DVD A Chuak Cang Pathian thangthatnak ah ngakchia mino hna nih Thinlung, Ruahnak, Kut le Ke, Bia le Hla, Riangawn phuntling he lunglawm thanuamte in mah le Biakinn cio ah caan an hmanh khawh nak ding caah tiin Pastor Moses Sang Khuai Thang( Bethel Baptist Church, Hakha) nih chuahmi Lai, Kawl, Mirang hla telhin a dihlak fung 25 aa telmi “ Kan Kut Ke In” timi DVD a chuak cang. Sunday School hla deuh a si i, na khrihfabu ca zongah siaherhnak in thazang pek khawh a si. ( Hmuhkhawhnak - CBA Kalaymyo) The Chin Times Nih Hlutdaw Kuzale Pu Ruben Tonnak Kan Tuah I Chin Ramkulh Kong A Chimmi:- Chin ramkulh cozah riantuannak parliament chung i a kan leh tawk ahcun (1) A kal ciami rian pawl ning cangte in a kal khawh ding kha an tuanmi a si. (2) Kan ram hi lam a herh an ti caah lam hi ti khawh tawk in Chin ramkulh tavuankhan a simi သစ္ေတာ၀န္ႀကီး U Win Thun nih cunglei level in tuanvo a lak. (3) Electric mei hi saduh thahpiak lio a si. Electric hi phun hnih a um. Cazoh lei in 66MW timi a um i atu an rak bunh cuahmah lio a si. Gangaw hrawng cu a phan cang. Hakha hi tukum 2013 ah dih ding in tiah an ti i an tuah cuahmah lio a si. Fimcawnnak lei ah hin cu tanghra result ah Myanmar chungah a niambik kan si. Kan niambik tiah kan timi hi a phun phun in a um. A tlamtling lomi siangcachim sinin a kaimi an tam ruang zongah a si. Cun, a niambik kan si ko nain ka i uanpi ngaimi cu Hakha nih hin a thianghlim bik in caminpuai kan phi ti cu khuanu khuapa vialte nih theih le riantuanmi dihlak nih theih a si. Firnak pakhat hmanh um lo tein caminpuai a phimi kan si caah kan i uanpi ngai. 2013 Chin ramkulh hrang i parliament nih Budget tuahmi cu Taan Thongkhat a si. Hi Taan Thongkhat cu myone pa (9) hna ah phawt a si tikah Ting Thongkhat le Zakhat cio kan hmuh. Myone a hme a ngan ti thleidannak umlo tein phawtzamh cio a si. Tangkaa cawih a herh i chawlehnak caah maw a dang dang tuan a herh tinak ah hmang hna sehlaw a hram cu tlau hlah seh ti kha kan duh caah a kan cawihmi dirhmun in tukum Budget cu a kal. Sagaing RamThen Hlutdaw Kuzale U Khin Maung Tan Nih A Ralaimi Kawl Tadincuat Ah CNP le CNF Ikomh In Tamu Peng Khampat Khua Ah Mizapi Tonnak An Tuah Lai A Ti Kalay-Kabaw khua hna ah CNP le CNF nih zapi tonpumh biaruahnak atu le atu an tuah tawn i, a ralaimi kawl tadincuat (October) thla zongah CNP le CNF ikomh in Tamu peng Khampat khua ah mizapi tonnak tuah an i tim tiah Sagain Ramthen Hlutdaw Kuzale U Khin Maung Tan nih a chim. CNP le CNF hna hi Kalay-Kabaw ah an rak tlung tawn i zapi tonpumh biaruahnak an ngeih tawnmi hi Kalaymyo Hlutdaw kuzale hna nih faak ngai in duhlonak kan langhter lai tiah a chimchap. “ Kalay-Kabaw cu kanmah ram a si. Kanmah tein kan i fimhlom kho ko. CNF cu phung ningin dirhmi Party a si lo pinah an ram leng in kan ram ah mizapi tonnak hna hi an tuah awk