Thloh Awk A Ttha Lomi Lawmhnak Biangno Cung Mittli. (Rel dingin kan sawm hna) 26.12.2014 zaanlei suimilam 2 biakinn ka phan. Biakinn chung ahcun mithmai panh tak tak in mino hna le mipi ka vun hmuh hna. Malaysia CCF Puchong nungak dawh dawh le, pasal ttha tha nih kan lai thuam i hruk in zaihla remh dawh cu an rak cawn lio a si. A mithmai panh ko nih khin mi thinlung a hlip hlau ter. Hla hung cawng ve tiah an ka sawm nain laithil kai hruk lo caah ka telpi hna lo. Saunawn khi ka tthu i bia kan i ruah hna. Cu tlawmpal ah kan speaker nih , kan donmi hna kha lam an tlau e, lungsau tein hung hngak ko rih u law tiah thawng a kan thanh. Mikip thinlung zoh ahhin ngeihnak mithmai a lang cio. Cuticun suimilam pakhat chung kan hung kal. Cu tlawmpal ahcun zeizat dah an ra kho hnga tiah mipi hmai dir riangmang in mipi minung ka rel hna. Ka rel khawhmi hna cu minung 250 reng lo kan si. Cu tlawmpal suimilam 3:00 P.M ahcun hmuh kan i ngeih tukmi le, zeibia dah a kan ruah te lai tiah kan i hngah hlangmi Chin mi vialte kan Pu Ralbawi Col. Solomon Thang Ding le , upatawk a tlakmi CNF upa hna cu hluai ruaimai turuun bang, kan biakruun cu an hung phan.. Biakinn tangin nungak dawh dawh hna nih kan Pu Solomon cu tthi an oih hnuah biakinn chungah an hung lut. Bulpit leiah an hung kal i, mipi nih upat peknak caah kan dir piak dih. Kan Pu. Solomon cu ka sirlei ah a hung kal diah mah. A mithmai dawh te ka hun hmuh bak khin , ka hnarno a ka ttam colh i , ka mittli a luang. Ram ca nunnak pek bak in le, Chinmi nih zalennak kan hmuhnak ding caah kum a sau pi rian a tuan hnu, a hmai hmanh a sawng deng i tar leisang a hun panh ko cang nain , ka mithmai hmuh ahhin ai dawh hringhran ko. Miphun ca a ttuanmi hi cu zei a si paoh ah, muichia kha an si zongah dawhnak in pei an khah hi ti zong kai fiang. Hi bantuk pasal ttha hi Chinmi nih kan herh tuk hringhran ko. Kum upa an si cang caah an kum nih a deuh lai lo i ahodah amah ai rawl tu um te hnga tiah keimah le keimah bia kai ruah colh. Cuticun, mino hna nih hlaremh dawh an sak piak i , tlawmpal ah amah kha caan an hun pek. Mipi hmaiah dirin bia a chim hlan hmanh khi kai ngang kho ti lo. Zeibia dah a chim lai tiah kai hmanhhmawh tuk hringhran. Cu tlawmpal ahcun keimah mithmuh kuttongh tein, a bia chimmi zong kan van ngeih khawh. Video lawngin ka rak zoh tawnmi kha, ka mit tein ka hmuh cang i kai lawmh tuk ahhin, a chim zia zong ka thiam lo. Bia a chim dih hnu ah kuttlaihnak nawl an kan onh i, kut a tlai hmasa tu 3nak ka si. :) Kan Pu mithmai zohah ngaihchiat lo awk a ttha lo i,lunglawmhnak mitthli zong luan lo awk a ttha hrim lo. Hi suimilam caan tlawmpal chungah a chimmi a bia hmanh hi kei ka ca cun a rak sunglawi tuk. CNF\A ralkap pawl, ramca an rak tuarnak le, rawlei awk hmanh ngei loin, tupi lak le, fikfa lakah an rak riahnak hmun ka mitthlam ka cuan ter ahhin a celh zong ka celh lo. Tampi a chim lo, nain a chimmi tlawmpal hmanh hi ngeih a chia i thinung a fak hringhran. Hitluk tiangin zeica dah ram caah rian ttuan duhnak lungthin an ngeih i, chungkhar nu le pa hna chuah takin rawl lo um an i thim i a mak ko da kaw, tiah keimah le keimah bia kai ruah. A phi ka chuahmi cu miphun dawntnak ruangah a si. Cu lak lai ahcun, Chin mi kan chawva le, kan anka thlum te hmanh siang loin CNF\A a thangchiatmi kong theih ahhin cun thin a lin ko. Ziah thinlung an ngei cio lo maw, ti tluk tiang khi ruahnak a chuak. Kan Pu chimmi Meithal tlaih hi, ka duh lo. A har tuk i, kum sau tuk tupi le fikfa lakah ka tlai i a har tuk hringhran. Ka pa Ralbawi a si caah a har hi a theih tuk cang i ralkap si cu a kan sianh lo. Asinain ram pakhat nih cun a herh hrim ko kan ti caah kan duh lo na buin kan tlaihmi a si tiah a chimmi bia nih ka ngaih a ka chiatter. Maw, Chin ralkap vialte hna khi zei ko khi dah an va lawh ve hnga mu, kan nih ramdang ummi vial nih nunnak pek tiang ttuan lio ah tangka fang khat hmanh a siang lomi kan um hi cu a rak poi ka ti. Nain Pathian nih a za a ti tikah cun kan lung a fim te ko lai tiah ruahnak kai cheu tthan. CNF an tuarnak ka ruahah ram caah saantlai lo ka si zong ka fiang. Kum 17 ka si cang nain hi bantuk minung hi ka tong bal hna lo. Ka mang zongah ka ton hna lai ti hi ka manh bal lo. Hmanthlak chung lawngin ka rak hmuhmi ka mithmuh i ka ton khawh caah kai lawm tuk hringhran. Kan Pu Victor Biak Lian nih kan ton te lai a ka ti nain caan a um lo caah kan i tong kho lo. Cucaah tuni hi ka caah chinchiah awktlak ni le caan zong asi. Mipi zong an i lawm cio timi khi an mithmai nih a langhter. CNF\A kan ralkap pawl sunglawi in rak don i rak conglomh zong hi a phu hrim ko. Bawipa nih a bia thluachuah seh law, a saduhthah tlinnak ding caah kan chawva le, kan thlacamnak in bawm cio hna u sih. A tlawm te kan timi zong hi hmunkhat ah kan fonh tikah cun hmanrua a si zungzal ko, Chinmi kan chawva tlawmte kha kan fonh ahcun a nganpi ah ai chuah ko lai tiah ka bia ka donghter. Kan Pu bia ka uartuk mi hna: Chinmi hi hlan bantukin, hlen khawh kan si ti lai lo.Nan i za cio! Kan i za cio cang si Zalennak kan hmuhnak dingah cun kan lung ai rual a hau. Lungrual hi kan teinak asi Chinmi le Khrihfa tthen khawh a si lo. CNF le Chin zong tthen khawh a si lo Chin ram a ngeitu cu hohmanh an si lo. Chin miphun lawng lawng kan si Note: Hi bantuk capar kan hromhmi hna hi, keimah pumpak thangtthat kawlnak si loin, ka lung lomhnak kai um pi khawh lo i kan hromhmi hna a si. Lunglawmhnak he: Nu Sung Hranglung (Nu Nu)
Posted on: Fri, 26 Dec 2014 18:50:57 +0000
Trending Topics
Recently Viewed Topics
© 2015