hrim a si lo. A ralaimi kawl tadincuat (October) ah Tamu peng Khampat khuaah CNP le CNF ikomh in mizapi tonnak tuah an i timhmi hna hi Tamu hlutdaw kuzale nih duhlonak an langhter hrim awk a si” tiah U Khin Maung Tan nih cun a chim. U Khin Maung Tan nih News Watch Weekly thawngzamhca ah a chimmi cungah hlutdaw kuzale S. Tha Bik nih “ CFB nih kum (1) voi (1) Chin Kum Thar kan tuah. 2012 kum kha Kyarinn khuaah kan tuah i, CNP, CPP, CNF, CACC hna cu kan sawm hna. Tukum zong CFB nih Chin Kum Thar cu October thla Khampat khua ah kan tuah than lai. Hi tuah dingmi ah CNP le CNF he zeihmanh ipehtlainak kan ngei lo. CNP ,CNF, USDP, GCCF le CACC kan pa le hna cu kan sawm ve ko. Aruang cu Laimi kan pa le an si i ruahnak tha tha le thapeknak hna rak kan phorh/pe hna seh ti duh ah a si” tiah a chim. Chin Ramkulh Sianginn Kip Ah Computer Bunhpiak Dingah Thit Sa Oo Nih A Ngah Chin ramkulh sianginn kip ah computer le internet bunh dingin CNF nih August 13 ah kawhnak ca an thanh i company pathum nih an sawk. A sawkmi chungin Kalaymyo Thit Sa Oo in Pu Ni Lian Sang nih a ngah. Denmark cozah bawmhnak thawngin CNF nih Chin ramkulh (အထက) siangsangrun kip ah computer le internet bunhnak ding caah Denmark tangkaa in ting thonghra a dih ding a si tiah CNF in Dr. Sui Khar nih a chim. Hi rian tuan hram thawknak ding caah Chin ramkulh cozah le Dr. Sui Khar hna cu tonnak an ngei cang i, September (tuthla) in tuan hram an thawk cang lai. Siangngakchia 14 nih computer pakhat hman khawh ding caah Tonzang ah computer 30, Tedim 135, Falam 68, Hakha 140 le Thantlang ah 41 cio tiin an chiahpiak hna lai. Chin ramkulh siangsangrun 30 ah bunhpiak an si lai i electric mei a chambau lai caah meiseh in nikhat sml 4 chung hmang kho ding zong in bawmh an si lai. ( Khonumthung) Chin MP Hna Nih Zapi Tonnak An Tuahmi A Um Huaha Loh Ti Chimmi Cungah Hlutdaw Kuzale Pu S. Tha Bik Nih Lehmi CNP hlutdaw kuzale nih mizapi tonnak cu kum (1) voi (1) kan tuah. Ni kum kan tuah cang i, tukum kan tuah kho rih lo. Hlutdaw kan kal i, kan van tlun paohah mizapi tonnak kan tuah kho lo. Mizapi tonnak tuah dingah Pithawngsuh hlutdaw le CNP zung nih Budget a kan pe lo. Tonnak tuah duh cun mah le Budget te a hau. Tahchunnak ah Laitlang Sur khua ah mizapi tonnak tuah kan duh ahcun tlunkalnak le tonnak tuah tik i a herhmi thil dihlak mah nih tangkaa thawh a hau. Hlutdaw kan kal ah tlunkalnak Air/Bus ticket cu hlutdaw nih an kan rin i nikhat ah DA Ks.10000 (thonghra) a kan pek. A thla thla in meeting kan tuah tikah DA a kan pekmi cu din/ei man ah a dih colh ko. Zapi nih hlutdaw kuzale pawl he tonnak tuah an duh cun, anmah lei nih pehtlaihnak tuah a ngah ko. Ca in kuat, phone in chawnh le party zung thumi hna sin zong in tonnak tuah khawh a si. Aho an si le, khuazei in an si kan theih lo tikah, anmah lei nih pehtlaihnak kan tuah hna sehlaw tha tein bia zong kan i ruah kho ko lai. Mizapi cu tonnak tuah kan duh ngai ko. Hi tonnak kan tuah khawh lomi, tonnak tuah ding ah Budget kan ngeih lomi hi zapi nih kan theithiam u law kan duh ko. Rit-sii A Tlaitu Kalaymyo Palik (ဒုတပ္ႀကပ္) Myo Zaw Oo Cu Upadi Ningin Taza Cuai A Si Kan hnu kum November 7,2012 ah U Kyaw Sinh mawအaw in Kalay-Gangaw lei a kalmi cu Kyarinn khua ah Kalaymyo palik (ဒုတပ္ႀကပ္) Myo Zaw Oo le palik pahnih nih an dirter i, mawအaw chungah Sadu rit-sii buri dip 14 an hmuh. Kalaymyo palik (ဒုတပ္ႀကပ္) Myo Zaw Oo nih dip 5 aa lak i, a tangmi dip 9 cu a rak tlaih hna. Cucaah September 6,2013 niah Kalaymyo palik (ဒုတပ္ႀကပ္) Myo Zaw Oo cu an tlaih i hlathlainak an tuah. “ Myo Zaw Oo hlathlainak kan tuah cuahmah lio a si. A rak tlaihmi pa U Kyaw Sinh nih rit-sii ka rak phurhmi ah a ka tlaitu Kalaymyo palik Myo Zaw Oo nih dip 4 a rak i lak ve tiah ripawt a kan pek caah (ဒုတပ္ႀကပ္) Myo Zaw Oo cu kan tlaih i မူးယစ္103^2013 le ဥပေဓ 15^18 (ဃ)21 in kan tlaih hi a si” tiah ရဲမူူးSoe Myint nih a chim. Kalaymyo Sii-inn Pi Kongah Athet Chindwin Mino Chimmi :- Kalaymyo sangkip in pumpululh chuih a ni thumnak ni (9.9.2013) ah Indainkung le Nguangpinta chuih lioah, Nguanpinta lei in a chuihmi pakhat cu aa khawn sual ruangah a kut a kiak. Certual ah pumpululh chuih a rak zoh vetu Kalaymyo Sii-inn uktu sii-bawi nih a lak in kan thlawp lai a ti. Cucaah, a kut a kiakmi pa cu sii-inn ah an kalpi i, X-ray cheknak ah sii-bawi an um loh, minung zong hohmanh an um lo i minutes 45 an hngah. A kut a kiakmi pa cu a hliamhma a fahtuk caah a lenglei sii-inn ah kalpi an timh i, nurse sayamah pakhat nih “ nan rak luh cang hnu ahcun, sml 24 tal nan um a hau lai” tiah a chim hna. Sii-inn pi a si ko nain, thlopnak zong um lo, sii-bawi te zong um lo i, mizaw a tlawmbik sml 24 um ding cu zeitin dah nan ruah cio hna? Kaladan Project Kongah Myanmar Cozah Le India Cozah Tonnak An Ngei Lai Myanmar le India ram ikomh in tuah an i timhmi Kaladan project kongah Chin le Rakhine party hna khua upa hna he tiin India ram New Delhi ah tonnak an ngei lai. India cozah nih Kaladan project kong he pehtlaiin khuami hna nih zeitindah an ruahning a si ti hngalh duh ah September 18 ah India ram khualipi New Delhi tonnak ngeih an timh hi a si. India cozah he tonnak ah Rakhine party RNDP le Chin ram in CNP party hna an kal lai. Kaladan project cu Chin ramkulh Paletwah in Rakhine ramkulh Settuai tiang mawtaw lam le ti lam hna ser ding a si. Hi project hi 2008 kum lioah kaphnih ram hnatlaknak in minsen an rak thut cang i, 2013 kum ah lim dingin ruahmi a si. 2013 kum chung ahcun lim khawh dawh an si loh ti theih a si. (RFA) Zei Caah Dah Kalay-Kabaw-Gangaw Ram Cungah Chin Kum Thar Kan Tuah S. Tha Bik A voi (2) nak Chin Kum Thar cu |amu peng Khampat khua No.(4) ah a ralaimi October (17-21, 2013) tiang ‘Chin Funtomnak Bu’ hruainak in le khampat khuanu le khuapa hna tanrualnak, miphun an tanhnak ruangah tuah kan i tim than. Kan hnung kum October thla ah Kalaymyo peng Kyarinn khua ah hlunghlai ngaiin Kyainn khuanu khuapa hna i zuamnak le ‘Chin Funtomnak Bu’ an tanh ruangah tlamtlingte in kan rak tuah khawh. Zei caah dah “ Chin Kum Thar” hi rethei zaangba ngaiin le ramchung ramleng nu le pa sin in bomhhal bu le fund kawl bu in kan tuah tihi atu chan kan fa le kan nau a hlei in Kalay-Kabaw-Gangaw ummi mino pawl nih theihloawk a that lo tiah a tang lei thil pawl ka van langhter hna. a. Laimi cu hlan ah khuachia khuavang, lungbo thingbo a rak biami kan rak si. Kan Pa le chan i Pathian an rak zumh thawk in Laitlang cu Khrihfa ram, Khrihfa miphun ah kan hun i mer. Hlan lio kan Lai nunphung kha duhsah tein Khrihfa biaknak phung nih le chanthar nunphung nih a hun khuh lengmang tikah, Laimi kan nunphung cheu khat, tu Chan kan fa le cheu khat nih an hngal kho ti lo. Kan u le catialthiam pawl nih kan nunphung kan laam tlau hlah seh tiah ca in an kan tialpiak lengmang ko nain atu chan kan fa le nih rel zong an thiam lo i, rel zong an zuam ti lo leng ah hngalh ding zong an i tim ti lo. Laimi nih Chin Kum Thar kan ngei cio dih ko. Tedim nih ‘Khuado’ an ti , Falam nih ‘Fang Er’ an ti, Mindat le Kanpalet lei nih ‘KumSi’ puai an ti. Kan nih Hakha lei nih ‘Lai Kum Thar’ a si lo le ‘Tho’ ti a rak si ve ko.(Atu ahcun Chin Kum Thar ti a si cang). Kan tuah caan aa khat dih. Fur dih hnu khuasik a hung phak hlante ah a si i cucu October thla a dih lei kapah a hung si cio ko. Cucaah kan nih holh a hrawmmi Hakha miphun nih ‘Tho’ timi ‘Chin Kum Thar’ kan i ngeihmi kha atu chan thar kan fale nih thei kho ding caah kan Lai nunphung pakhat a si vemi kha kan hun thar chuahmi a si. Kan unau hna cu an kumthar kha kum chiarte an tuah khopeng ko. Hmai lei ahcun Tedim, Falam, Hakha, Mindat, Kanpalet hna he hi kum thar puai hmanh i hrawm kho ding in Laimi phun kan rian nganmi pakhat ah i chiahawk hrimhrim hmanh kan si. b. “Chin Funtomnak Bu” nih a tinh bikmi cu ca le nunphung kilven ding hi a hmasabik ah tuan aa tinhmi a si bantuk in , hi Chin Kum Thar puai nih hin kan nunphung dang dang laam siseh , paih siseh, a dang dang nunphung leng in lentecelhnak hna zong hi khua khat le khua khat i funtomnak ding caah tuah chih ding kan si. c. A donghnak ah hi a cunglei thil hna nih hin Kalay-Kabaw-Gangaw nelrawn um mi holh a hrawmmi kan Chin miphun hi ruahnak khat, lungthin khat tein i funtom kho ding le hmai lei kan thancho deuhnak caah na tanpi awk, kan tanpi awk hrimhrim a si ti hi thei cio usih law, hi ‘Chin Kum Thar’ tuahmi nih kan funtom chin lengmang ko seh tiah kan sawm hna.
Posted on: Thu, 19 Sep 2013 00:44:01 +0000
Trending Topics
Recently Viewed Topics
© 2015